Kabar Kabangkitan Yesus ¹ Wayah hari partama minggu itu, Wayah hari masih baisukan banar, binian-binian itu tulak ka kubur Yesus sambil mambawa rampah-rampah nang hudah buhannya parsiapakan. ² Wan buhannya mandapati batu nang ganal itu hudah taguling matan kubur. ³ Akan tatapi, wayah buhannya masuk, buhannya kada manamuakan mayat Tuhan Yesus. ⁴ Wayah buhannya masih tahiran-hiran lantaran hal itu, tiba-tiba ada dua ikung urang nang mamakai pakaian nang bakilau-kilauan bardiri di samping buhannya. ⁵ Binian-binian itu liwar katakutanan wan manundukakan muha buhannya, tatapi kadua urang itu bapadah,"Baapa ikam mancarii urang nang hidup diantara urang-urang nang mati? ⁶ Yesus kadada di sini, Sidin hudah bangkit. Ingatlah tentang apa nang hudah dipadahakan-Nya lawan ikam wayah Sidin masih di Galilea. ⁷ Sidin bapadah bahwa Anak Manusia musti disarahakan ka tangan urang-urang bardusa, disalibakan, wan pacangan bangkit pulang wayah hari ka talu." ⁸ Maka, binian-binian itu kaingatan lawan apa nang hudah dipadahakan Yesus. ⁹ Imbah buhannya bulik matan kubur Yesus, buhannya mangesahakan sabarataan paristiwa itu lawan kasabalas rasul wan buhan pangikut Yesus nang lainnya. ¹⁰ Binian-binian nang mangesahakan hal itu lawan buhan rasul adalah Maria Magdalena, Yohana, Maria ibu Yakobus, wan babarapa babinian nang lainya. ¹¹ Akan tatapi, pamanderan binian-binian itu dianggap omong kosong oleh buhan rasul wan buhannya kada parcaya lawan buhan binian itu. ¹² Akan tatapi, Petrus bardiri wan bukah ka kubur Yesus. Inya mambungkuk wan malihat kadalam, tatapi inya katiya manamuakan kain linan pambungkus mayat haja. Imbah tu Petrus bulik wan liwar hiran atas apa nang hudah tarjadi. Yesus Manampakakan Diri lawan Pengikut-Nya di Jalan ka arah Emaus ¹³ Pas hari itu jua, 2 urang pangikutnYesus tulak ka kampung bangaran Emaus nang jaraknya kakira 60 stadia matan kota Yerusalem. ¹⁴ Kadua urang itu mamanderakan masalah paristiwa nang sudah tajadi. ¹⁵ Pas buhannya rahat bapanderan wan batukar pikiran, Yesus sorang datang mamaraki wan bajalan baimbai buhannya. ¹⁶ Akan tatapi, mata buhannya tahalang shingga buhannya kada pinandu lawan Sidin. ¹⁷ Yesus baucap wan buhannya, " Apa nang ikam badua panderakan sambil bajalan?" Kadua urang itu batahan wan muha buhannya kalihatan sadih banar. ¹⁸ Salah saurang dari buhannya nang bangaran Kleopas baucap wan-Sidin, "Apa Pian saikungan haja urang asing di Yerusalem nang kada tahu habar masalah apa nang sudah tajadi di sana hanyar-hanyar ini?" ¹⁹ Yesus baucap, "Masalah apa garang?" Buhannya baucap wan Sidin, "Masalah Yesus matan Nazaret. Sidin adalah saurang nabi nang bakuasa dalam panderan atawa perbuatan di hadapan Allah wan di hadapan saluruh bangsa kami. ²⁰ Akan tatapi, imam-imam kapala wan pamimpin kami manyarahakan Sidin supaya dihukum mati, wan buhannya manyalibakan-Sidin. ²¹ Sabujurnya kami baharap bahwa Sidinlah nang cagar mambibasakan bangsa Israel. Tatapi, hari ini adalah hari katalu imbah sabarataan itu tarjadi. ²² Akan tatapi, beberapa babinian dari antara kami udah maulah kami takajut. Pas buhannya bisukan banar mandatangi kuburan, ²³ buhannya kada mananui jenazah Yesus. Balalu, buhannya babulik wan mamadahakan bahwa buhannya malihat panampakan malaikat-malaikat, nang mamadahakan bahwa Sidin hidup. ²⁴ Imah itu, babarapa dari kami tulak ka kuburan babalu manamui nangkaya sudah dipadahakan uleh buhan babinian itu. Akan tatapi, buhannya kada malihat Yesus." ²⁵ Imbah itu Yesus baucap wan buhannya, "Oh, dasar bungulnya buhan ikam ni wan lambatnya paham mamparcayai sabarataan nang sudah dipadahakan uleh