¹ Yesus, sa penu Ruh Barasih mulek ma Yordan. Balalu hanye na ayak daya Ruh Barasih nuju padang balantara ² salawah 40 anrau nampan na purija Iblis. Hanye puang nguta inun jua salawah anrau- anrau yeru. Hantek wayahni luput, Hanye kalauwan. ³ Balalu, Iblis maharek ma Hanye,"Amun Hanyu Anak Alatalla, huyuleh watu yena jari roti." ⁴ Yesus nyangaini,"Naan tasurat, 'murunsia welum puang teka rute ai."' Ulangan 8:3 ⁵ Udiyeru, Iblis ngayak Yesus ma unengan sa amau anri nantarang ma- Hanye katuluh karajaan dunia. ⁶ Balalu, Iblis kaeau ma-Hanye,"Aku sagar ngami Hanyu kuasa anri kamuliaen amau katuluh unengan ru. dagana katuluhni haut naami maaku. Anri, aku ngami ma hiye jua sa aku katuju. ⁷ Jari, jaka Hanyu nyamah aku, katuluh yeru sagar jari ampun-Nu." ⁸ Balalu, Yesus nyangai,"Naan tasurat, 'Hanyu harus nyamah Tuhan Alatallanu, ekat ma-Hanye hanyu harus babakti"' Ulangan 6:13 ⁹ Udiyeru, Iblis ngenei Yesus ma Yerusalem balalu ngampinau-Ni hang wuwungan Lewu Alatalla. Eau Iblis ma Yesus, "Amun Hanyu Anak Alatalla, sanawuleh tenga-Nu teka yena ma kapit, ¹⁰ daya naan tasurat, 'Manganai Hanyu, Alatalla sagar nunyu kawan malekat-Ni nyaga Hanyu.'Mazmur 91:11 ¹¹ Nelang, anri tangan here, here sagar nyanrepang Hanyu himpan pee-Nu puang santuk watu,"'Mazmur 91:12 ¹² Sangai Yesus ma Iblis,"Naan tasurat, 'Ada murija Tuhan Alatallanu"' Ulangan 6:16 ¹³ Udi Iblis luput murija Yesus, hanye tulak nanan Yesus anri nganrei wayah sa lain. ¹⁴ Yesus mulek ma Galilea anri penu kuasa Roh, anri barita neu Hanye tasiar ma katuluh daerah hang litar yeru. ¹⁵ Balalu Hanye mulai ngajar hang sinagoge anri katuluh ulun nawat Hanye. ¹⁶ Udiyeru Yesus tulak ma Nazaret, tumpuk uneng Hanye tumbu mihante. Iyalah kabiasaan-Ni, Yesus tulak ma sinagoge anri minri kai mambasa. ¹⁷ Kitab Nabi Yesaya na ami ma Hanye, balalu Hanye nguka kitab ru anri kahaba kalaan sa natulis, ¹⁸ Ruh Tuhan naan witu Aku, daya Hanye haut ngutus Aku lepuh mambarita Kabar Barasih ma kawan ulun susah. Hanye ngutus Aku mambarita pambebasan ma kawan tahanan, anri ngampulek paninungan ma kawan ulun pehe, ngampibebas kawan ulun sa tatindas, ¹⁹ anri ngabar taun berkat Tuhan haut hawi." Yesaya 61:1-2 ²⁰ Yesus nutup kitab yeru nelang ngampulek ma pangurus lewu sumbayang, balalu Hanye maharung. Mate ulun rama hawuang sinagoge yeru puang pakitup wauh ma tenga-Ni. ²¹ Balalu, Yesus mulai bapaner ma here,"Anrau yena, ganapleh inun sa haut natulis Surat Barasih yena hantek hanyu nyanrengeini." ²² Anri uras ulun mambujur-Ni nelang manga-manga daya wusi paner sa kaluar teka mulut-Ni. Here bapaner," Angneh Hanye yena anak Yusuf?" ²³ Balalu, Yesus bapaner ma here,"Hanyu pasti sagar ngantuh paribahasa yena ma Aku, 'Tabib, samareleh tenga-Nu raerai! Kami karengei neu sa na ulah-Nu hang Kapernaum, ulah jua yeru hang yena, hang