¹ Itati, neu kawan hal sa nasuratnu ma aku: samaeh ma kawan upuan himpan puang ngatu wawei. ² kude, dagana naan dapa bela, tatiap kawan upu maehni naan matueh waweini raerai anri tatiap kawan wawei naan matueh upuni raerai. ³ Matueh upu musti nampalus kawajibanni ma matueh waweini, kala yiru pada matueh wawei ma matueh upuni. ⁴ Matueh wawei puang bakuasa ma tengani raerai, malainkan matueh upuni. Kala yiru pada matueh upu puang bakuasa ma tengani raerai, malainkan matueh waweini. ⁵ Ada hampe hanyu pangalawit, kasuali anri pipakatan ma sementara waktu himpan hanyu gaganyah ngami waktu pakai lakudua. Balalu, welum baya lagi himpan Iblis puang ngangu hanyu daya naun puang kaule nahan nafsu. ⁶ Kude, aku ngeau yiti ekat nasehat, puang parentah. ⁷ Aku hamen uras ulun ialah aku. Kude, tatiap ulun naan karuniani raerai teka Alatalla, sa isa hawuang hal yiti, sa lainni hawuang hal yiru. ⁸ Ma sapuang kawin pada ma kawan walu, aku kaeau sabujurni labis maeh ma here amun tatap hawuang kaadaan ialah aku. ⁹ Kude, amun here puang tau mangandalikan diri, labis maeh here kawin. Daya, labis maeh kawin teka naun puang kaiuh nahan nafsu. ¹⁰ Ma sa kawin, aku ngami kawan parentah yena (puang hingka aku, kude hingka Tuhan), hanye yiru matueh wawei puang iuah nanan daranganni, ¹¹ (kude amun hanye haut tapu nanan matueh upuni, hanye musti tatap puang kawin, atawa ipaulek anri daranganni), nelang matueh upu puang iuh manyarak daranganni. ¹² Ma kawan sa lainni, aku kaeau (aku, lain Tuhan) amun naan pulaksanai badarangan sa puang parisaya, nelang wawei yiru hamen welum baya hanye, ada hanye nyarak daranganni yiru. ¹³ Kala yiru pada amun erang kaulun wawei badarangan sa puang parisaya, nelang upu yiru hamen welum baya hanye, ada hanye nanan daranganni yiru. ¹⁴ Dagana matueh upu sa puang parisaya yiru na kuduskan daya daranganni, anri matueh wawei sa puang parisaya na kuduskan daya daranganni. Amun puang kala yiru, kawan anaknu batantu kala kawan anak najis, kude itati here kudus. ¹⁵ Kude, amun sa puang parisaya yiru nuntut bapisah, ada nahan hanye. Neu hal ialah yina, upu atawa wawei puang lagi terikat. Kude, Alatalla haut nereu takan himpan welum hawuang damai sajahtara. ¹⁶ Daya ui matueh wawei, kala awe hanyu karasa amun hanyu sagar manyalamat darangannu? Atawa, kala awe pada hanyu karasa, ui matueh upu, amun hanyu sagar manyalamat darangannu? Tatap hawuang Wangun Hantek Na Ayak daya Alatalla. ¹⁷ Kude, ialah sa haut na tantu daya Tuhan ma tiap tenga, kala awe Alatalla haut nerau here asing-asingni, tatapleh welum hawuang kaadaan kala yiru. Kala yiru pada aku marintah ma katuluh jamaat. ¹⁸ Inun naan ulun sa naherau hantek hanye haut nasunat? Ada hampe hanye ngumpe kawan siri sunatni. Inun naan ulun sa hantek naherau huan basunat? Ada hampe hanye basunat. ¹⁹ Daya, basunat atawa puang basunat, iru puang penting. Kude, sa penting hanye yiru kataaten nampalus kawan parintah Alatalla. ²⁰ Wuah tiap ulun tatap welum hawuang kaadaan ialah hantek hanye naherau. ²¹ Inunkah hanyu erang kaulun walah