¹ Hantek Tuhan karasa amun kawan ulun Farisi haut karengei bahwa Hanye haut rama ngennei anri ngampanrus labis hene murid teka hi Yohanes, ² (walaupun sabujurni Yesus puang ngamparus, kude kawan muridNi), ³ Hanye nanan tumpuk Yudea balalu mulek ma tumpuk Galilea. ⁴ Kude, Hanye harus mitah wilayah tumpuk Samaria. ⁵ Dami Yesus hampe hang wilayah tumpuk Samaria, hang tumpuk hante bangaran Sikhar, riet tane sa suah na ammi hi Yakub ma iyani hi Yusuf. ⁶ Sumur Yakub naan hang yiru. Daya Yesus kauyuhan balalu hanye maharung hang iring sumur yiru. Katika yiru, kakira pukul enem. ⁷ Balalu hawi erang kaulun wawei Samaria ne'u nimma ranu. Yesus kaeyau ma hanye, "Awat ngami Aku ranu pakai na uut." ⁸ (Hantek yiru, kawan muridNi rahat tulak ma tumpuk ne'u midi makuta) ⁹ Wawei Samaria yiru kaeyau ma Yesus, "Kalaawe tau Hanyu, erang kaulun Yahudi, laku ranu pakai uutNu anri aku erang kaulun wawei Samaria?" (Daya, hantek yiru ulun Yahudi puang pamuntane anri ulun Samaria). ¹⁰ Yesus kaeyau ma hanye, "Amun hanyu karasa ne'u karunia Alatalla anri kataru hie sa kaeyau ma hanyu, 'Ami Aku ranu uut', hanyu sagar laku anri Hanye, daya Hanye sagar ngami hanyu ranu welum." ¹¹ Wawei yiru kaeyau ma Hanye, "Ampu, Hanyu puang baisi timma nelang sumur ina lalem tatu'u, teka awe Hanya sagar kaiyuh ranu welum yiru? ¹² Inun sah Hanyu na labis hante teka datu nini kami, hi Yakub, sa haut ngami sumur yina ma kami kalahie pada hanye haut nguut ranu teka sumur yina baya katuluh iya anri kawan situa sa na singuni?" ¹³ Yesus kaeyau ma hanye, "Tiap ulun sa nguut ranu yina tatap sagar haus kamulek, ¹⁴ kude ulun sa nguut ranu sa na ammiKu ma hanye puang sagar haus kamulek; daya ranu sa na ammiKu ma hanye yiru sagar jari mate ranu hang wuang tenga dagingni sa tatap mamancar hampe ma welum sa palus ma kalalawah." ¹⁵ Wawei yiru kaeyau ma Yesus, "Ampu, awat ngammi aku ranu yiru hampan aku puang sagar haus kamulek nelang hampan aku pada puang usah hawi lagi ma yina lepuh nimma ranu." ¹⁶ Yesus kaeyau ma hanye, "Hulu hanyu tulak, herau darangannu udi hie mulek lagi ma yati." ¹⁷ Wawei yiru kaeyau, "Aku mahi darangan." Eyau Yesus ma hanye, "Tu'u inun sa na eyaunu 'Aku mahi darangan.' ¹⁸ Kude hanyu haut suah baisi dime kaulun darangan, nelang upu sa baya hanyu taati yiru puang darangannu. Hang wuang hal yena sa na waranu yiru tu'u." ¹⁹ Eyau wawei yiru ma Hanye, "Ampu, taati aku karasa amun Hanyu na erang kaulun Nabi. ²⁰ Datu nini kami suruk sammah ma gunung yena, kude bangsaNu kaeyau amun tumpuk Yerusalem yirulah unengan ulun saharusni suruk sammah." ²¹ Yesus kaeyau ma hanye, "Parisaya ma Aku, u hanyu wawei! Sagar hampe katika ni puang hang gunung yena atawa hang tumpuk Yerusalem ulun suruk sammah nadap Alatalla Ammah. ²² Hanyu suruk sammah ma sa puang na pantarunu, kude kami suruk sammah ma sa na pantaru kami daya salamat yeru hawi teka bangsa Yahudi. ²³ Kude, sagar hampe katika ni, hanye yiru taati, kawan ulun sa suruk sammah sagar suruk sammah ma hadapan Alatalla Ammah hang wuang ruh anri kapinu'u; daya Alatalla Ammah ngampiharus kalayiru ne'u suruk sammah hadapanNi. ²⁴ Alatalla Ammah hanye yiru Ruh anri here sa suruk sammah ma Hanye harus suruk sammah hang wuang Ruh anri kapinu'u." ²⁵ Wawei yiru kaeyau ma Hanye, "Aku karasa amun Mesias sagar hawi (Hanye sa na antuh Kristus). Hantek Hanye hawi, Hanye sagar iwara ne'u katuluhni ma kami." ²⁶ Eyau Yesus ma hanye, "Aku, sa bapaner anri hanyu yirulah Hanye." ²⁷ Hantek yiru, hawi kawan muridNi nelang ngawauh daya here nantau Yesus rahat bapaner anri erang kaulun wawei. Kude, mahi