¹ Yesus Puang Natarime hang Kota Asal-Ni Udihie, Yesus tulak hingka yaru balalu hampe hang kota asal-Ni, kawan murid-Ni uma Hanye. ² Hantek tiba andaru sabat, Yesus mulai ngajar hang sinagoge. Rama ulun sa nyandrengei-Ni wauh, balalu kaeau, "Hingka awe Hanye kahabak katuluh ni yiru? Hikmat inun sa na ami ma Hanye andri kawan mujizat kala yiru sa naulah andri tangan-Ni? ³ Ang sah Hanye na tukang kayu, iya Maria, andri tawari hi Yakobus andri hi Yoses andri Yudas andri hi Simon? Ang sah kawan pulaksanai-Ni sa wawei naan hang yina baya takam?" udihie, here pun sangkal balalu puang narime Hanye. ⁴ Udihie, Yesus kaeau ma here, "Hang awe-awe ulun manghormati nabi, kasuali hang uneng asalni raerai, andri hang helang kawan pulaksanaini, andri hang lewuni raerai." ⁵ Maka yiru, Yesus mahi ngulah mujizat hang yaru, kasuali ngandak tangan-Ni hang amau papire kaulun sa sakit andei nyamare here. ⁶ Nelang Hanye wauh deya here puang parasaya. Balalu, Hanye tulak ikuliling kawan tumpuk nelang ngajar. Yesus Mangutus Kawan Murid-Ni ⁷ Udihie, Yesus nerau karueh walas mudid andri mulai ngutus here barueh-rueh, andri ngami here kuasa ma kawan roh najis. ⁸ Balalu, Hanye nguring here nampan ada basangu inun-inun hang kiaan yiru, kasuali ngenei tungkeh, mahi roti, ,mahi tas, mahi duit hang sabuk here, ⁹ kude makai sanal andri ada makai rueh pama. ¹⁰ Andri, Yesus kaeau ma here, "Hang awe awe hanyu masuk ma lewu, muneng ai hang yaru hampe hanyu kaluar hingka yiru. ¹¹ Andri, dami naan uneng sa puang narime hanyu andri puang nyandrengei hanyu, hantek hanyu tulak nakibas dabu hang peenu hampan jari kasaksian ma here." ¹² Balalu, here pun tulak andri ngampihabar nampan kawan ulun harus batobat. ¹³ Kalahie pada, here ngunur rama setan andri mangurapi rama ulun sakit makai minyak, nelang nyamare here. Herodes Nyandrengei Habar hal Yesus ¹⁴ Andri, Raja Herodes haut nyandrengeini, deya aran Yesus haut terkenal, andri ulun kaeau, "Yohanes Pembaptis haut bangkit hingka helang ulun matei, makani kawan mujizat ru bagawi hang wuang-Ni." Kude, ¹⁵ meheni kaeau, "Hanye yiru nabi, ialah masuk wuang bilangan hingka kawan nabi," ¹⁶ Kude, hantek Herodes nyandrengei hal yiru, hanye kaeau, Yohanes, sa haut aku tetek uluni, haut nabangkitkan!" Yohanes Pembaptis Nawunu ¹⁷ Dasar bujur Herodes raerai sa haut nunyu ulun, neu nyama hi Yohanes, balalu masungni hang wuang panyara deya hi Herodias, darangan pulaksana'ini, hi Filipus, deya Herodes haut narangan hi Herodias. ¹⁸ Deya, hi Yohanes haut gaha kaeau ma Herodes, "puang patut hanyu ngalap darangan pulaksana'inu," ¹⁹ Dagana yiru, hi Herodias nyimuh danam ma hi Yohanes andri hamen mununi, kude hanye puang ta'u. ²⁰ Deya, hi Herodes takut ma hi Yohanes dami hanye karasa hi Yohanes ialah ulun bujur andri suci, nelang hi Herodes ngalinungni. Hantek hi Herodes nyandrengei hi Yohanes, hanye jari bingung tu'u, kude hi Herodes aray nyandrengei hi Yohanes. ²¹ Kude, hampe ma andrau sa pas, hantek hampe andaru hi Herodes ulang tahun hanye ngulah perjamuan ma kawan pajabat amauni, kawan perwirani, andri kawan pamimpin Galilea. ²² Balalu hantek iya wawei hi Herodias masuk neu manari, nampan ngampiaray hi Herodes andri katuluh here sa maharung baya hanye. Balalu raja kaeau ma wawei bujang yiru, "Laku ai inun sa nakahamen hanyu andri aku sagar ngamini mahanyu." ²³ Nelang hi Herodes basumpah ma hanye, "Inun pun sa hanyu laku ma aku, sagar aku ami ma hanyu, sika hampe satangah hingka karajaanku." ²⁴ Balalu, wawei yiru tulak iwara ma inehni, "Aku saharusni laku inun?" Inehni nyangai, ''Ulu hi Yohanes Pembaptis." ²⁵ Udihie, hantek yiru jua nelang bagagasak, wawei bujang yiru hawi nunung raja nelang kaeau, "Aku hamen wayahina jua hanyu ngami ma aku ulu hi Yohanes Pambaptis hang amau baki." ²⁶ Dagana yiru, raja jari sadih tu'u, kude daya sumpahni ma wawei bujang yiru andri kawan ulun sa kuman bayani, hanye pakaiyuh manulakni. ²⁷ Balalu, raja hinang nunyu isakaulun algojo hampan ngenei ulu hi