¹ Udi katuluh hal yiru, naan parayaan anrau hante ulun Yahudi balalu Yesus mamai ma tumpuk Yerusalem. ² Hang tumpuk Yerusalem, hang riet Pintu Gerbang Domba naan erang kawua kolam sa hang wuang bahasa Ibrani ngaranni Betesda, sa baisi 5 lalaya. ³ Hang kawan lalaya yiru, wahai kawan ulun sa mekum mangkading : ulun pehe, ulun kepa, anri ulun sa puang tau takia (here nganrei ranu kolam yiru bagalummang. ⁴ Daya, hang hantek tertentu, malaikat Tuhan hawi palus minau ma kolam anri ngulah ranu hang kolam yiru bagalummang. Ulun sa pamulaanni masuk ma kolam hantek ranuni bagalummang, sagar ware teka mekum sa na ingkamni). ⁵ Hang yiru, naan erang kaulun sa haut mekum salawah 38 taun. ⁶ Hantek Yesus nantau hanye mangkading hang yiru anri karasa amun hanye haut lawah tu'u kahanangen daya mekumni, Yesus nunti ma hanye, "Hamen sah hanyu na samare?" ⁷ Ulun mekum yiru kaeyau, "Ampu, mahi ulun sa ngampinau aku ma wuang kolam hantek ranuni bagalummang, hantek aku bausaha tau minau ulun lain haut mitun badahulu teka aku." ⁸ Yesus kaeyau ma hanye, "Mindri! Enat tilamnu balalu takialeh." ⁹ Hantek yiru jua, ulun yiru nasamare, hanye ngenat tilamni, balalu takia. Kude, anrau yiru anrau Sabat. ¹⁰ Daya yiru, kawan ulun Yahudi kaeyau ma ulun sa nasamare yiru, "Anrau ina anrau Sabat, hanyu puang iyuh ngenat tilamnu." ¹¹ Kude, hanye kaeyau, "Ulun sa nyamare aku, Hanye kaeyau ma aku, 'Enat tilamnu balalu takialeh."' ¹² Here nunti ma hanye, "Hie Ulun sa haut kaeyau ma hanyu, 'Enat tilamnu balalu takialeh?"' ¹³ Kude, ulun sa haut nasamare yiru puang karasa hie Hanye daya Yesus haut suni-suni tulak teka penah ulun rama hang yiru. ¹⁴ Udi hie, Yesus panalu lagi anri ulun yiru hang Lewu Alatalla anri kaeyau ma hanye, "Rengeinu, hanyu haut ware. Ada lagi ngulah dusa hampan puang jari hal sa labis murun lagi ma hanyu!"' ¹⁵ Balalu ulun yiru tulak nelang iwara ma kawan ulun Yahudi amun Yesus lah sa haut nyamare hanye. ¹⁶ Daya yiru, kawan ulun Yahudi balalu ngahanangen Yesus daya Hanye ngaraja katuluh yiru hang anrau Sabat. ¹⁷ Kude, Yesus kaeyau ma here, "Alatalla AmmahKu masih bagawi hampe taati, jari Aku pada harus bagawi." ¹⁸ Jawaban yiru ngulah kawan ulun Yahudi magin tamam bausaha munnu Yesus, puang ekat daya Yesus puang nuu ngalut anrau Sabat kude pada daya Hanye iwara amun Alatalla yiru AmmahNi raerai, sa aratini ngampisameh diriNi anri Alatalla. ¹⁹ Udi hie, Yesus kaeyau ma here, eyauNi, "Kapinu'uni, kapinu'uni, aku kaeyau ma hanyu, Iya puang sagar tau ngaraja hal sa teka Hanye raerai, amun Hanye puang nantau Ammah ngarajani; daya inun sa na karaja daya Ammah, iru pada sa na karaja daya Iya. ²⁰ Daya, Ammah sinta anri IyaNi balalu nantarang ma IyaNi katuluh hal sa haut na karajaNi raerai, anri Ammah pada nantarang ma Hanye kawan gawian sa labis hante lagi hampan hanyu lalanga daya ngawauhen. ²¹ Daya yiru, sameh iyalah Alatalla Ammah ngamuan ulun matei balalu ngami here pamelum, kalayiru pada Iya ngami pamelum ma hie sa na ahengNi. ²² Alatalla Ammah puang mahikimi hiepun, kude haut ngami katuluh kawasa panghakiman yiru ma Iya, ²³ hampan katuluh ulun sagar hurumat ma Iya sameh iyalah here hurumat ma Alatalla Ammah. Ulun sa puang hurumat ma Iya, pada puang hurumat