Rancana gasan Mambunuh Yesus ¹ Hari Raya Roti kada Baragi nang disambat hari Paskah hudah parak. ² Imam-imam kapala wan ahli-ahki taurat mancari cara gasan mamnunuh Yesus, sabab buhannya takut lawan urang banyak. Panghianatan Yudas ³ Balalu, masuklah Sitan kadalam Yudas, nang disambat Iskariot. Inya adalah salah saikung matan kadua walas murid. ⁴ Maka, tulaklah Yudas imbah tu barunding lawan imam-imam kapala wan pangawal Bait Allah tentang nangkaya apa inya kawa manyarahakan Yesus lawan buhanya. ⁵ Wan, buhannya katuju banar wan sapakat gasan mambarii inya duit. ⁶ Maka, Yudas satuju wan mulai bacari kasampatan gasan manyarahakan Yesus lawan buhannya wayah kadada urang banyak. Hidangan Paskah ⁷ Balalu, sampailah hari raya Ruti Kada Baragi. itulah wayah mamparsambahakan dumba Paskah. ⁸ Wayah itu, Yesus manyuruh Petrus wan Yohanes, ujar-Sidin, "Tulaklah wan parsiapakanlah makanan Paskah gasan kita makan." ⁹ Ujar buhanya lawan Yesus, "Di mana garang Pian handak supaya kami mamparsiapakanya?" ¹⁰ Jawab Yesus lawan buhannya, "Wayah ikam udah masuk ka kuta, ikam pacangan tetamu lawan saikung urang lalakian nang mambawa kendi; umpatilah inya ka rumah nang pacangan dimasukinya. ¹¹ wan padahakanlah lawan nang ampun rumah itu, 'Guru batakun lawan ikam; Dimanakah di ruang tamu wadah Aku kawa makan Paskah baimbai murid-murid-Ku?" ¹² Maka, inya pacangan manunjukakan lawan ikam sabuah ruangan ganal dilantai atas, nang parabutannya hudah siap. Parsiapakanlah makanan gasan kita disana." ¹³ Balalu Petrus lawan Yohanes tulak wan mandapati sabarataan tarjadi nangkaya nang dipadahakan Yesus wan buhannya pun mamparsiapakan makanan Paskah. Parjamuan Paskah ¹⁴ Wayah hudah sampai waktunya, Yesus wan buhan rasul duduk makan di sakaliling mija. ¹⁵ Balalu, Yesus baucap lawan buhannya, "Aku handak banar makan hidangan Paskah ini baimbai ikam, sabalum Aku mandarita. ¹⁶ Sabab Aku bapadah lawan ikam, Aku kada pacangan memakanya pulang sampai hal ini diganapi dalam Karajaan Allah." ¹⁷ Balalu, Yesus maambil cangkir nang baisi anggur wan maucap syukur, balalu baucap, "Ambillah cangkir ini wan bagiakanlah di antara ikam. ¹⁸ Sabab, Aku bapadah lawan ikam bahwa mulai wayahini Aku kada pacangan minum anggur sampai Karajaan Allah datang." ¹⁹ Balalu, Yesus ma ambil ruti wan maucap syukur, Sidin mamotung-mutung ruti itu wan mambariakannya lawan buhannya sambil baucap, "Ruti ini adalah awak-Ku nang dibariakan lawan ikam; lakuakanlah ini sabagai paringatan lawan Aku, " ²⁰ Damikian juga, imbah makan, Yesus ma ambil cangkir anngur wan baucap, "Cangkir nang dituangakan gasan ikam ini adalah Parjanjian Baru dalam darah-Ku. pambaritahuan tentang Urang nang Manyarahakan Yesus ²¹ Akan tatapi, lihatlah, tangan urang nang pacangan manyarahakan Aku ada baimbai lawan Aku di mija ini. ²² Sabab, Anak Manusia pacangan tulak lawan cara nangkaya hudah di tatapakan, tatapi calakalah urang