Yesus Dibawa Manuju Pilatus ¹ Balalu, sabarataan urang nintu bardiri wan mambawa Yesus ka hadapan Pilatus. ² Wan, buhannya mulai manuduh Yesus wan bapadah, "Kami manahui urang ini manyasatakan bangsa kami wan malarang kami gasan mambayar pajak lawan Kaisar, wan jua bapadah bahwa Sidin adalah Kristus, saikung urang Raja." ³ Pilatus batakun lawan Yesus, "Apakah Pian Raja urang Yahudi?" Yesus manjawab, "Itu nang ikam padahakan." ⁴ Balalu, Pilatus bapadah lawan imam kapala wan urang banyak, "Aku kada manamuakan kasalahan lawan urang ini." ⁵ Akan tatapi, buhannya manuntut sambil bakuciak lawan karas, "Sidin manghasut urang-urang lawan ajaran-Nya di sabarataan wilayah Yudea mulai matan Galilea sampai disini!" Yesus Dibawa Manuju Herodes ⁶ Wayah Pilatus mandangar hal itu, inya batakun apakah Yesus urang Galilea. ⁷ Wan, imbah inya tahu bahwa Yesus ba asal matan wilayah kakuasaan Herodes, Pilatus pun mangirim Yesus ka wadah Herodes nang wayah itu rahatan ba ada di kuta Yerusalem. ⁸ Wayah Herodees maliati Yesus, inya himung banar. Inya hudah lawas handak tatamu lawan Sidin sabab inya hudah mandangar banyak hal tentang Yesus sabab inya baharap kawa malihat suatu mujizat nang di lakuakan ulih Yesus. ⁹ Lalu Herodes mangajuakan banyak partanyaan lawan Yesus, tatapi Yesus kada mambarii jawaban apa pun lawan inya. ¹⁰ Imam-imam kapala wan ahli-ahli Taurat nang bardiri disana manuduh Yesus liwar sengitnya. ¹¹ Bahkan, Herodes wan buhan tantaranya juga marandahakan wan maejek Yesus. Imbah tu, buhannya mamakaiakan jubah nang bungas lalu mangirim-Nya pulang lawan Pilatus. ¹² Bahari, Pilatus wan Herodes bamusuhan, tatapi wayah hari itu buhannya bakawan. Pilatus Gagal Mambibasakan Yesus ¹³ Balalu, Pilatus mangumpulakan imam-imam kapala, buhan pamimpin Yahudi, wan urang banyak, ¹⁴ Lalu baucap lawan buhannya, "Ikam mambawa urang ini lawan aku sabagai saikung urang nang manyasatakan urang banyak. Akan tatapi, wayah aku mangadili-Nya di hadapan ikam, aku kada manamuakan kasalahan nang kaya ikam tuduhakan lawan Sidin. ¹⁵ Herodes jua kada manamuakan kasalahan-Nya sahingga inya mangirim urang ini bulik lawan kita. Liati, Sidin kada malakuakan kasalahan nang layak mandapatakan hukuman mati' ¹⁶ Lantaran itu, imbah aku manghajar-Nya, aku pacangan malapasakan-Nya." ¹⁷ ( Wayah satiap hari raya Paskah, Pilatus musti mambibasakan saikung urang tahanan gasan urang banyak.) ¹⁸ Akan tatapi, urang banyak itu baimbai bakuciak, "Singkirakan urang ini! Lapasakan Barabas gasan kami!" ¹⁹ [ Barabas adalah saikung urang nang di panjara sabab tarlibat pambaruntakan di kuta wan jua malakuakan pambunuhan.] ²⁰ Lantaran Pilatus handak malapasakan Yesus, maka sakali pulang inya bapander lawan urang banyak. ²¹ Akan tatapi, buhannya tatap bakuciak, "Salibpakan Dia! Salibpakan Dia!" ²² Gasan katalu kalinya Pilatus batakun lawan buhannya, "Kanapa? Kajahatan apa nang hudah dilakuakan Urang ini? Sidin kada barsalah. Aku kada manamuakan kasalahan apa-apa intang Sidin nang layak mandapatakan hukuman mati. Lantaran itu, aku pacangan manghajar-Nya balalu malapasakan-Nya." ²³ Namun, buhanya tarus bakaras wan manuntut lawan suara nyaring supsya Yesus disalibpakan. Wan, suara buhannya pun manang. ²⁴ Akhirnya, Pilatus mamutusakan gasan mamanuhi tuntutannya buhannya. ²⁵ Ia mambibasakan urang nang diminta ulih urang banyak, nang di panjara lantara malakuakan pambaruntakan wan pambunuhan. Akan tatapi, manyarahakan Yesus lawan kahandak buhannya. Panyaliban Yesus ²⁶ Wayah buhan tantara mambawa Yesus tulak, buhannya jua manahan saikung urang, yaitu Simon matan Kirene nang hanyar haja datang matan disa. buhan tantara maandak salib Yesus ka pundak inya wan manyuruhnya mamikul salib itu di balakang Yesus. ²⁷ Banyak urang nang maumpati Yesus, wan diantara buhannya ada binian-binian nang manangisi wan maratapi Sidin. ²⁸ Akan tatapi, Yesus manoleh lawan buhannya wan baucap, "Hai putri-putri Yeruslem, kada usah ikam manangisi Aku. Tangisilah diri ikam