erang kaulunpun sa nunti ma Hanye, "Inun sa na antaraNu?" atawa "Daya inun Hanyu bapaner anri hanye?" ²⁸ Udi hie, wawei yiru nanan balanai ranuni balalu tulak ma tumpuk nelang kaeyau ma kawan ulun hang yaru, ²⁹ "Hayu, tantau naan Erang Kaulun sa iwara ma aku ne'u katuluh hal sa haut na karajaku salawah yena. Inun kakira Hanye yiru Mesias?" ³⁰ Here balalu tulak ma luar tumpuk palus manalu Yesus. ³¹ Hantek yiru, kawan muridNi mandasak Yesus nelang kaeyau, "Guru, ware Hanyu kuman." ³² Kude, Yesus kaeyau ma here, "Aku baisi makuta sa puang naun kataru." ³³ Balalu, kawan muridNi ipanunti, "Mahi sah ulun ngennei makuta ma Hanye pakai nakutaNi?" ³⁴ Yesus kaeyau, "MakutaKu hanye yiru ngaraja inun sa na aheng daya Hanye sa nunyu Aku palus nyanyari pigawianNi. ³⁵ Ang neh hanyu kaeyau, 'Epat wulan lagi sagar masi?' Dinung, Aku kaeyau ma hanyu, uka matenu anri tantau kawan umme sa pareini haut mihak anri siap na masi. ³⁶ Taati pada, hanye sa haut masi haut narime uppani anri nimpun wua ne'u welum sa palus ma kalalawahni hampan kawan pamasi baya tukang amule kaiyuh sameh-sameh miarai mihewu. ³⁷ Hang wuang hal yena tu'u inun sa haut na wara, 'Erang kaulun ngamule kalahie pada sa lain masi.' ³⁸ Aku nunyu hanyu lepuh masi sa puang na amulenu; ulun lain sa ngarajani anri hanyu haut masuk ma wuang pigawian here," ³⁹ Wahai ulun Samaria teka tumpuk yiru parisaya ma Yesus daya piwaraan wawei yiru, "Hanye iwara ne'u hal sa haut na karajaku salawah yena." ⁴⁰ Hantek kawan ulun tumpuk Samaria yiru hampe hadapan Yesus, here ilaku ma Hanye hampan muneng baya here balalu Yesus muneng hang yiru salawah rueh anrau. ⁴¹ Magin wahai ulun sa parisaya ne'u piwaraan Yesus raerai. ⁴² Here kaeyau ma wawei yiru, "Puang lagi daya piwaraannu kami parisaya, kude daya kami haut nyanrengei raerai, nelang kami karasa amun Hanye yiru tu'u-tu'u Juru Salamat dunia." ⁴³ Rueh anrau udi hie, Yesus tulak teka yiru nuju ma tumpuk Galilea ⁴⁴ (Kapihuanni, Yesus raerai haut iwara amun erang kaulun nabi puang sagar na hurumat hang tumpukni raerai.) ⁴⁵ Hantek Yesus hampe hang tumpuk Galilea, kawan ulun Galilea nyamut Hanye daya here haut kadinung katuluh hal sa haut na karaja daya Yesus hantek perayaan Paskah hang tumpuk Yerusalem, here pada naan hang perayaan yiru. ⁴⁶ Daya yiru, Yesus hawi kamulek ma tumpuk Kana, hang tumpuk Galilea, unengNi suah ngulah ranu jari anggur. Hang tumpuk Kapernaum naan erang kaulun pagawai istana sa iya upu ni rahat mekum. ⁴⁷ Hantek pagawai istana yiru nyanrengei amun Yesus haut hawi teka tumpuk Yudea ma tumpuk Galilea, hanye tulak lepuh nunung palus laku karawah hampan Yesus hawi ma unengni anri nyamare iya upuni daya iya yiru haut kai matei. ⁴⁸ Udi hie, Yesus kaeyau ma hanye, "Amun hanyu puang nantau kawan siri anri kawan hal sa ajaib, hanyu puang harap." ⁴⁹ Pagawai istana yiru kaeyau, "Ampu, awat hawi ma unengan kami sahuan iya upuku matei." ⁵⁰ Yesus kaeyau ma hanye, "Hulu hanyu mudi, iya upunu welum!" Ulun yiru harap tu'u anri inun sa na wara daya Yesus ma hanye balalu hanye tulak mudi. ⁵¹ Hantek pagawai istana yiru masih hang lalan, kawan walahni panalu anri hanye pada iwara amun iya upuni welum. ⁵² Pagawai istana yiru nunti ma here jam pire' iya upuni mulai maeh. Here kaeyau, "Hingkariwe, kakira jam ka pitu, laing tengani wawai." ⁵³ Ammah iya upu yiru karasa, hantek yirulah Yesus kaeyau ma hanye, "Iya upunu welum." Jari, pagawai istana yiru baya katuluh kulawargani balalu harap anri Yesus. ⁵⁴ Irulah siri ajaib karueh sa na karaja daya Yesus udi Hanye mudi teka tumpuk Yudea ma tumpuk Galilea.