¹ Kawan Hak Erang Kaulun Rasul V 1 Tu'u puang aku ulun bebas? Tu'u puang aku erang kaulun rasul? aku pada haut suah kadinung Yesus, Tuhan takam? Inun naun yiri puang hasil teka pagawianku hawuang Tuhan? ² Amun ma ulun lain aku yena puang rasul, sapuangni aku yiti rasul ma naun. Daya, naun hanye yiru siri sah karasulenku hawuang Tuhan. ³ Yiti pambelaanku nadap here sa sagar mamariksa aku. ⁴ Inun kami mahi hak narime kutaen anri uuten? ⁵ Inun kami mahi hak ngenei erang kaulun darangan sa seiman, ialah kawan rasul lainni, kawan pilaksanai Tuhan, nelang pada hi Kefas? ⁶ Atawa, inun ekat hi Barnabas anri aku sa mahi hak himpan puang bagawi? ⁷ Hie sa suah bagawi jari tantara makai biayani raerai? Hie sa ngamule hang kabun angur anri puang nguta wua angurni? Atawa, hie sa nyakatik babiri anri puang nguut susuni? ⁸ Inun aku kaeau kawan hal yiti manyu kabahuman murunsia? Angsah hang Hukum Taurat pada kaeau kawan hal sa sameh? ⁹ Daya, naan nasurat hawuang hukum Taurat Musa, "Ada hanyu nutup wawa sapi sa rahat miik ganum!" Inun sapi sa naparhati Alatalla? ¹⁰ Atawa, inunkah Hanye kaeau yiru daya takam? Hiai, daya takam hal yiru nasurat dagana sa ngaraja ume musti ngaraja hawuang piharapen nelang sa miik musti miik hawuang piharapen himpan kaiuh bagianni. ¹¹ Amun kami namur pangkan rohani hang penah naun, inun balabihan mun kami pada ilaku sa sifatni harata bana teka naun? ¹² Amun ulun lain naan hak yiti teka naun, inun puang kami sa labis naan hak? Kude, kami puang makai hak yiru. Kabalikanni, kami nangung urasni himpan kami puang nahalang ma Injil Kristus. ¹³ Inun hanyu puang karasa amun here sa ngaraja kawan hal sa kudus yiru, nguta makuta hingka lewu Alatalla jua? nelang, here sa ngurus unengan nyarah parapah pada kaiuh bagian teka parapah sa nasarah yiru? ¹⁴ Kala yiru pada, Tuhan marintah here sa ngabar Injil himpan welum hingka imjil pada. ¹⁵ Kude. aku puang suah makai sunah isa teka kawan hak yena.nelang, aku puang nyurat kawan hal yina himpan nagawi kala yiru pi aku. Sabab, labis maen aku matei hingka erang kaulun nyamawai sa naegah emungku. ¹⁶ Daya, amun aku mambarita Injil, mahi alasanku batataik dagana kawajiban yiru naan hang aku. Silaka aku, amun aku puang mambaritakan Injil. ¹⁷ Amun aku mambarita Injil daya kabahumenku raerai, aku naan upa. Kude, amun yina puang daya kabahumenanku, yina hanye yiru tugas sa naperisaya ma aku. ¹⁸ Amun kala yiru inun upaku? Upaku hanye yiru hantek aku mambarita Injil, aku tau mambarita Injil anri puang baupa nelang puang ngahalaen hakku hawuang Injil. ¹⁹ Kude, biar aku bakuasa hang amau uras ulun, aku tatap ngulah tengaku walah ma uras ulun himpan aku tau ngampi manang labis hene lagi. ²⁰ Nadap ulun Yahudi, aku ialah ulun Yahudi himpan aku tau ngampi manang ulun Yahudi. Nadap ulun sa welum ngalut Hukum Taurat, aku jari ialah ulun sa welum ngalut Hukum Taurat (biar aku yiti puang ngalut Hukum Taurat) nampan aku tau ngampi manang here sa itegei ngalut Hukum Taurat. ²¹ Nadap here sa puang ngalut Hukum Taurat, aku jari ialah puang ngalut Hukum Taurat (puang bararti aku puang makai hukum Alatalla, kude hawuang hukum Kristus) nampan aku tau ngampi manang here sa puang makai Hukum Taurat. ²² Nadap ulun sa maleme, aku jari maleme nampan aku tau ngampi manang here sa maleme. Aku haut jari inun eleh ma uras ulun himpan anri bamasam sara aku tau nyalamat papire ulun. ²³ Katantuluhni yiru natampalusku ma Injil himpan aku tau kaiuh uma hawuangni. ²⁴ Naun himat karasa amun hare sa bataning nempat uras uma nempat, kude ekat isa sa kaiuh hadiah? jari, nempat bahimat nampan hanyu sa kaiuh! ²⁵ Tiap ulun sa bataning balatih nahan diri hawuang katantuluh hal. Here ngulah yiru nampan narime mahkota sa puang tahan lawah, kude takam nampan kaiuh sa kalalawahni. ²⁶ Dagana yiru, aku puang nempat ialah mahi sa natuju. Aku puang nampar ialah ulun nampar riwut. Kude, aku bahimat malatih tengaku himpan udi aku ngabar Injil ma ulun, aku puang na tampik.