¹ Udi hie, Yesus nyubarang teka Danau Galilea, hanye yiru Danau Tiberias. ² Ulun rama ngarairing Hanye daya here nantau siri-siri ajaib sa na ulah dayaNi nadap kawan ulun mekum. ³ Balalu Yesus mamai ma ammau bukit palus maharung hang yaru baya kawan muridNi. ⁴ Hantek yiru, haut riet parayaan Paskah ulun Yahudi. ⁵ Nelang nantau hang kalilingNi anri nantau kawan ulun rama hawi nunung Hanye, Yesus kaeyau ma hi Filipus, "Hang awe takam tau midi rote hampan kawan ulun rama yiru tau kuman?" ⁶ Yesus kaeyau kalayiru ne'u mansuba hi Filipus daya sa kapinu'unni Hanye haut karasa inun sa sagar na karajaNi. ⁷ Filipus kaeyau, "Rote haraga rueh jatuh dinar puang sagar sukup ma here, biar asing-asing here ekat kaiyuh erang katetek rumis." ⁸ Erang kaulun muridNi, hanye yiru hi Andreas, pulaksanai hi Simon Petrus, kaeyau ma Yesus, ⁹ Hang yina naan erang kaulun iya rumis sa baisi dime rote jelai baya rueh kaukui kenah, kude inun la aratini yiru ma kawan ulun rama yina?" ¹⁰ Yesus kaeyau, "Suba huyu katuluh ulun rama yiru hampan maharung." Hang yiru wahai rikut, jari kawan ulun yiru maharung kakira dime ribu kaulun upu jumalahni. ¹¹ Udi hie Yesus ngalap kawan rote yiru balalu ngantuh syukur, Hanye mambagi kawan rote yiru ma here sa maharung; kalahie pada na gawini nadap kawan kenah yiru sa pire rama here ngaheng. ¹² Hantek katuluh ulun rama haut wising, Yesus kaeyau ma kawan muridNi, "Himpun kawan tetek makuta sa masih naan hampan puang manyahanyang." ¹³ Daya yiru, kawan murid nimpunni nelang ngisi rueh walas pannuk anri kawan tetekan teka rote jelai sa na tanan daya here sa haut luput kuman. ¹⁴ Dami kawan ulun yiru nantau siri ajaib sa na gawi Yesus, here kaeyau, "Hanye yina himat Nabi sa haut dijanyikan hawi ma dunia." ¹⁵ Daya karasa kawan ulun rama yiri baransana hawi balalu mamaksa Hanye jari Raja, Yesus hinang basingkir ma ammau bukit raeraiNi. ¹⁶ Hantek anrau haut niba kamalem, kawan murid minau ma danau ¹⁷ dami mamai ma wuang jukung, here mulai nyubarang danau nuju ma tumpuk Kapernaum. Anrau haut niba maiyeng, kude Yesus huan hawi manalu here. ¹⁸ Danau mulai bagalummang daya na siwui angin barat. ¹⁹ Udi hie, hantek here haut iwehei niba salawe atau telumpulu stadia, here nantau Yesus takia hang ammau danau nelang nyanriet jukung yiru ngulah here takut. ²⁰ Kude, Yesus kaeyau ma here, "Ina Aku, ada takut!" ²¹ Udi hie, here hamen ngampamai Hanye ma wuang jukung kude salenga jukung yiru haut hampe ma unengan sa na tuju here. ²² Ma keunini, kawan ulun rama sa masih minri hang subarang danau nantau mahi jukung lain hang yiru, ekat isa jukung sa na pakai kawan murid. Kude, Yesus puang umma mamai ma wuang jukung yiru baya kawan muridNi sa haut tulak raerai. ²³ Balalu hawi kawan jukung lain teka Tiberias riet unengan kawan ulun rama nguta rote udi Tuhan ngantuh syukur. ²⁴ Dami kawan ulun rama nantau amun Yesus baya kawan muridNi haut mahi hang yiru, here mamai ma kawan jukung yiru balalu tulak ma tumpuk Kapernaum ne'u ngantara Yesus. Yesus Hanyeyiru Rote