tumpuk asal-Nu raerai."' ²⁴ Balalu Hanye maharek, "Aku paner ma naun, sabujurni mahi nabi sa natarime hang tumpuk asalni raerai. ²⁵ Hawuang kabujuren, Aku iwara mahanyu, naan wahai walu hang Israel wayah jaman Elia, hantek langit patutup salawah telu taun anri enem wulan, hantek kalauwan tamam bakajadian hang katuluh tumpuk. ²⁶ Kudeyeru, Elia puang nautus ma hiye jua ekat ma erang kaulun walu hang Sarfat, hang daerah Sidon. ²⁷ Anri, naan wahai wuah kudung hang Israel hang jaman Nabi Elisa, kude pauweng isa tenga jua teka here sa na tahirni, ekat Naaman, ulun Siria yeru." ²⁸ hantek karengei kawan hal yena, katuluh ulun hawuang sinagoge yeru bapanyangit. ²⁹ Balalu, minri here nelang narik Yesus maluar teka tumpuk ru, balalu ngenei-Ni piamau wungkur uneng tumpuk here naapinri lepuh nyanawu-Ni teka iring wungkur. ³⁰ Tapi, Yesus mitah teka kawan penah here palus tulak. ³¹ Yesus tulak ma Kapernaum, isa tumpuk hang wilayah Galilea, anri ngajar ulun rama hang anrau Sabat. ³² here mandam anri watangajar-Ni daya wusi paner-Ni penu anri kuasa. ³³ Hang sinagoge erang kaulun upu sa karasukan ruh setan sa bere. Ulun ru miuwik anri lengan mehet. ³⁴ "Elahni kami raerai! Inun urusan-Nu anri kami, ui Yesus, Ulun Nazaret? Inunsah Hanyu hawi lepuh nyanrupuh kami? Aku karasa hiye Hanyu, Sa Barasis teka Alatalla." ³⁵ Tapi, Yesus misuh ruh setan yeru, eau-Ni,"Suni! kaluarleh teka ulun yiri!" Udi setan yeru mambanting ulun yeru ma tane, hang hadapan katuluh ulun, hanye kaluar teka tenga ulun yeru anri puang ngampihanangni. ³⁶ Anri penu kawauhen, katuluh ulun sa naan hang yeru maharek isa anri sa lain,"lengan inun yena? Daya anri pangaruh nelang kuasa, Hanye mamarintah ruh-ruh bere anri here kaluar." ³⁷ Anri, barita neu Yesus tasiar ma uras unengan hang katuluh daerah yeru. ³⁸ Udiyeru, Yesus nanan lewu sumbayang yeru anri tulak ma lewu Simon. Hantek yeru, kasian Simon ganyah mekum tamam, daya yeru here laku Yesus nyamareni. ³⁹ Balalu, minrileh Yesus hang riet kasian Simon anri misuh panyakitru, balalu ekum ru ware. Hamituan yiru, kasian Simon amuan malayani here. ⁴⁰ Wayah mateanrau nuku leteng, katuluh ulun ngenei kaluarga here sa ngaret bamasam panyakit ma Yesus. Balalu Yesus nyanrepang tangan-Ni ma amau here asing-asing anri nyamare here. ⁴¹ Kawan setan pada kaluar teka ulun rama ru nelang miuwik,"Hanyu Anak Alatalla!" Tapi, Yesus misuh here, Hanye puang mambiarkan here paner daya here karasa samula Hanye hanyeru Kristus. ⁴² Ketuni kaayatni Yesus tulak ma unengan sa suni hamen ngaraerai. Ulun rama ngantara-Ni, here bausaha mahalangi Hanye himpan puang nanan here. ⁴³ Tapi, Hanye paner ma here,"Aku tatuu nampe Barita Salamat Karajaan Alatalla ma kawan tumpuk lain pada daya yena Aku nautus." ⁴⁴ Balalu, Yesus bahutbah hang sinagoge- sinagoge hang Yudea.