¹ Yesus Nampiware hang Andrau Sabat Balalu, Yesus masuk lagi ma sinagoge, hang yeru naan erangkaulun sa tanganni lumpuh tuhini. ² Here nantau Yesus neu kadinung inunkah Hanye nampiware ulun yeru hang andrau Sabat himpan here ta'u manuduh Hanye. ³ Udi yeru, Yesus kaeau ma ulun sa tanganni lumpuh yeru, "Mindrileh hang penah-penah." ⁴ Balalu, Yesus kaeau ma here, "Inunkah ta'u ngulah sa maeh atawa ngulah sa raat hang andrau Sabat? Manyalamatkan nyawa atawa munu?" Kude, here suni. ⁵ Udi yeru, Yesus nantau kaliling here nelang sangit. Hanye sedih tu'u ninung kekerasan atei here. Balalu, Yesus kaeau ma ulun sa tanganni lumpuh tuhi yeru, "'Surung tangannu." Balalu, ulun yeru nyurung tanganni, tangan ulun yeru pun ware. ⁶ Deya yeru, kawan ulun Farisi hinang tulak, andri mulai basakongkol andri kawan ulun Herodian sa nawan-Ni neu ipakat kalaawe sara munu-Hanye. Rama Ulun Uma Yesus ⁷ Kude, Yesus andri kawan murid-Ni tulak mahindar ma danau, andri kawan ulun rama hingka wilayah Galilea uma ngiring Hanye, andri teka Yudea, ⁸ Hingka Yerusalem, Idumea, daerah sabarang hungei Yordan, andri sakitar Tirus andri Sidon, rama ulun hantek nyanrengei katuluh na ulah Yesus, hawi nunung Hanye. ⁹ Deya ulun rama yeru, Yesus kaeau ma kawan murid-Ni himpan nampisiap isa jukung ma-Hanye sehingga here ada mandasak Hanye. ¹⁰ Deya Yesus haut nampiware rama ulun, daganayeru rama ulun sa sakit bagagasakan neu negei-Hanye himpan ta'u ware. ¹¹ Andri, hantek kawan roh najis nantau Yesus, here sujud na hadapan-Ni nelang maharek, ''Hanyu adalah Iya Alatalla!" ¹² Kude, Yesus nguring here iwara hie sabujurni Hanye. Yesus Midi Rueh Walas Murid-Ni ¹³ Udi hie, Yesus mamai ma wungkur andri nga'yak kawan ulun sa nakatuju-Ni pakai uma sindrah-Hanye, here pun hawi nunung-Hanye. ¹⁴ Hanye midi rueh walas kaulun balalu Hanye mangutus here pakai bakhotbah, ¹⁵ andri ngami kuasa pakai ngunur kawan setan. ¹⁶ Yesus Midi karueh walas ulun yiru: Hi Simon (sa mahanye Yesus ngami ngaran hi Petrus), ¹⁷ Hi Yakobus, iak hi Zebedeus, andri hi Yohanes, pulaksanai hi Yakobus (sa mahanye Yesus ngami here ngaran Boarneges, sa artni "Kawan iak Guruh"), ¹⁸ Hi Andreas, hi Filipus, hi Bartolomeus, hi Matius, hi Tomas, hi Yakobus, iak Alfeus, hi Tadeus, hi Simon ulun Zelot, ¹⁹ andri hi Yudas Iskariot, sa bahianat ma-Hanye. Kuasa Yesus Baasal hingka Alatalla ²⁰ Udihie, Yesus masuk ma isa lewu, sakalini karumunan ulun waleng bakumpul hang yaru ngulah Yesus andri kawan murid-Ni pada puang ta'u kuman ruti. ²¹ Hantek kaluarga-Ni nyanrengei hal yati, here hawi neu ngenei Yesus waleng deya here kaeau Hanye haut puang waras. ²² Nelang, kawan Ahli Taurat sa minau hingka Yerusalem kaeau, "Hanye karasukan Beelzebul!" andri "Hanye ngunur setan makai kuasa pamimpin setan." ²³ Balalu, Yesus nerau here hawi ma-Hanye, nelang kaeau andri perumpamaan, "'Kala'awe ta'u Iblis ngunur Iblis? ²⁴ Dami isa kerajaan tapisah-pisah ulah batantangan hang wuangni, kerajaan yiru pakaiyuh batahan. ²⁵ Nelang, dami isa lewu tapisah-pisah ulah batantangan hang wuangni, lewu iru pakaiyuh batahan. ²⁶ Dami Iblis nawan tengani raerai andri tapisah-pisah, hanye pakaiyuh batahan, kude galislah riwayatni. ²⁷ Mahi isakaulun pun ta'u masuk ma lewu ulun sa gagah balalu merampok barang banani, amun puang hanye nuruk dahulu ulun sa gagah yiru, wa'u hanye kaiyuh marampok lewuni." ²⁸ Aku ngantuh sabujurni ma hanyu, katuluh dosa kawan iya murunsia ta'u naampuni, andri katuluh hujatan sa here antuh. ²⁹ Kude, hie sa mahujat Roh Barasis puang sagar ta'u naampuni, numa bahala deya dosa kekal." ³⁰ Degana, kawan ahli Taurat yiru kaeau, "Hanye karasukan roh najis." Kaluarga Yesus Satu'uni ³¹ Udihie, ineh andri kawan pulaksanai Yesus hawi nelang mindri hang luar lewu. Here nunyu ulun nunung-Hanye himpan nerau-Ni. ³² Karumunan ulun sa rahat maharung ikuliling Yesus kaeau ma-Hanye, '"Dinung, ineh-Nu andri kawan pulaksanai-Nu naan hang luar rahat ngantilaw Hanyu." ³³ Balalu, Yesus nyangai here palus kaeau, ''Hie sah ineh-Ku andri kawan pulaksanai-Ku?" ³⁴ Udihie, Hanye nantau kawan ulun sa maharung ikuliling-Hanye nelang kaeau, "Dinung, yenalah ineh-Ku andri kawan pulaksanai-Ku! ³⁵ Deya, hie sa ngunu aheng Alatalla hanyelah pulaksanai-Ku sa upu, andri pulaksanai-Ku sa wawei, andri ineh-Ku."