Welum ²⁵ Dami kawan ulun rama yiru panalu Yesus hang subarang danau, here nunti ma Hanye, "Rabi, hamian Hanyu hampe ma yina?" ²⁶ Yesus kaeyau ma here, "Sa kapinu'uni, Aku kaeyau ma hanyu, hanyu ngantara Aku puang daya hanyu haut nantau siri-siri ajaib, kude daya hanyu haut nguta rote hampe wising. ²⁷ Ada bagawi ne'u makuta sa tau ngulah pampatei, kude ne'u makuta sa ngulah pamelum hampe ma kalalawah, sa sagar na ammi daya Iya Murunsia ma hanyu daya ma Iya Murunsia yiru, Ammah, hanyeyiru Alatalla haut ngami pengesahanNi." ²⁸ Balalu, ulun rama yiru nunti ma Yesus, "Inun sa harus na karaja daya kami hampan kami tau ngaraja pigawian sa na aheng daya Alatalla?" ²⁹ Yesus kaeyau ma here, "Ina pigawian sa na aheng daya Alatalla, parisaya ma Hanye sa haut na utus daya Alatalla." ³⁰ Here balalu nunti anri Hanye, "Amun kalayiru, siri ajaib inun sa sagar na karaja dayaNu hampan kami tau nantauni balalu parisaya ma Hanyu? Pigawian inun sa hamen na gawi dayaNu? ³¹ Datu nini kami nguta manna hang padang mahaket, iyalah sa na surat, 'Hanye ngami here rote teka surga pakai makuta here."' ³² Yesus kaeyau ma here, "Kapinu'uni, Aku iwara ma naun, puang hi Moses sa ngami ma here rote teka surga , kude Alatalla AmmahKulah sa ngami ma here rote sa sejati teka surga. ³³ Daya, Rote teka Alatalla hanye yiru Hanye sa minau teka surga palus ngami pamelum ma dunia." ³⁴ Here kaeyau ma Hanye, "Tuhan, awat ngami kami rote yiru." ³⁵ Eyau Yesus ma here, "Akulah rote pamelum; kawan ulun sa hawi ma Aku puang sagar kalauan lagi, nelang kawan ulun sa parisaya anri Aku puang sagar nginam kakan ranu lagi. ³⁶ Kude, Aku kaeyau ma hanyu biar hanyu haut nantau Aku, hanyu tatap puang parisaya. ³⁷ Katuluh sa na ami Alatalla Ammah ma Aku sagar hawi nunung Aku, kalahie pada sa hawi nunung Aku puang sagar Aku puang narimeni. ³⁸ Daya, Aku minau teka surga puang ne'u ngaraja ahengKu raerai, kude ahengNi sa haut nunyu Aku. ³⁹ Kalaina ahengNi sa nunyu Aku : hampan katuluh sa haut na ammiNi ma Aku ada hampe wawai, kude umma welum kamulek hantek dunia rume die. ⁴⁰ Daya, kalaina aheng Alatalla AmmahKu, hampan kawan ulun sa nantau Iya balalu parisaya ma Hanye sagar kaiyuh pamelum sa palus ma kalalawahni, Aku sagar nyamelum hanye hantek dunia rume die." ⁴¹ Daya yiru, papire kawan ulun Yahudi mulai manggarunum ne'u Hanye daya Hanye kaeyau, "Akulah rote sa minau teka surga yiru." ⁴² Here kaeyau, "Angneh Hanye yina Yesus, iya hi Yusuf, sa ammah inehni taru takam? Kalaawe Hanye tau kaeyau, 'Aku haut minau teka surga?"' ⁴³ Yesus kaeyau ma here, "Ada manggarunum hang wuang atei hang penah naun raerai. ⁴⁴ Mahi erang kaulun sa sagar tau hawi nunung Aku, ekat Alatalla Ammah sa haut nunyu Aku nyujutni kamulek, nelang Aku sagar nyamelumni hantek dunia rume die. ⁴⁵ Iyalah na surat hang wuang kitab kawan nabi : 'Here katuluh sagar na ajar daya Alatalla.' Tiap ulun sa haut nyanrengei nelang paajar teka Alatalla Ammah sagar hawi nunung Aku. ⁴⁶ Hal yiru puang baarti amun naan ulun sa haut suah nantau