nang manyarahakan Dia!" ²³ Murid-murid-Nya batakun saikung lawan nang lain tentang siapa diantara buhannya nang pacangan malakuakannya. Jadilah Urang nang Malayani ²⁴ Buhan rasul bahual tentang masalah siapa di antara buhannya nang di anggap paling ganal. ²⁵ Akan tatapi, Yesus baucap lawan buhannya, "Raja-raja bangsa nang kada pinandu lawan Tuhan bakuasa atas rakyatnya, wan urang-urang nang bakuasa atas raja-raja itu disambat "Pelindung Rakyat." ²⁶ Namun, ikam kada usah nangkaya itu. Sabaliknya, nang paling ganal diantara ikam musti bakalakuan nang kaya nang paling anum, wan pamimpin musti nang kaya palayan. ²⁷ Siapa nang labih ganal, urang nang duduk makan atawa nang malayani? Kada garang urang nang duduk makan?Namun, Aku ada di tangah-tangah ikam wan melayani. ²⁸ Ikam adalah urang-urang nang tatap baimbai lawan Aku pas rahatan Aku dicobai. ²⁹ Lantaran itu, Aku mambariakan lawan ikam sabuah karajaan, nang kaya dibariakan Bapa-Ku lawan Aku, ³⁰ supaya ikam kawa makan wan nginum samija lawan Aku didalam karajaan-Ku. Wan, ikam pacangan duduk diatas tahta gasan manghakimi kadua walas suku Israel." Petrus pacangan Manyangkali Yesus ³¹ "Simon, simon, dangarakan Aku. Sitan manuntut gasan manampi ikam nang kaya gandum, ³² tatapi Aku hudah badoa gasan ikam supaya imanmu jangan gugur. Wan, imbah ikam bartubat, kuatakanlah dingsanak-dingsanak ikam." ³³ Namun, Petrus baucap lawan Yesus, "Tuhan, aku siap dipanjara bahkan mati baimbai lawan Pian!" ³⁴ Jawab Yesus lawan inya, "Aku bapadah lawan ikam, Petrus, hari ini ayam jago kada pacangan bakokok sabalum talu kali ikam manyangkal Aku." Basiap-siaplah Manghadapi Kasulitan ³⁵ Balalu, Yesus batakun lawan buhan murid. "Wayah Aku mangutus ikam tanpa kantong duit, tas, atawa sandal, apakah ikam ada kakurangan sasuatu?" Jawab buhannya, "Kada." ³⁶ Kata-Nya lawan buhannya, "Namun wayahini, siapa haja nang baisi kantong duit atawa tas, bawa haja. Wan, siapa nang kada baisi mandau, biar haja inya manjual jubahnya wan manukar mandau. ³⁷ Sabab, Aku baucap lawan ikam bahwa apa nang tatulis dalam Kitab Suci ini musti di ganapi didalam Aku, "Ia pacangan tahitung baimbai urang-urang badosa. "Yesaya 52 : 12 Sabab, nang tatulis tentang Aku rahatan tarjadi wayahini." ³⁸ Lalu buhanya baucap, "Lihatlah Tuhan, disini ada dua mandau." Wan, Yesus baucap lawan buhannya, "Itu cukup." Yesus Badoa di Taman Getsemani ³⁹ Balalu, yesus kaluar wan tulak kabukit Zaitun nang kaya biasa dilakuakan Sidin; wan murid-murid-Nya juga tulak maumpati Sidin. ⁴⁰ Wayah Yesus sampai diwadah itu, Sidin baucap lawan bubuhannya, "Badoalah supaya ikam jangan masuk kadalam pancubaan." ⁴¹ Balalu, Yesus manjauhakan diri matan buhannya kira-kira sajauh sapalimparan batu, lalu basujud wan badoa, ⁴² "Bapa, pabila Pian handak, ambillah cawan ini matan Aku, Akan tatapi, janganlah kahandak-Ku nang jadi, malainakan kahandak-Mu." ⁴³ Imbah tu, saikung