¹ Hindra wayah, hang anrau Sabat, Yesus takiya mitah padang ganum. Hantek yeru, kawan murid-Ni mutik papire diki ganum, balalu ngarakusuk anri tangan here, palus ngutani. ² Papire ulun Farisi nunti, "Daya inun hanyu miulahan sa paiyuh na gawi hang anrau Sabat?" ³ Yesus nyangai nelang paner, "puang suahsah naun mambasa inun sa haut na ulah daya Dawid hantek hanye anri kawan ulun baya hanye kainam kalauwan, ⁴ neu kalaawe hanye masuk ma wuang Lewu Tuhan, ngalap rute parapah, balalu nguta rute yeru, palus ngami ma kawan ulun sa baya hanye, sa paiyuh ngutani, ekat kawan imam ai?" ⁵ Balalu, Yesus maharek ma kawan ulun Farisi yeru, "Anak Murunsia hanyeru Tuhan amau anrau Sabat." ⁶ Hang anrau Sabat sa lainni udi yeru, Yesus tulak ngajar ma sinagoge. Hang yeru naan erang kaulun sa tangan kawanni lumpuh. ⁷ Kawan ahli Taurat anri kawan ulun Farisi ngantilau inunkah Hanye sagar nyamare hang anrau Sabat, himpan naan alasan mandawa Hanye. ⁸ Kude, Yesus karasa inun sa naan hang kunuan here. Hanye paner ma ulun sa tanganni lumpuh yeru, "Amuanleh, nelang inrileh hang penah." Balalu, ulun yeru amuan anri minri hang yaru. ⁹ Yesus paner ma here, "Aku nunti ma naun, sa awe tau naulah hang anrau Sabat: ngulah pikaeh atawa ngulah pikurun? Manyalamat pihewukan atawa ngampibinasa?" ¹⁰ Udi ngulik kaliling, ma here katuluh, Yesus maharek ma ulun sa tanganni lumpuh yeru, "Surungleh tangannu." Balalu, ulun ru nyurung tanganni palus tanganni ware. ¹¹ Dagana yeru, kawan ulun Farisi anri kawan ahli Taurat tamam sangit balalu here bagurayang neu inun sa sagar naulah here ma Yesus. ¹² Hang anrau- anrau yeru, Yesus mamai ma wungkur lepuh lakudua erang kapulakmalem ma Alatalla. ¹³ Ketuni kaayatni, Hanye nerau kawan murid-Ni balalu midi ruehwalas kaulun teka here, hanyeru kawan ulun sa naantuh-Ni rasul: ¹⁴ Simon sa naampingaran-Ni "Petrus", Andreas pulaksanai Petrus, Yakobus, Yohanes, Filipus, Bartolomeus, ¹⁵ Matius, Tomas, Yakobus anak Alfeus, Simon sa naantuh ulun Zelot, ¹⁶ Yudas Anak Yakobus, anri Yudas Iskariot sa jari penghianat. ¹⁷ Udi Yesus anri kawan rasul minau, Hanye minri hang isa unengan sa rata. Balalu, hawi nunung Hanye sakumpulan kawan murid-Ni anri ulun rama sa hawi teka litar tumpuk Yudea, Yerusalem, pada teka daerah tasik tumpuk Titus anri Sidon. ¹⁸ Here katuluh hawi kai nyanrengei Yesus anri kaiyuh nasamare teka masam panyakit pangaring here. Anri, kawan ulun sa masuk ruh jahat pada na samare. ¹⁹ Katuluh ulun bausaha tau ngiwir Yesus dagana kuasa sa kaluar teka Hanye palus tau nyamare here katuluh. ²⁰ Yesus nantau kawan murid-Ni yeru nelang bapaner, " Naberkatileh hanyu sa susah dagana watnuleh Karajaan Surga. ²¹ Naberkatileh hanyu sa taati kalauwan dagana hanyu sagar na tamising. Naberkatileh hanyu sa ngiak dagana hanyu sagar kakihi. ²² Naberkatileh hanyu hantek ulun ngamuar hanyu, nyingkeh hanyu, mahina hanyu pada nangkurun ngarannu daya Anak Murunsia. ²³ Mihewuleh hantek hanyu narimeni, anri batanrik kaaraien daya upanu hante hang surga. dagana iyalah yeru kalakuan datu moyang here ma kawan nabi. ²⁴ Kude yeru, silakaleh hanyu sa tatau dagana hanyu haut kaiyuh rauhni welum. ²⁵ Silakaleh hanyu sa taati wising dagana hanyu sagar kalauwan. Silakaleh hanyu sa taati kakihi dagana hanyu sagar mahanang atei nelang nungkau. ²⁶ Silakaleh hanyu amun katuluh ulun ngantuh pikaeh neu tenganu dagana iyalah yeru pada datu