¹ Itati, neu kawan daging sa nasarah jari parapah ma barhala. takam karasa amun katuluh takam naan kapanaien. Kapanaien ngulah sakah, kude ahi lelo mambangun. ² Anun naan ulun sa kaingkam hanye hene pangarasaen, hanye huan karasa sa saharusni hanye karasa. ³ Nelang, amun erang kaulun sinta Alatalla, hanye nakataru daya Alatalla. ⁴ dagana yiru, neu kutaen kawan daging sa nasarah jari parapah ma barhala, takam karasa amun mahi barhala hang dunia yena, anri mahi Alatalla kasuali Hanye, isa-isani. ⁵ Kude, amun jua naan sa naantuh kawan allah, hau yiru hang amau langit atawa hang amau tane, (samula naan wahai "allah" anri naan wahai "tuhan"), ⁶ Kude ma takam ekat naan isa Alatalla, hanye yiru Amah. Hingka Hanyeleh katantuluh nelang takam naan ma Hanye. Anri, ekat naan isa Tuhan, hanye yiru Kristus Yesus, sa daya-Ni katantuluh naan, anri takam naan mitah Hanye. ⁷ Biar kala yiru, puang uras murunsia naan piharatien yiti. Kude, papire kaulun, sa magun manyambah barhala hampe itati, nguta kutaen yiru jari kutaen sa nasarah ma barhala. dagana yiru, iman parisaya here sa rumis jari rusak. Kutaen puang sagar nyanrupak takam ma Alatalla. Takam pada puang sagar labis maleme amun puang nguta yiru, atawa puang pada labis maeh amun nguta kutaen yiru. ⁹ Kude, itungleh amun kabebasannu yiti ada hampe jari dosa ma here sa maleme. ¹⁰ daya, amun naan ulun sa ninung hanyu, sa naan kapintaren, kuman hawuang lewu barhala, inun puang ulun sa rumis imanni, sagar uma nguta kawan daging sa nasarah ma berhala? ¹¹ Jari, mitah piharatiennu, ulun sa rumis imanni yiru, hanye yiru pulaksanainu, sa ma hanye Kristus haut matei, jari badosa. ¹² Balalu, anri badosa ma kawan pulaksanainu saiman nelang ngampi batan iman parisayani sa rumis, bararti hanyu pada badosa ma Kristus. ¹³ dagana yiru, amun kutaen ngulah pulaksanai saimanku badosa, aku puang sagar nguta daging hampe kalalawanni himpan aku puang ngulah pulaksanaiku badosa.