ma Alatalla Ammah sa nunyu Hanye. ²⁴ Sa kapinu'uni Aku iwara ma hanyu, ulun sa nyarengei piwaraanKu balalu parisaya ma Hanye sa ngutus Aku sagar welum palus ma kalalawah, pada puang sagar masuk ma wuang panghakiman daya hanye haut mihadit teka pampatei ma pamelum. ²⁵ Sa kapinu'uni Aku iwara ma hanyu, katikani sagar hampe anri taati haut hampe, hantek kawan ulun matei nyanrengei lengan Iya Alatalla balalu here sa nyanrengi yiru sagar welum. ²⁶ Daya iyalah Alatalla Ammah welum hang wuang diriNi raerai, kalahie pada Hanye ngami ma Iya welum hang wuang diriNi raerai, ²⁷ balalu Alatalla Ammah ngami kawasa ma Iya ne'u ngaraja panghakiman daya Hanye yiru Iya Murunsia. ²⁸ Ada naun ngawauh hal yina daya katikani sagar hampe hantek katuluh ulun sa naan hang wuang si'at sagar nyanrengei lenganNi ²⁹ balalu here kaluar, hanye yiru here sa haut ngaraja hal maeh sagar nuju kaelanen welum. Pada here sa ngaraja hal puang maeh, sagar nuju kaelanen panghakiman. ³⁰ Aku puang tau ngaraja kawan inunpun teka diriKu raerai. Aku mahakimi iyalah inun sa na rengeiKu anri panghakimanKu adil daya Aku puang ngantara ahengKu raerai, kude aheng Hanye sa ngutus Aku." Piwaraan Ne'u Yesus Yiru Asalni Teka Alatalla Ammah ³¹ "Amun Aku iwara ne'u diriKu raerai, piwaraanKu yina puang tu'u. ³² Kude, naan here sa lain sa iwara ne'u Aku, anri Aku karasa amun piwaraan yiru tu'u ne'u Aku. ³³ Hanyu haut ngutus ma hi Yohanes anri hanye pada haut iwara ne'u habar sa tu'u. ³⁴ Kude, piwaraan sa na tarimeKu puang teka murunsia. Aku iwara hal yina hampan hanyu na salamat. ³⁵ Hi Yohanes yiru summu sa mara'ai anri matalak, hanyu pada hamen miarai erang pitus hang wuang ra'aini. ³⁶ Kude, piwaraan sa naan baya Aku labis hante teka piwaraan hi Yohanes. Daya, kawan pigawian sa na sarah daya Alatalla Ammah ma Aku ne'u na karajaKu, hanye yiru kawan pigawian sa rahat na gawi dayaKu taati, iwara ne'u Aku hanye yiru Alatalla Ammah sa ngutus Aku. ³⁷ Pada, Alatalla Ammah sa ngutus Aku yiru sa haut ngami piwaraan ne'u Aku. Kude, hanyu puang suwah nyanrengei lenganNi atawa nantau uruwawaNi. ³⁸ LenganNi puang muneng hang wuang ateinu daya hanyu puang parisaya ma Hanye sa na utusNi. ³⁹ Hanyu piajar Buku Barasis daya hanyu minna amun hang wuang Buku Barasis yiru hanyu sagar kaiyuh welum sa palus ma kalalawah; anri Buku Barasis yiru pada ngami piwaraan ne'u Aku, ⁴⁰ kude hanyu puang hawi nunung Aku hampan hanyu welum. ⁴¹ Aku puang narime pikaeh teka murunsia. ⁴² Kude, Aku kataru anri hanyu, amun hanyu puang baisi lelu sinta Alatalla hang wuang dirinu. ⁴³ Aku hawi ngennei ngaran AmmahKu, kude hanyu puang narime Aku. Amun ulun lain hawi ngennei ngaranni raerai, hanyu tau narimeni. ⁴⁴ Kalaawe sah hanyu tau parisaya, amun hanyu narime tawat teka erang kaulun ma ulun lain anri puang ngantara tawat sa hawi teka Alatalla sa Tungkan? ⁴⁵ Ada minna amun aku sagar nuduh hanyu hadapan Alatalla Ammah; sa sagar nuduh hanyu hanye yiru hi Moses, ulun sa ma hanye hanyu baharap. ⁴⁶ Daya, amun hanyu parisaya ma hi Moses, saharusni hanyu pada parisaya ma Aku daya hi Moses haut manulis ne'u Aku. ⁴⁷ Kude, amun hanyu puang parisaya ma inun sa haut na tulis daya hi Moses, kalaawe tau hanyu parisaya ma inun sa na waraKu?"