moyang here hantek paner neu kawan nabi palsu. ²⁷ "Kude, Aku iwara ma hanyu sa nyanrengei Aku. Piahileh musuhnu anri ulah pikaeh ma ulun sa muar anri hanyu. ²⁸ Naberkatileh ulun sa nyumpah hanyu anri lakudualeh ma here sa ngahanangan hanyu. ²⁹ Ma ulun sa nampar pahunu, surung jua pahu isani. Anri, ma hiye pada sa marampas jubahnu, ada nguring amun marampas bajunu jua. ³⁰ Amileh ma tiap ulun sa ilaku ma hanyu, anri amun ulun ngalap paramananu, ada laku na ampudi. ³¹ Ulahleh sa patut anri ulun lain amun hanyu hamen naulah kalayiru jua daya here. ³² Amun hanyu ekat piahi anri ulun sa miahi anri hanyu, inun tawat sa naami ma hanyu? Dagana, ulun badusa pada piahi ma kawan ulun sa miahi here. ³³ Amun hanyu ekat ngulah pikaeh ma ulun sa haut maeh anri hanyu, inun patut hanyu kaiyuh tawat? Dagana, ulun badusa jua ngulah hal sa sameh. ³⁴ Amun hanyu ngihau paramana ulun lain anri maharap imbalan, inun tawat sa na ami ma hanyu? Dagana, ulun badusa jua ngampihau ma ulun badusa lainni himpan here tau kaiyuh narime mulek anri jumalah sa sameh. ³⁵ Kude, ahileh musuhnu anri ulah pikaeh, ami ihauan ma ulun lain anri ada baharap walehan. Anri kalayeru, hanyu sagar kaiyuh upa sa hante anri hanyu sagar jari anak Sa Pangaamau, dagana Alatalla yeru maeh ma kawan ulun sa pakataru batarimekasis nelang sa jahat. ³⁶ Dagana yeru, ware hanyu miahi malelu, sameh iyalah Amahnu sa penu anri ahi lelu." ³⁷ "Ada mahakimi himpan hanyu puang nahakimi. Ada mahukum himpan hanyu puang nahukum. Piampunleh maka hanyu sagar naampuni. ³⁸ Amileh maka sagar naami pada ma hanyu: takaran sa maeh, sa natampisit, sa nagagunsang anri jubung, sa sagar na halui hang tuntuwineinu. Daya anri takaran sa sameh pakainu ngukur, yeru pada sagar naukur mulek ma hanyu." ³⁹ Yesus nyarita ma here rarapisan yena, "inun tau ulun pehe ngayak ulun pehe? angneh here rueh sagar lawu ma luang? ⁴⁰ Erang kaulun murid puang labis teka guruni. Kude, ma tiap ulun sa haut patuh sagar jari iyalah guru here. ⁴¹ Dainun hanyu kadinung wuwuk kayu hang mate pulaksanainu, tapi hanyu puang karasa balok kayu hang matenu raerai? ⁴² Kalaawe hanyu tau ngantuh ma pulaksanainu,"Pulaksanai, elah aku ngaluar wuwuk kayu yeru teka matenu', padahal hanyu puang kadinung balok kayu hang matenu? Ui ulun sa papura! nakaluar dulu balok kayu yeru teka matenu raerai. Udiyeru, wau hanyu kaiyuh lentah kaindi ngaluar wuwuk kayu teka mate pulaksanainu." ⁴³ "Kakau kayu sa maeh, puang sagar bawua sa buruk, anri kakau kayu sa buruk puang sagar bawua maeh. ⁴⁴ Tiap kakau kayu kataru teka wuani. Ulun puang ngumpul wua ara teka padang runrui, atawa mutik angur teka jumpun haket. ⁴⁵ Ulun maeh ngaluar hal maeh teka ateini sa maeh anri ulun sa jahat ngaluar hal-hal sa jahat teka ateini sa jahat. Inun sa kaluar teka wawa ulun hawi teka inun sa naan hang ateini." ⁴⁶ "Dayainun hanyu nerau Aku, 'Tuhan, Tuhan,' tapi puang ngulah inun sa naajar-Ku? ⁴⁷ Aku sagar nutui ma hanyu, iyalah inun ulun sa hawi ma Aku, nyanrengei ajaran-Ku anri ngarajani. ⁴⁸ Hanye iyalah ulun sa ngamuan lewu, sa ngadi lale-lalem, balalu nganak pundasi hang amau watu. Hantek hawi banyir, ranu nantam lewu ru, tapi puang gaguyuh dagana lewu ru nabangun pundasini tuu segah. ⁴⁹ Kude, ulun sa nyanrengei ajaran-Ku tapi puang patuh, hanye iyalah ulun sa ngamuan lewu hang tane puang ba pundasi. Hantek hawi banyir, lewu ru runtun nelang hante karusakanni.