saurang wan anak-anak ikam. ²⁹ Pacangan sampai waktunya wayah urang-urang pacangan baucap, 'Barbahagialah babinian nang mandul, wan nang rahimnya kada suah malahirakan anak, wan nang payudaranya kada suah manyusui." ³⁰ Wayah itu buhannya pacangan baucap lawan gunung-gunung, "Runtuhlah ka atas kami!" wan lawan bukit-bukit, "Timbun haja kami!" ³¹ Sabab, pabila buhannya malakuakan hal-hal ini wayah puhun masih hidup, apa garang nang pacangan tarjadi wayah puhun itu karing?" ³² Ada jua dua ikung panjahat nang dibawa gasan dihukum mati baimbai lawan Yesus. ³³ Wayah buhanya sampai diwadah nang bangaran "Tangkurak" buhan tantara manyalibpakan Yesus baimbai lawan kadua panjahat itu, saikung disubalah kanan-Nya wan saikung pulang disubalah kiri-Nya ³⁴ Balalu Yesus baucap, "Ya Bapa, ampunilah buhannya, sabab buhannya kada tahu apa nang buhannya lakuakan." Lalu buhan tantara malimpar undi gasan mambagi-bagi pakaian-Nya di antara bubuhannya ³⁵ Urang banyak nang bardirian disana manyaksiakan sabarataanya, tatapi buhan pamimpin Yahudi maulu-ulu Yesus sambil tartawa mahulut. Buhanyya baucap, Sidin manyalamatan urang lain, jadi biarakan haja Sidin manyalamatakan diri-Nya saurang pabila Sidin adalah Kristus, Nang Dipilih ulih Allah!" ^{38 36} Buhan tantara jua mahulut-hulut Sidin, lalu buhannya manawarakan anggur asam lawan Sidin, ³⁷ wan baucap, "Pabila Pian Raja Urang Yahudi, salamatakan lah diri Pian saurang!" V 38 Wan, ada jua tulisan di atas Sidin: "INILAH RAJA URANG YAHUDI." ³⁹ Salah saikung panjahat nang tagantung disana mahulut Yesus, ujarnya,"Kadakah Pian ini Kristus? Salamatanlah diri Pian wan kami!" ⁴⁰ Akan tatapi, panjahat nang lainnya managur inya wan ba ucap, "Kadakah ikam takut lawan Allah lantaran ikam jua manarima hukuman nang sama? ⁴¹ Kita memang hudah samastinya manarima satimpal lawan apa nang hudah kita gawi, tatapi Urang ini kada malakuakan kasalahan apa pun." ⁴² Lalu, inya baucap lawan Yesus, "Ya Yesus, ingatlah aku wayah Pian masuk ka dalam karajaan Pian." ⁴³ Balalu Yesus baucap lawan inya, "Aku bapadah nang sasungguhnya lawan ikam, hari ini jua ikam pacangan baimbai lawan Aku di dalam Firdaus." Kamatian Yesus ⁴⁴ Wayah itu sakitar pukul 12 siang, kagalapan manutupi saluruh daerah itu sampai pukul 3 sure, ⁴⁵ Lantaran matahari manjadi galap wan tirai dalam Bait Allah rabit manjadi dua bahagian. ⁴⁶ Lalu Yesus nyaring bakuciak, "Ya Bapa, kadalam tangan Pian Kusarahakan nyawa-Ku." Imbah baucap kayaitu, Yesus manghambusakan nafas-Nya nang tarakhir. ⁴⁷ Wayah kapala pasuksn malihat apa nang hudah tarjadi, inya mamuliakan Allah wan baucap, "Sungguh, Urang ini kada basalah!" ⁴⁸ Wayah urang banyak nang datang baimbaian gasan malihat paristiwa itu manyaksiakan apa nang tarjadi, buhannya bulik sambil mancatuki dada buhanya saurang. ⁴⁹ Sabarataan urang nang pinandu lawan Yesus wan babarapa binian nang hudah maumpati-Nya matan Galilea bardirian jauh-jauh wan manyaksiakan hal-hal ini. Yesus Dikuburakan ⁵⁰ Ada saikung urang lalakian nang bangaran Yusuf, angguta Diwan Panasihat, saikung urang nang baik wan bujur. ⁵¹ [ Inya saurang kada manyutujui kaputusan wan tindakan buhannya ]. Yusuf baasal matan kuta Arimatea, sabuah kuta urang Yahudi. Inya jua saikung urang nang mananti-nantiakan Karajaan Allah ⁵² Inya tulak ka Pilatus wan maminta mayat Yesus. ⁵³ Lalu inyapun manurunakan mayat Yesus matan kayu salib wan mambungkusnya lawan kain linen. Imbah tu, inya mambaringgakan-Nya dalam kubur nang di pahat pada bukit batu.Di sana, balum suah ada saikung urang pun nang dibaringakan. ⁵⁴ Hari itu adalah Hari Parsiapan, wan hari Sabat pacangan lakas dimulai. ⁵⁵ Binian-binian nang datang baimbai Yesus matan Galilea maumpati Yusuf. Buhanya malihati kubur itu wan malihat jua nang kaya apa mayat Yesus dibaringakan di dalamnya. ⁵⁶ Imbah tu, buhannya bulik wan mamparsiapakan rampah-rampah lawan minyak gasan mangasai mayat Yesus. Wayah hari Sabat buhannya baistirahat sasuai lawan hukum Taurat Musa.