¹ hantek yeru, Kaisar Agustus ngaluar parintah himpan nalaksana sensus ma katuluh paduduk hang dunia. ² Yena sensus panduduk sa puga naulah hantek Kirenius jari gubernur hang Siria. ³ Maka, katuluh ulun mulek ma tumpuk asal here asi-asing lepuh mandaftar tenga. ⁴ Yusuf pada nanan Nazaret, tumpuk hang Galilea, anri nintu Yudea, ma tumpuk Dawid sa na antuh Betlehem, daya here asalni teka turunan Dawid, ⁵ himpan hanye nasatet sinrah anri Maria, tunanganni, sa rahat mihawuntung. ⁶ Hantek Yusuf anri Maria haut hang Bethlehem, hampeleh waktuni Maria malaheran. ⁷ Maria malaheran Genda upuni sa taraulu. Hanye nabarungkus-Ni anri salampin nelang naelah-Ni hawuang dulang daya mahi naan kamar uneng here amalem. ⁸ Hang daerah sa sameh naan papire pakatik sa muneng hang padang nyaga kawan babiri here amun kamalem. ⁹ Nyalenga, malekat Tuhan minri hang hadapan here anri kamuliaan Tuhan basahaya hang litar here hampe here tamam takut. ¹⁰ Kude, malekat yiru bapander ma here,"Ada takut nelang rengeileh, Aku nampe barita ma naun, kabar maeh neu kaaraien ma katuluh utus bangsa. ¹¹ hang anrau yena haut nakayaan ma naun erang kaulun Juru Salamat, hanyeru Kristus, Tuhan, hang tumpuk Dawid. ¹² Itileh tanda ma naun: Hanyu sagar panalu Genda sa na barungkus anri salampin anri mangkading hawuang dulang." ¹³ Salenga, hulet sinrah malekat yeru erang kalumpuk hante tantara surgawi sa nawat Alatalla anri kaeau, ¹⁴ "Tawat ma Alatalla hang uneng sa pangaamau anri kasanangen hang dunia, hang helang kawan ulun sa suntuk ma Hanye." ¹⁵ Hantek kawan malekat nanan kawan pakatik yeru anri mulek ma surga, kawan pakatik yeru bapander isa ma sa lain,"Hayu takam ma Betlehem ngindi hal-hal sa haut bakajadian anrau yena, sa haut Tuhan tahampe ma takam." ¹⁶ Balalu, here iwawansit tulak anri manalu Maria anri Yusuf, baya Genda sa naangkading hang dulang. ¹⁷ Hantek kawan pakatik kaindi Hanye, here nyurah wusi paner sa haut nawara ma here neu Genda yiru. ¹⁸ Anri, katuluh ulun sa karengei hal yeru wauh daya hal-hal sa na wars pakatik ma here. ¹⁹ Kude, Maria nyimuh hal yeru anri maranung wuang ateini. ²⁰ Balalu, kawan pakatik mulek nunung kawan babiri here nelang nawat Hante Alatalla daya katuluh sa haut here kaindi anri karengei iyalah nawara ma here. ²¹ Anri, udi ganap walu anrau Balalu nyinar Genda yeru, ngaran-Ni na antuh Yesus, iyalah ngaran-Ni sa naami malekat sahuan Hanye na naan hawuang wuntung. ²² Hantek anrau-anrau ibarasih uma hukum Musa haut luput, Maria anri Yusuf ngenei Yesus ma Yerusalem lepuh manyarah-Ni ma Tuhan, ²³ iyalah sa tasurat hawuang hukum Tuhan,"Satiap anak upu taraulu naampidudus ma Tuhan ²⁴ anri ngami parapah sasuai inun sa naantuh hawuang hukum Tuhan, hanyeru erang pasang wurung dara muda." ²⁵ Naan erang kaulun upu bangaran Simeon sa muneng hang Jerusalem. Hante ulun sa bujur anri patuh, sa tunu-tunup pangarawahen Alatalla amau Israel, anri Ruh Barasih nyinrahni. ²⁶ Ruh Barasih iwara amun hanye puang sagar matei sahuan kaindi