Alatalla Ammah, ekat Hanye sa hawi teka Alatalla, Hanye yiru sa haut nantau Alatalla Ammah. ⁴⁷ Aku kaeyau ma hanyu, 'Kapinu'uni, tiap ulun sa parisaya sagar welum hampe ma kalalawahni.' ⁴⁸ Akuleh rote pamelum. ⁴⁹ Datu nininu haut nguta manna hang padang mahaket, kude here matei. ⁵⁰ Inaleh rote sa minau teka surga, hampan tiap ulun sa ngutani puang matei. ⁵¹ Akuleh rote welum yiru sa haut minau teka surga. Amun ulun nguta rote ina, hanye sagar welum palus ma kalalawahni; daya rote sa na amiKu ma pamelum dunia yena hanye yiru tengaKu." ⁵² Kawan ulun Yahudi mulai pasasamut paner, here kaeyau, "Kalaawe Ulun ina tau ngami tengaNi ne'u na kuta?" ⁵³ Yesus kaeyau ma here, "Aku kaeyau ma naun, kapinu'uni amun naun puang nguta tenga Iya Murunsia nelang nguut iraNi, naun puang sagar baisi welum hang wuang diri naun. ⁵⁴ Tiap ulun sa nguta lunekKu anri nguut iraKu sagar welum hampe ma kalalawah, nelang Aku sagar nyamelum hanye hantek dunia rume die. ⁵⁵ Daya, lunekKu hanye yiru makuta sa sejati anri iraKu hanye yiru ranu uut sejati. ⁵⁶ Hie sa nguta lunekKu anri nguut iraKu hanye muneng hang wuang Aku anri Aku muneng hang wuang hanye. ⁵⁷ Iyalah Alatalla Ammah sa welum haut nunyu Aku, anri Aku welum daya Alatalla Ammah, kalahie pada hie sa nguta Aku, sagar welum dayaKu. ⁵⁸ Inaleh rote sa minau teka surga, puang rote iyalah sa na kuta daya datu nini naun balalu here matei, kawan ulun sa nguta rote ina sagar welum palus ma kalalawahni." ⁵⁹ Yesus iwara katuluh yeru hang tumpuk Kapernaum hantek Hanye ngajar hang sinagoge. ⁶⁰ Hantek kawan murid nyanrengei hal yiru, here kaeyau, "Mape ajaran yiru. Hie sa kaule narimeni?" ⁶¹ Daya karasa kawan muridNi ngukulan hang wuang atei ne'u hal yiru, Yesus kaeyau ma here, "Inun sah eyauanKu yina ngulah naun puang marauh atei? ⁶² Amun kalayiru, kalaawe die amun naun nantau Iya Murunsia mulek mamai ma unengan asalNi? Ruh Barasisleh sa ngami pamelum, kude lunek puang bariran. Kawan eyauan sa haut na waraku ma nau hanye yiru Ruh Barasis baya pamelum. ⁶⁴ Kude, naan papire kaulun hang penah naun sa puang parisaya. "Daya, teka mulani, Yesus haut karasa hie sa puang parisaya kalahie pada hie sa sagar bahianat anri Hanye. ⁶⁵ Yesus kaeyau, "Daya yiru Aku kaeyau ma naun mahi erang kaulunpun sagar hawi nunung Aku, amun hal yiru puang na ammi daya Alatalla Ammahku ma naun." ⁶⁶ Teka hantek yiru, wahai kawan muridNi sa unnur anri taduh umma Hanye. ⁶⁷ Daya yiru, Yesus kaeyau ma rueh walas muridNi, "Inun naun hamen unnur pada?" ⁶⁸ Hi Simon Petrus kaeyau ma Hanye, "Tuhan, ma awe kami sagar tulak? Ekat Hanyuleh sa baisi eyauan ne'u pamelum sa palus ma kalalawahni. ⁶⁹ Kami haut parisaya anri kataru hie Hanyu, ekat Hanyuleh sa tu'u Kudus teka Alatalla." ⁷⁰ Yesus kaeyau ma here, "Angneh Aku sa midi naun katuluh, rueh walas kaulun yina? Kude, erang kaulun teka naun hanye yiru iblis." ⁷¹ Sa na maksudNi hanye yiru hi Yudas, iya Simon Iskariot, daya hi Yudas hanye yiru erang kaulun teka rueh walah murid yiru, kude hanye sagar bahianat anri Yesus.