¹ Hang taun kadime walas jaman pamarintahan Kaisar Tiberius, hantek Pontius Pilatus jari gubernur Yudea, Herodes jari raja Galilea; Filipus pulaksanai Herodes jari raja hang Iturea anri Trakhonitis; anri Lisanias jari raja Abilene. ² Hanas anri Kayafas jari imam agung, hawi lengan Alatalla ma Yohanes, anak Zakharia, sa muneng hang padang balantara. ³ Maka, tulakleh Yohanes ma katuluh daerah hang sakitar Yordan anri mambarita baptisan partobatan pakai pangampunan dusa, ⁴ iyalah haut natulis hawuang kitab Nabi Yesaya: "Yenaleh lengan ulun sa nanterau hang padang balantara,' sadialeh lalan ma Tuhan, sanrata lalan ma Hanye. ⁵ Tiap leba sagar natimbuk anri satiap gunung anri wungkur sagar na sanrata. Lalan sa bakeluk sagar nakawitu anri tiap lalan sa puang rata sagar na sanrata. ⁶ Anri, katuluh ulun sagar kaindi kasalamatan teka Tuhan"' (Yesaya 40:3-5) ⁷ Balalu, Yohanes maharek ma ulun rama hawi laku na apanrus dayani," Ui, hanyu turunan anipe wisa! Hiye sa ngampi itung hanyu himpan lapas teka hukuman sa sagar hawi? ⁸ Dagana yeru, putik kawan wua sa nantarang patobatannu. Ada paner ma tenganu raerai, 'Abraham hanyeru tatu hiyang kami!' Aku iwara ma naun, sabujurni teka kawan watu yena Alatalla tau ngamuan kawan anak ma Abraham! ⁹ Malahan, teka taati kapak haut na pantak hang wakat kayu. Satiap kayu sa puang bawua maeh sagar nateweng anri na tawut ma wuang apui." ¹⁰ Kawan ulun nunti ma Yohanes," Amun kalayeru, inun sa patut kami ulah? ¹¹ Hanye nyangai,"ganap ulun sa naan rueh pama, hanye ngami erang kalamar ma ulun sa pauweng baisi. Anri, ganap ulun sa naan makuta pada ngulah hal sa sameh." ¹² Papire pangumpul pajak jua hawi laku naapanrus. Here nunti ma Yohanes,"Guru, inun sa patut kami ulah?" ¹³ Yohanes iwara ma here,"Ada narik pajak labis teka sa haut na tatap pakainu." ¹⁴ Papire sardadu nunti ma Hanye," Kalaawe anri kami? Inun sa patut kami ulah?" Yohanes maharek ma here,"Ada main paksa laku duit teka hiye jua atawa anri dawaan palsu. pisukupleh tenganu anri gajehnu." ¹⁵ Hantek katuluh ulun rahat maharap pihawian Mesias, here uras nunti hawuang atei neu Yohanes, inunkah hanye Kristus atawa puang. ¹⁶ Yohanes nyangai anri bapander,"Aku ngapanrus hanyu anri ranu. Kude, erang kaulun sa labis bakuasa teka aku sagar hawi. Makai nguka tadi sandal-Ni aku puang patut. Hanye sagar ngapanrus hanyu makai Ruh Barasis anri apui. ¹⁷ Dahuru haut naan hang tangan-Ni pakai marasih lantai uneng igirik anri pakai ngumpul gandum sa maeh ma wuang wirang-Ni. Kude, Hanye sagar nutung ape ma wuang apui sa puang sagar suah pare." ¹⁸ Anri hene nasehat sa lain, Yohanes ngajar Barita Salamat ma rama ulun. Yohanes Pambaptis Napanjara ¹⁹ Kude, daya Yohanes nagur Herodes, raja wilayah, daya hal sa haut na ulahni anri Herodias, darangan pulaksanai Herodes, anri daya katuluh hal jahat sa haut naulahni, ²⁰ maka Herodes namah yena pakai katuluhi anri nampasuk Yohanes ma wuang panjara. ²¹ Hantek katuluh ulun naapanrus, Yesus jua na apanrus. Anri, hantek Hanye lakudua, langit pauka, ²² anri Ruh Barasih minau ma amau-Ni wuang ujut wurung dara. Balalu, naan lengan hawi teka langit anri bapaner,"Hanyu Anak-Ku sa nasayang-Ku. Ma-Hanyu leh Aku basadia." ²³ Hantek Yesus nuku pagawian-Ni, Hanye baumur sakitar telumpulu taun. Kawan ulun bapandapat Yesus yeru anak Yusuf. Yusuf anak Eli. ²⁴ Eli anak Matat. Matat anak Lewi. Lewi anak Malkhi. Malkhi anak Yanai. Yanai anak Yusuf. ²⁵ Yusuf anak Matica. Matica anak Amos. Amos anak anak Nahum. Nahum anak Hesli. Hesli anak Nagai. ²⁶ Nagai anak Maat. Maat anak Matica. Matica anak Simei. Simei anak Yosekh. Yosekh anak Yoda. ²⁷ Yoda anak Yohanan. Yohanan anak Resa. Resa anak Zerubabel. Zerubabel anak Sealtiel. Sealtiel anak Neri. ²⁸ Neri anak Malkhi. Malkhi anak Adi. Adi anak Kosam. Kosam anak Elmadam. Elmadam anak Er. ²⁹ Er anak Yesua. Yesua anak Eliezer. Eliezer anak Yorim. Yorim anak Matat. Matat anak Lewi. ³⁰ Lewi anak Simeon. Simeon anak Yehuda. Yehuda anak Yusuf. Yusuf anak Yonam. Yonam anak Elyakim. ³¹ Elyakim anak Melea. Melea anak Mina. Mina anak Matata. Matata anak Natan. Natan anak Daud. ³² Daud anak Isai. Isai anak Obed. Obed anak Boas. Boas anak Salmon. Salmon anak Nahason. ³³ Nahason anak Aminadab. Aminadab anak Admin. Admin anak Arni. Arni anak Hezron. Hezron anak Peres. Peres anak Yehuda. ³⁴ Yehuda anak Yakub. Yakub anak Ishak. Ishak anak Abraham. Abraham anak Terah. Terah anak Nahor. ³⁵ Nahor anak Serug. Serug anak Rehu. Rehu anak Peleg. Peleg anak Eber. Eber anak Salmon. ³⁶ Salmon anak Kenan. Kenan anak Arpakhsad. Arpakhsad anak Sem. Sem anak Nuh. Nuh anak Lamekh. ³⁷ Lamekh anak Metusalah. Metusalah anak Henokh. Henokh anak Yared. Yared anak Mahalaleel. Mahalaleel anak Kenan. ³⁸ Kenan anak Enos. Enos anak Set. Set anak Adam. Adam anak Alatalla.