Yohanes, algojo yiru pun tulak neu netek ulu hi Yohanes wuang panyara. ²⁸ Udihie, hanye ngenei ulu hi Yohanes hang amau baki balalu ngamini ma wawei bujang yiru, balalu wawei bjang yiru ngami ma inehni. ²⁹ Dami, hantek kawan murid hi Yohanes nyandrengeini, here hawi ngalap tenga hi Yohanes balalu nganakni hang wuang ogang. Yesus Ngami Kuman ma labih teka Lime Ribu Ulun ³⁰ Udihie, kawan rasul bakumpul andri Yesus balalu maiwara ma Hanye inun-inun sa haut here ulah andri inun-inun sa haut here ajar. ³¹ Balalu, Yesus kaeau ma here, "Hayu takam tulak ma uneng sa suni nampan ta'u istirahat tawelek." Daya, naan rama ulun sa hawi andri sa tulak, hampe ngulah here puang sampat kuman. ³² Balalu, Yesus andri kawan murid-Ni tulak makai jukung ma uneng sa suni. ³³ Kude yiru, ulun rama ngini here tulak andri karasa sagar maawe here. Balalu, ulun rama yiru sindrah nempat itah lalan darat teka katuluh kota, hampe hangyaru here hawi badahulu hingka Yesus andri kawan murid-Ni. ³⁴ Hantek Yesus hampe hang iring danau, Hanye nantau rama tu'u ulun, balalu Hanye makaahi ninungni deya here ialah domba sa mahi gembala. Dagana yiru, Yesus mulai ngajar here andri rama hal. ³⁵ Hantek andrau haut tiba maieng, kawan murid Yesus hawi nunung Yesus andri kaeau, "Pulau yina uneng sa suni nelang andrau haut mulai maieng. ³⁶ Suba huyu here na tulak ma kawan tumpuk sa naan hang pulau yina nampan here ta'u midi isasa ta'u nakuta." ³⁷ Kude Yesus nyangai here, "Hanyulah sa harus ngami here kuman." Balalu, here kaeau ma-Hanye, "Haruskah kami tulak midi ruti sa umanni 200 dinar pakai ngami here na kuman?" ³⁸ Yesus kaeau ma here, "'Pire ruti sa naan witu hanyu? Tulak andri dinungleh!" Udi here ngarasani, here kaeau, "Lime ruti andri rueh kenah." ³⁹ Balalu, Yesus nunyu here katuluhni nampan maharung wuang asing-asing hang kalompokni hang amau rikut kakuring. ⁴⁰ Ulun rama yiru balalu maharung bakalumpuk, naan sa jatuh kaulun andri naan sa lime pulu kaulun. ⁴¹ Udihie, Yesus ngalap lime ruti andri rueh kena yiru, nelang nantau ma langit, Hanye ngantuh syukur andri nyandarai ruti yiru, balalu Hanye ngamini ma kawan murid-Ni nampan here nyadiani ma ulun rama. Hanye pada ngabagi-bagi rueh kenah yiru ma katuluh ulun. ⁴² Andri, here katuluh kuman hampe wising, ⁴³ Balalu, here ngalap rueh walas karanyang sa haut penu andri le'e ruti andri kenah. ⁴⁴ Jumalah here sa kuman ruti yiru naan lime ribu kaulun kawan upu. ⁴⁵ Udihie, Yesus hinang nunyu kawan murid-Ni mamai ma jukung balalu tulak badahulu teka Hanye ma sabarang, ma Betsaida, kalahie pada Hanye nunyu ulun rama yiru tulak. ⁴⁶ Udi parmisi andri here, Hanye tulak ma wungkur neu badoa. ⁴⁷ Hantek andrau ka'i kamalem, jukung rahat hang penah danau, andri Yesus keraini-Ni hang darat. ⁴⁸ Balalu, udi ninung kawan murid-Ni uyuh tatu'u mangayuh jukung deya riwut batiup balawanan arah andri here, kakira hang jam jaga kamalem kaepat, Yesus hawi nunung here itah takia hang amau danau. ⁴⁹ Kude yiru hantek here kadinung Yesus takia hang amau danau, here ngakira Hanye yiru panguluh, balalu here nantiak, ⁵⁰ deya panghe'ei. Kude, Yesus hancap bapaner ma here, balalu kaeau, "Tanangleh. Ina Aku! ada takut." ⁵¹ Balalu, Hanye mamai baya here hang jukung, nelang riwut pun taduh, andri here wauh tatu'u. ⁵² Deya, here masih hu'an paham hal mujizat lime ruti yiru dagana atei here masih mapek. Yesus Nyamare Rama Ulun ⁵³ Balalu, udi Yesus andri kawan murid-Ni nyabarang, here nyanar jukung hang tane Genesaret. ⁵⁴ Hantek, here minau teka jukung, kawan ulun palus kataru andri Yesus, ⁵⁵ balalu here nempat tulak ma katuluh daerah yiru balalu ngenei kawan ulun sa sakit hang amau kasur, ma awe-awe ai dami nyandrengei hang Yesus naan. ⁵⁶ Kalihie pada, ma awe pun Yesus masuk ma kawan desa, atawa kawan kota, atawa kawan daerah sa sakitar yiru, here nangkading kawan ulun sa sakit hang padang ulun rama nelang ilaku ma-Hanye nampan here ta'u negei ujung jubah-Ni ai. Balalu hie pun sa negei jubah-Ni palus ware.