buhan nabi. ²⁶ Kadakah Kristus harus manjalani pandaritaan itu balalu masuk ka dalam kamuliaan-Nya." ²⁷ Imbah itu, Yesus manjalasakan sabarataan nang tatulis intang saluruh Kitab Suci masalah Inya-sorang, mulai matan Kitab Musa sampai ka saluruh kitab buhan nabi. ²⁸ Pas buhannya sudah parak ka kampung Emaus, Yesus tarus bajalan saulah-ulah handak manarusakan parjalanan-Sidin. ²⁹ Akan tatapi, buhannya manahan Sidin wan baucap, "Tinggal haja lawan kami sabab hari sudah parak malam wan matahari parak tinggalam." Maka, Yesus masuk bamalam lawan buhannya. ³⁰ Rahat Sidin makan baimbai buhannya di meja makan, Yesus maambil ruti wan mambarkahinya. Sidin mamacah-macahakannya, balalu mambariakan wan buhannya. ³¹ Wayah itu jua, mata buhannya tabuka balalu buhannya kawa minandui Yesus. Tatapi, bakajutan Yesus bahilang dari hadapan buhannya. ³² Imbah itu, baucap ai buhannya badua, "marasalah hati kita badaguban rahat Sidin bapander lawan kita salawas dalam parjalanan wan rahat Sidin manjalasakan Kitab Suci gasan kita?" ³³ Pas wayah itu jua, buhannya badiri balalu bulik ka Yerusalem. Buhannya manamui kasawalas murid wan urang-urang nang ada lawan buhannya nang rahat baimbai takumpul . ³⁴ Murid-murid itu baucap wan buhan badua, "Tuhan bujur-bujur sudah bangkit wan sudah manampaiakan awaknya ka Simon!" ³⁵ Kadua pangikut itu mangesahakan jua apa nang tarjadi intang pajalanan buhannya. Buhannya mangesahakan nangkaya apa buhannya pinandu lawan Yesus imbah Sidin mamacahakan ruti. Yesus Manampaiakan Diri ka Pangikut-Pangikut-Sidin ³⁶ Rahat kadua urang itu masih mangesahakan paristiwa itu, Yesus badiri di tangah-tangah buhannya wan baucap, "Damai mairingi buhan ikam." ³⁷ Akan tatapi, buhannya takajut wan takutan. Buhannya manyangka bahwa buhannya rahat malihat hantu. ³⁸ Imbah itu, Yesus baucap wan buhannya, "Kanapa ikam takajut wan ragu muncul di hati buhan ikam? ³⁹ Itihi tangan-Ku wan batis-Ku. Ini bujur-bujur Aku. japai aja wan itihi, hantu kada baisi daging wan tulang nangkaya nang ikam lihat wan-Aku." ⁴⁰ Imbah Yesus baucap kaya itu, Sidin manampaiakan tangan wan batis-Sidin ka buhannya. ⁴¹ Samantara buhannya masih balum parcaya lantaran himung wan taheran-heran, Yesus batakun wan buhannya, "Adakah disini buhan ikam baisi sasuatu nang gasan dimakan?" ⁴² Balalu buhannya mambari Sidin sapanggal iwak panggang. ⁴³ Yesus maabil iwak itu wan mamakannya dihadapan bubuhannya. ⁴⁴ Imbah itu, Yesus baucap wan buhannya, "Inilah panderan nang Aku padahakan lawan buhan ikam rahat Aku masih ada lawan ikam samalam. Sagala sasuatu nang tatulis hal Aku dalam hukum Taurat Musa, kitab buhan nabi, wan Mazmur harus taganapi." ⁴⁵ Imbah itu Yesus mambuka pikiran buhannya sahingga buhannya kawa mamahami Kitab Suci. ⁴⁶ Yesus baucap lagi wan buhannya, "Ada tatulis bahwa Kristus harus mandarita wan bangkit dari antara urang mati pas hari nang katalu. ⁴⁷ Wan, patobatan wan pangampunan dosa pacangan dinyataakan dlam ngaran-Sidin gasan sabarataan bangsa, mulai Yerusalem. ⁴⁸ Ikam adalah saksi-saksi dari samuaan ini. ⁴⁹ Ingati, Aku cagar mangirim janji Allah Bapa-Ku wan ikam, Akan tatapi, badiam haja di Yerusalem sampai ikam dilangkapi uleh kuasa dari Allah." Yesus Taangkat ka Surga ⁵⁰ Imbah itu, Yesus mambawai pangikut Sidin ka luar kota sampai di Betania. Di sana, Sidin mangangkat tangan-Sidin balalu mambarkahi buhannya. ⁵¹ Rahat Yesus mambarkahi buhannya, Sidin bapisah matan buhannya wan taangkat ka surga. ⁵² Balalu, buhannya manyambah Sidin imbah itu babulik ka Yerusalem wan himung banar. ⁵³ Buhannya salalu ada di dalam bait Allah wan salalu mamuji Allah.