¹ Hang hinra wayah, ulun rama bakumpul ngaliling-Ni nyanrengei lengan Alatalla. Hantek yeru, Yesus minri hang iring danau Genesaret, ² anri katantau rueh jukung sa rahat ipampang hang iring danau yeru, kude kawan nalayan haut kaluar teka jukung yeru daya here marasih lunta here. ³ Yesus sungkat ma isa jukung, hanye yeru wat Simon, balalu nunyu Simon mehei jukung ni nyanawit butit teka pampang. Yesus maharung nelang ngajar ulun rama teka amau jukung. ⁴ Udi luput ngajar, Yesus kaeau ma Simon," Hululeh ma unengan sa lalem balalu timai luntanu lepuh ngakali kenah." ⁵ Sangai Simon, "Guru, kami haut bahimat bagawi erang malem suntuk, kude mahi kaiyuh inu-inun! Kude, daya Hanyu sa nunyu, aku sagar nyanimai lunta yena." ⁶ Wayah here ngaraja, here kaiyuh hene tuu kenah hampe lunta here niba sitat. ⁷ Balalu, here nanterau kawan ulun sa hang jukung isani hawi lepuh ngarawah. Balalu, kawan hengau hawi anri uma namuat kenah ma rueh jukung yeru hampe jukung here ane kayem. ⁸ Hantek Simon Petrus kaindi kajadian yena, hanye basujut sambah hang hadapan Yesus nelang maharek,"Hulu tulak teka aku, Tuan, dagana aku yena ulun badusa!" ⁹ Petrus ngantuh kalayeru dagana hanye anri katuluh ulun sa naan baya hanye mandam daya hene kenah iyuh here. ¹⁰ Kahiye pada Yakobus anri Yohanes, kawan anak Zebedeus, sa bahengau anri Simon. Yesus bapaner ma Simon,"Ada takut. Teka taati, hanyu sagar malunta murunsia." ¹¹ Udi here narik kawan jukung ma pampang, here nanan katantuluh balalu ngumba Yesus. ¹² Hangkatika anrau, Yesus naan hang isa tumpuk. Hang tumpuk yeru naan erang kaulun tengani penu kudung. Awuk ulun ru kaindi Yesus, hanye suntuk hampe uruwawani wuah tane nelang ilaku ma Hanye,"Tuan, Jaka Hanyu hamen, Hanyu tau nyamare aku." ¹³ Balalu Yesus ngului tanganNi anri nyambe ulun yeru. Eau-Ni,"Aku hamen, hayu ware! Hamian yeru jua, panyakit kudung ulun ru wawai. ¹⁴ Tagal yeru, Yesus ilaku ulun yeru ada iwara ma hiye jua nelang maharek,"Hulu anri tutui tenganu ma imam. Sarah parapahnu daya haut ware iyalah haut na parentah Muses sa jari tanda ma here. ¹⁵ Kabar neu Yesus magin rami ngulah ulun rama hawi bakumpul lepuh nyanrengei Hanye nelang laku na samare teka kawan panyakit. ¹⁶ Kudeyeru, Yesus gaha tulak puang here karasa ma unengan suni lepuh lakudua. ¹⁷ Hangkatika anrau, awuk Yesus rahat ngajar, kawan ulun Farisi anri kawan ahli Taurat sa hawi teka katuluh tumpuk litar Galilea, Yudea, anri Yerusalem uma maharung hang yaru. Kuasa Tuhan nyinrah Yesus ngulah Hanye kaiyuh nyamare ulun rama. ¹⁸ Balalu, naan tantauleh papire ulun hawi ngenei erang kaulun lumpuh baya panreanni, anri here ngakali ngenei masuk nganak ulun ru hang hadapan Yesus. ¹⁹ Kude daya here mahi lalan ngenei ulun yeru masuk daya ulun rama ipahipit, here mamai ma amau hatap balalu ngampinau ulun lumpuh yeru baya panreanni ma penah-penah hang hadapan Yesus. ²⁰ Wayah ngini iman here, Yesus maharek,"Ui naun, dusanu haut na ampun." ²¹ Kawan ahli Taurat anri kawan ulun Farisi ipanunti sameh here,"Hiyesah Ulun sa ngakupe Alatalla yena? Hiye sa tau ngampun panan dusa ekat Alatalla leh?" ²² Wayah Yesus karasa pikiran here, Hanye bapaner,"Daya inun hanyu itunti iyalah yeru hang ateinu? ²³ Sa awe labih patut, ngantuh 'kawan dusanu haut na ampuni' atawa 'Hingkat palus takiya'? ²⁴ Kude yeru, himpan hanyu karasa Anak Murunsia bakuasa hang dunia neu ngampun panan dusa, "Yesus maharek ma ulun lumpuh ru, "Aku paner mahanyu: Amuanleh, endei panreannu palus mudileh."' ²⁵ Hantek yeru jua, ulun yeru palus minri hang hadapan ulun rama balalu ngalap panrean unengni mangkading, palus takiya mudi saratang nawat Alatalla. ²⁶ Katuluh ulun manam balalu nawat Alatalla. Anri penu katakuten daya tamam kuasa Alatalla, here kaeau," Anrau yena kami kadinung kajadian luar biasa!" ²⁷ Udiyeru, Yesus kaluar balalu katantau erang kaulun tukang tagis pajak bangaran Lewi sa rahat maharung hang unengan pangumpul pajak. Yesus paner mahanye,"Taharak Aku." ²⁸ Balalu Lewi minri, nanan katuluhni, balalu naharak Yesus. ²⁹ Balalu, hanye ngulah pesta hante ma Yesus hang lewuni. Hene tukang tagis pajak baya kawan ulun lain sa kuman sinrah here. ³⁰ Kude, kawan ulun Farisi anri kawan ahli Taurat gagarunum ma kawan murid Yesus,"Daya inun hanyu kuman anri nguut baya kawan panagis pajak nelang baya kawan ulun badusa?" ³¹ Yesus nyangai nelang maharek ma here," puang kawan ulun wigas sa parlu tabib, tapi kawan ulun sakit. ³² Aku hawi puang nerau ulun sa maeh patut, tapi nerau kawan ulun badusa himpan here batubat." ³³ Here paner ma Yesus,"Kawan murid Yohanes gaha puasa nelang lakudua, kalahiye pada kawan murid ulun Farisi. Kude, kawan murid-Nu santar kuman anri nguut. ³⁴ Yesus paner ma here," Taulah hanyu nunyu rumbungan pangatin upu himpan puasa hantek pangantin upu ru masih naan baya here? ³⁵ Tapi, naan wayahni anrau yeru sagar hawi, hantek pangantin upu na alap teka here, anri hang anrau yeruleh here sagar puasa." ³⁶ Yesus pada nyurah rarapisan yena ma here, "Mahi erang kaulun jua sagar ngirah tetek kain teka pama wau pakai nambal pama sa haut uhang. Daya amun kalayeru, ulun yeru sagar nyanrusak pama wau, nelang tetek kain sa wau puang sagar pas anri pama uhang. ³⁷ Kalahiye pada mahi erang kaulun jua sa nalui angur wau ma wuang kantung kudit sa uhang. Angur sa wau yeru sagar ngirah kantung kudit sa uhang ngulah angur ru pawawak anri Kantung kuditni sagar hansur. ³⁸ Angur sa wau nasimuh hang kantung kudit sa wau jua. ³⁹ Mahi erang kaulun jua sa udi nguut angur lawah, hakun nguut angur sa wau dagana here, "Angur sa lawah ru labis marauh."'