hantek naherau? Ada hanyu mamikir hal yiru. Kude, amun hanyu pada kaiuh jari ulun bebas, labis maeh na alap kasampaten yiru. ²² Daya, erang kaulun walah sa naherau hawuang tuhan, hanye jari ulun sa bebas wat Tuhan. Kala yiru pada, hantek ulun sa bebas naherau, hanye jari walah Kristus. ²³ Hanyu haut natewus anri haraga lunas, dagana yiru ada hampe hanyu jari walah murunsia. ²⁴ Pulaksanai katuluh, maehni satiap ulun tatap muneng baya Alatalla, hawuang kaadaan hantek hanye naherau. Paitungen Ma Ulun sa Huan Kawin ²⁵ Itati, neu kawan ulun sa huan suah kawin, aku mahi narime parintah teka Tuhan. Kude, aku ngami pandapatku ialah ulun, sa daya pikaeh Tuhan, iuh naparisaya. ²⁶ Angapanku hal yina maeh hawuang kaadaan susah wayah yiti, hanye yiru labis maeh ma erang kaulun tatap welum iyalah inun adani. ²⁷ Inun hanyu haut naan darangan? ada hampe bausaha sarak. Inun hanyu huan badarangan? ada hanyu ngantara darangan. ²⁸ Kude, amun hanyu kawin, hanyu puang badosa. Nelang, amun erang kaulun wawei bujang kawin, hanye puang badosa. Kude, here sa kawin sagar nadap kawan kasusahen welum duniawi, anri aku hamen hanyu puang wuah teka kawan hal yiru. ²⁹ Pulaksanai, bahumku hanyeyiru wayahni haut puang hene. Jari mulai itati, elahleh here sa naan darangan, welumleh ialah here sa mahi darangan, ³⁰ here sa nungkau ialah puang nungkau, here sa arai atei ialah ulun sa puang arai atei, here sa midi ialah ulun sa puang midi, ³¹ Anri here sa makai kawan hal dunia yiti, ialah here puang makai. Daya, kaadaan dunia yiti sagar wawai. ³² Aku hamen hanyu bebas teka kasusahen. Ulun sa puang kawin mamikir kawan hal neu Tuhan, kala awe hanye tau ngampi sanag Tuhan. ³³ Kude, ulun sa kawin mamikir kawan hal duniawi, kala awe hanye tau ngampi sanang daranganni, ³⁴ nelang pikiranni tabagi. Wawei sa puang kawin anri kawan wawei bujang pikiranni ma kawan hal neu Tuhan himpan hanye jari kudus, hau tenga dagingni atawa rohni. Kude, wawei sa kawin mamikir kawan dunia yiti, kala awe hanye tau ngampi sanang matueh upuni. ³⁵ Aku kaeau hal yiti pakai kauntungennu raerai, puang pakai manjabak tenganu, sa na ahengku neu hal sa maeh himpan palayanannu ma Tuhan puang tagangu. ³⁶ Amun naan ulun sa ngangap hanye haut ngulah hal sa puang patut anri tunanganni daya tunanganni yiru haut labis umur nelang iyalah yiru sa mustini, elahleh hanye ngulah inun sa nakahamenenni, hanye puang badosa; elahleh here kawin. ³⁷ Kude, hanye sa haut mantap hawuang ateini, puang dagana paksaan, tekat bulat anri kabahumenni sendiri, nelang haut mamutus hawuang ateini puang jari kawin anri tunanganni yiru, maka ala natampalusni yiru maeh. ³⁸ Jari, amun hanye kawin anri wawei yiru maeh, kude amun hanye puang jari kawin anri wawei yiru, sika maeh. ³⁹ Matueh wawei terikat salawah daranganni masih welum. Kude, amun matueh upuni matei, hanye bebas iuh kawin anri hie eleh sa nakahamenenni, asal ulun yiru naan hawuang Tuhan. ⁴⁰ Kude, hanye labis sanang amun hanye puang kawin lagi, yiru manurut pandapatku, nelang manurutku, aku pada naan Roh Alatalla.