¹ Paribasa hal Penabur Udihie, Yesus mulai ngajar hang iring danau. Ulun rama tu'u bakumpul mangarumuni Yesus, hampe Hanye mamai ma isa jukung sa naan hang danau yiru balalu maharung. Samentara, ulun rama yiru naan hang darat, hang iring danau. ² Balalu, Hanye mangajar here rama hal makai paribasa-paribasa. Wuang pangajaran-Ni, Hanye kaeau ma here, ³ ''Rengei naun! Naan isakaulun tulak ma ume sa sagar ngamule wini parei. ⁴ Sakalini, hantek hanye rahat ngamule wini ru, meheni wini ru lawu hang iring lalan, balalu hawi kawan wurung, palus ngutani. ⁵ Mehe lawu hang tane sa bawatu sa puang rama taneni. Wini yiru pun tumu hinang deya taneni puang lalem. ⁶ Hantek mate andrau magin mehet, parei yiru layu deya mahi wakatni, balalu karing. ⁷ Meheni lawu hang helang pulau jumpun sa barunrui. Balalu, pulau jumpun sa barunrui yiru tumu nelang mahapit parei ru hampe matei, andri puang ta'u mua. ⁸ Kude, meheni lawu hang tane sa maeh balalu mua, tumu, batamah hante, nelang bahasil naan telung pulu kali lipat, enem pulu kali lipat, andri jatuh kali lipat." ⁹ Udihie, Yesus kaeau, "Hie sa basilu pakai nandrengei, elahni hanye nandrengei!" ¹⁰ Hantek Yesus ganyah raerai, ulun hang kuliling-Ni, andri karueh walas rasul, nunti ma-Hanye hal paribasa-paribasa yiru. ¹¹ Balalu, Hanye nyangai here, "'Rahasia kerajaan Alatalla haut na ami ma hanyu. Kudehie, ma kawan ulun lain, setiap hal nasarita wuang paribasa-paribasa, ¹² hampan, 'Biar here ta'u kadinung, here kadinung kude puang kataru, nampan here ada batobat balalu naampuni,''' Yesaya 6:9-10 Penjalasan hal Wini wuang Paribasa Panabur. ¹³ Udihie Yesus kaeau ma here, "Inunkah hanyu puang kataru paribasa yina? Kalaawe hanyu ta'u kataru katuluh paribasa yiru? ¹⁴ Panabur yiru manabur firman. ¹⁵ Here yiru ialah kawan ulun sa lawu hang iring lalan, uneng firman yiru natabur. Rahat here nandrengei, balalu hawi Iblis marabut firman sa natabur ma here. ¹⁶ Kalayiru pada, here sa natabur hang tane bawatu ialah kawan ulun sa nandrengei firman andri aray narimeni. ¹⁷ Kude, here puang bawakat hang wuang tenga ni nelang ekat batahan samantara. Udihie, hantek naan kasulitan atau kararaen hawi deya firman yiru, here palus lawu. ¹⁸ Balalu, salainni ialah sa lawu hang helang jumpun sa barunrui. Here ialah kawan ulun sa nandrengei firman, ¹⁹ kude welumni kuatir eleh andri hawa nafsu ma kasugihan, andri rama aheng sa puang maeh masuk hang helang firman yiru balalu ngapitni ngulah hanye puang ta'u mua. ²⁰ Kude, here sa natabur hang tane sa maeh ialah here sa nandrengei firman, narimeni, andri bahasil mua, telung pulu kali lipat, enem pulu kali lipat, andri jatuh kali lipat." Parbasa hal Pelita ²¹ Udihie, Yesus kaeau ma here, "Angsah pelita puang naenei pakai naanak hang kapit isa gantang atawa hang kapit ranyang? Angsah pelita yiru saharusni naanak hang amau pee pelita? ²² Deya, mahi sa nasandina sa puang nasantarang. kalayiru pada, mahi rahasia inun pun deya hal yiru sagar nasantarang. ²³ Amun naan ulun sa basilu pakai nandrengei, elahni hanye nandrengei!" ²⁴ Udihie, Yesus kaeau ma here, "Itung inun sahaut naun rengei. Ukuran sa witu hanyu sagar na pakai ngukur hanyu pada, nelang masih naan lagi sa sagar natamah ma hanyu. Deya hie sa haut naan, hanye sagar naami lagi, ²⁵ kude hie sa mahi inun-inun, inun sa naan hang hanye sagar naalab teka hanye." Paribasa hal Wini ²⁶ Udihie, Yesus kaeau, "Kerajaan Alatalla ialah kala ulun sa manabur wini hang tane. ²⁷ Panabur yiru mandre balalu amuan kaandrau andri kamalem, wini sa natabur yiru batunas andri batumu. Panabur yiru puang karasa kalaawe kajadianni. ²⁸ Wini yiru bahasil mua raerai. Awalni batunas, munge, balalu balua kawan diki pareini. ²⁹ Hantek parei yiru mihak, ulun yiru masi deya haut sagar hanye masini." Paribasa hal Diki Sesawi ³⁰ Udihie, Yesus kaeau, "Andri inun takam ta'u mambandingkan kerajaan Alatalla? atawa andri paribasa inun takam kaiyuh membandingkanni? ³¹ Kerajaan Alatalla yiru kala diki sesawi sa natabur hang tane, biar diki yiru sa panga halus hingka katuluh diki hang duniana, ³² kude hantek natabur, diki yiru sagar tumu balalu jari labih hante hingka katuluh amulean hang kabun, nelang raanni hante-hante hampe kawan wurung iyuh ngulah sarang hang kapitni." ³³ Andri rama paribasa sameh yiru, Yesus memberitakan firman ma here, ialah sameh sa ta'u here rengei. ³⁴ Hanye ang suah bapaner ma here puang makai paribasa, kude udihie Hanye ngajalas katuluhni raerai ma kawan murid-Ni. Yesus Nampitaduh Angin Topan ³⁵ Hang andrau yiru, dami haut kariwe Yesus kaeau ma kawan murid-Ni, "Ayu takam tulak ma sabarang danau," ³⁶ Udi nanan ulun rama yiru, here ngenei Yesus baya here mamai ma jukung. Balalu kawan jukung sa lain pada tulak baya Hanye. ³⁷ Udihie, hawilah riwut topan sa dasyat andri galumang hante ngahampas jukung here hampe jukung here penu ranu. ³⁸ Kude, Yesus naan hang wading jukung, rahat mandre. Balalu, here ngamuan-Ni andri kaeau ma Hanye, "Guru, daya inun Hanyu ang paduli amun takam ka'i matei?" ³⁹ Udihie, Yesus amuan nelang maharek ma riwut, balalu kaeau ma laut, ''Muku! Tanang!" Hantek yiru pada riwut yiru taduh andri danau yiru pun jari tanang. ⁴⁰ Udihie, Hanye kaeau ma here, "Daya inun hanyu pang he'ei? Inunkah hanyu mahi iman?" ⁴¹ Here jari samagin pang he'ei nelang kaeau isa andri salain, "Hie sa Hanye na? hampe riwut gansang andri laut pada nu'u ma-Hanye!"