Kristus sa naberkati Tuhan. ²⁷ Balalu, Simeon hawi ma Lewu Alatalla daya kuasa Run Barasih, hantek Yusuf anri Maria ngenei Genda Yesus ma Lewu Alatalla nampalus ma Hanye inun sa haut natantu daya hukum Taurat. ²⁸ Udiyeru, Simeon ngantung Genda ru anri nawat Alatalla, eauni, ²⁹ "Taati, u Tuhan, amun Hanyu ngami ijin walah-Nu yena tulak hawuang damai, sasuai anri lengan-Nu; ³⁰ Daya mateku haut kaindi kasalamaten-Nu, ³¹ sa haut Hanyu sadia hang hadapan katuluh bangsa; ³² hanyeru piraai sa sagar ngampiraai kawan bangsa sa puang kataru Tuhan, anri sa jari kamuliaan ma utus-Nu, Israel." ³³ Yusuf anri ineh Genda yeru jari heran inun sa na paner Simeon neu Henye. ³⁴ Udiyeru, Simeon mamberkat here anri bapander ma Maria, ineh Yesus,"Rengei, Genda yiti haut na pidi pakai nyanawu anri nyalamat hene ulun Israel, nelang jari tanda sa na na lawan rama ulun. ³⁵ (Anri, erang kawila padang sagar manyuduk amiruenu) himpan isi atei hene ulun sagar nasantaru." ³⁶ Hang yaru pada naan erang kaulun nabi bangaran Hana, anak Fanuel teka suku Asher. Hanye haut tuu matueh. Hanye ekat welum baya daranganni salawah pitu taun udi here kawin, ³⁷ anri yeru hanye jari walu hampe umurni 84 taun. Hanye puang suah nanan Lewu Alatalla, tapi sumbayang kaanrau kamalem nelang puasa anri lakudua. ³⁸ Hantek yeru, hawileh Hana anri hanye nawat syukur ma Alatalla nelang ngesah neu Yesus ma katuluh ulun sa santar nunup pambebasan Yerusalem. ³⁹ Udi Yusuf anri Maria ngaraja katuluh sasuai hukum Tuhan, here mulek ma Galilea, ma tumpuk asal here, hanyeru Nazaret. ⁴⁰ Iya yeru welum sasar hante, kuat, penu anri hikmat, anri Alatalla mamberkati-Ni. ⁴¹ Genep taun, ulunn matueh Yesus tulak ma Yerusalem hang Anrau Pesta Paskah. ⁴² Hantek Yesus baumur ruehwalas taun, here tulak ma yaru sasuai kabiasaan anrau pesta yeru. ⁴³ Udi pesta ru jumpuh, here mudi. Tapi, Yesus tatap muneng hang Yerusalem puang rasa ineh amah-Ni. ⁴⁴ Daya ulun matueh Yesus nanguh Hanye naan hang helang kumpulan, here nampalus pakiaan hampe erang anrau penu. Balalu, here mulek ngantara-Ni hang helang kawan kaluarga anri kawan ulun sa here kataru. ⁴⁵ Hantek here mahi panalu Yesus, here mulek ma Yerusalem lepuh ngantara-Ni. ⁴⁶ Udi telu anrau, here kahaba Yesus hang Lewu Alatalla ganyah maharung hang helang kawan guru agama, nelang nyanrengei anri nampe tuntian ma here. ⁴⁷ Katuluh ulun sa nyanrengei-Ni manga-manga daya pangarasaen anri kawan sangaian-Ni. ⁴⁸ Hantek ulun matueh-Ni katantau Hanye, here jua mandam, Balalu, ineh-Ni nunti,"Nak, daya inun Hanyu miulh kayaiti ma kami? Amah-Nu anri aku galisah ngantara-Ni." ⁴⁹ Sangai Yesus ma here,"daya inun hanyu ngantara Aku? Puang karasakah hanyu amun Aku pasti naan hang lewu-Ku?" ⁵⁰ Kude yeru, here puang paham inun sa na paner-Ni ma here. ⁵¹ Balalu, Yesus mudi sinrah here ma Nazaret anri uma here. Kude, ineh-Ni nyimuh wusi paner yeru hawuang ateini. ⁵² Yesus pada tumu mihante anri sasar pintar maharati. Hanye pada sasar nakatuju Alatalla anri murunsia.