¹ Naan erang kaulun Farisi sa bangaran hi Nikodemus. Hanye yiru erang kaulun pamimpin bangsa Yahudi. ² Hang isa malem, hanye hawi nunung Yesus balalu kaeyau, "Rabi, kami karasa amun Hanyu na hanye yiru erang kaulun Guru sa hawi teka Alatalla daya mahi erang kaulunpun murusia sa tau ngulah kawan siri ajaib iyalah sa na ulah dayaNu, ekat amun Alatalla baya hanye." ³ Eyau Yesus ma hanye, "Sa tu'uni Aku iwara ma hanyu, amun erang kaulun puang nakayaan kamulek, hanye puang sagar tau nantau Karajaan Alatalla." ⁴ Hi Nikodemus balalu nunti, "Kalaawe tau erang kaulun nakayaan kamulek amun hanye haut matueh? Iyuh sah hanye masuk lagi ma wuang wuntung inehni ne'u nakayaan kamulek?" ⁵ Eyau Yesus ma hanye, "Sa tu'uni, aku iwara ma hanyu, amun erang kaulun puang nakayaan teka ranu baya Ruh Alatalla, hanye puang sagar tau masuk ma Karajaan Alatalla. ⁶ Inun sa nakayaan daya lunek hanye yiru pada lunek, kalahie pada inun sa nakayaan daya Ruh Alatalla hanye yiru Ruh Alatalla ⁷ Ada wauh amun Aku kaeyau ma hanyu, 'Hanyu harus nakayaan kamulek.' ⁸ Riwut pasiwui ma awe sa na ahengni hanyu ekat karengei lenganni, kude hanyu puang karasa teka awe asalni pada ma awe hanye pasiwui. Kalayiru pada anri tiap ulun sa nakayaan daya Ruh Alatalla." ⁹ Hi Nikodemus balalu nunti, "Kalaawe hal yiru tau jari?" ¹⁰ Yesus kaeyau, "Angneh hanyu na guru ulun Israel, kude daya inun hanyu puang kataru hal yena? ¹¹ Sa tu'u-tu'uni, Aku iwara ma hanyu amun kami iwara ne'u hal sa na rasa daya kami pada kami ngami kasaksian ne'u hal sa natantau daya kami, kude hanyu puang narime kasaksian kami. ¹² Amun aku iwara ne'u kawan hal dunia yena hanyu puang parisaya, kalaawe hanyu tau parisaya amun Aku iwara ne'u kawan hal surga? ¹³ Mahi erang kaulunpun murunsia sa tau mamai ma surga, ekat Hanye sa haut minau teka surga, hanye yiru Iya Murunsia. ¹⁴ Sameh iyalah hi Moses ngampamai anipe tambaga hang padang jumpun haket, kalayiru pada Iya Murunsia sagar na ampamau, ¹⁵ Hampan tiap ulun sa parisaya ma Hanye kaiyuh pamelum sa palus ma kalalawah. ¹⁶ Daya Alatalla tu'u sinta dunia yena, Hanye haut ngami IyaNi sa tungkan hampan tiap ulun sa parisaya ma Hanye puang matei, kude kaiyuh welum sa palus ma kalalawah. ¹⁷ Daya Alatalla ngampinau IyaNi ma wuang dunia puang ne'u mahakimi dunia, kude hampan dunia na salamat mitah IyaNi. ¹⁸ Ulun sa parisaya ma Hanye puang sagar wuah hukum, kude ulun sa puang parisaya haut hang kapit hukuman daya hanye puang parisaya ma ngaran Iya Tungkan Alatalla. ¹⁹ Hanye yina hukuman yiru : Pira'ai haut hawi ma wuang dunia, kude murunsia labis katuju welum hang wuang piiyeng hingka welum hang wuang pira'ai daya inun sa na gawi here yiru puang maeh. ²⁰ Tiap ulun sa ngulah gawi puang maeh hanye muar rigat anri Pira'ai nelang puang hakun hawi nunung Pira'ai hampan inun sa na gawini puang rasa. ²¹ Kude, ulun sa ngulah hal maeh hawi ma Pira'ai hampan napantaru kawan gawianni sa maeh na gawi hang wuang Alatalla." ²² Udi yiru, Yesus baya kawan muridNi tulak ma tane Yudea. Hang yaru, Hanye nangalis katika baya here nelang mambaptis. ²³ Hi Yohanes pada na baptis hang Ainon riet Salim daya hang yiru wahai ranu. Kawan ulun rama hawi ne'u na baptis. ²⁴ Hantek yiru hi Yohanes huan na sel. ²⁵ Balalu hulet salisih paham antara papire murid hi Yohanes anri erang kaulun Yahudi ne'u baptisan. ²⁶ Here manalu hi Yohanes nelang kaeyau, "Guru, Hanye sa baya hanyu hang sabarang hungei Yordan, sa ne'u Hanye hanyu haut basaksi, tantaunu, Hanye pada mambaptis nelang katuluh ulun hawi nunung Hanye." ²⁷ Balalu Yohanes kaeyau, "Murunsia puang tau narime inunpun, ekat amun hal yiru na ami ma hanye teka surga. ²⁸ Hanyu raerai tau ngami kasaksian amun aku suah kaeyau, 'Aku ina lain Mesias,' kude aku na huyu ne'u badahulu teka Hanye. ²⁹ Ulun sa baisi pangantin wawei hanye yiru erang kaulun pangantin upu; kude hengau riet pangantin upu, sa minri anri nyanrengeini, tu'u miarai mihewu nyanrengei lengan pangantin upu. Jari, arai hewuku yena haut na sanyariNi penu. ³⁰ Hanye harus magin hante kude aku harus magin rumis." ³¹ "Hanye sa hawi teka ammau hanye yiru hang ammau katuluhni, Hanye sa asalni teka tane hanye yiru teka tane nelang bapaner ne'u kawan hal sa naan hang ammau tane. Hanye sa hawi teka surga hanye yiru hang ammau katuluh sa naan. ³² Hanye iwara ne'u hal sa na tantau anri na rengei dayaNi, kude kawan ulun puang harap anri inun sa na waraNi. ³³ Ulun sa narime inun sa na waraNi tu'u harap amun Alatalla yiru tu'u maeh. ³⁴ Daya ulun sa na huyu daya Alatalla sagar nahampe lengan Alatalla daya Alatalla ngami Ruh Barasis sa ang uweng tikas. ³⁵ Alatalla Ammah tu'u ngalelu Iya sa ma Hanye katuluhni haut na sarah. ³⁶ Ulun sa harap ma Iya Alatalla sagar narime pamelum sa palus ma kalalawah, kude ulun sa puang nu'u puang sagar nantau pamelum, ekat murka Alatalla sa naan hang hanye."