urang malaikat matan surga manampakakan diri lawan Sidin wan manguatakan-Nya. ⁴⁴ Wan, dalam pandaritaan-Nya, Ia badoa labih sungguh-sungguh pulang; karingat- Sidin manjadi nangkaya tetesan darah nang manetes ka tanah. ⁴⁵ Wayah Yesus tuntung badoa, Sidin tulak kawadah murid-murid-Nya wan mandapati buhanya rahatan guring sabab sadih banar. ⁴⁶ Yesus baucap lawan bubuhannya, "Baapa ikam guring? Bangun wan badoalah supaya ikam jangan masuk ka dalam pancubaan." Panangkapan Yesus ⁴⁷ Wayah Yesus masih bapander, datanglah sarumbungan urang; wan inya nang disambat Yudas, salah saikung matan kadua walas murid itu, mamimpin buhannya. Lalu, Yudas memaraki Yesus gasan mancium-Nya. ⁴⁸ Akan tatapi, Yesus baucap lawan inya, "Yudas, apa garang ikam manyarahakan Anak Manusia lawan ciuman?" ⁴⁹ Wayah murid-murid nang badiri di sakaliling-Nya malihat apa nang pacangan tarjadi, buhannya bapadah, "Tuhan, mustikah kami manyarang lawan mandau?" ⁵⁰ Balalu, salah saikung matan buhan murid itu manyarang palayan Imam Agung wan manabas talinga kanannya. ⁵¹ Akan tatapi Yesus baucap, "Sudah cuckup!" Lalu, Yesus manjamah talinga palayan itu wan manyambuhakannya. ⁵² Balalu, Yesus baucap lawan imam-imam kapala, kapala pangawal Bait Allah, wan tua-tua nang datang gasan manangkap-Nya, "Baapa ikam sabarataan datang lawan mandau wan pantungan saakan-akan handak manangkap parampok? ⁵³ Wayah Aku baimbai ikam di Bait Allah saban hari, ikam kada manangkap Aku. Namun inilah wayahnya gasan ikam wan gasan kuasa kagalapan." Petrus Manyangkali Yesus ⁵⁴ Imbah manangkap Sidin, urang-urang itupun maarak wan mambawa Yesus ka rumah imam ganal. Akan tatapi, Petrus maumpati buhannya matan jauh. ⁵⁵ Wan, imbah urang-urang itu manyalaakan api ditangah-tangah halaman wan duduk baimbai, Petrus jua duduk diantara bubuhannya. ⁵⁶ Tatapi, saikung pelayan babinian nang malihat Petrus baduduk parak parapian itu maitihi muha Petrus balalu baucap, "Urang ini jua baimbai lawan Sidin." ⁵⁷ Tatapi, Petrus manyangkal, ujarnya, "Hai babinian, aku kada pinandu Sidin." ⁵⁸ Kada lawas imbah itu, nang lainnya malihat inya wan baucap, "Ikam jau tamasuk salah saurang matan buhannya!" Tatapi Petrus baucap, "Kada, aku kada tagabung lawan buhannya itu!" ⁵⁹ Kakira satu jam imbah itu, saikung nang lain pulang baucap wan yakin banar, "Pasti urang ini tagabung lawan-Sidin jua, sabab inya urang matan Galilea jua." ⁶⁰ Akan tatapi, Petrus baucap, "Aku kada tahu apa nang buhan ikam panderakan!" Rahat itu jua, salagi Petrus masih bapander, bakokoklah ayam jantan. ⁶¹ Balalu, bapaling ai Yesus mamandang Petrus. Wan, Petrus taingat nang Yesus panderakan, bahwa Sidin suah baucap lawan inya, "Sabalum ayam jantan bakokok hari ini, ikam sudah manyangkal Aku sabanyak tiga kali." ⁶² Imbah itu Petrus tulak kaluar wan manangis banar saking sadihnya. Panjaga Manganiaya Yesus ⁶³ Urang-urang nang manahan Yesus mulai mahulut wan mamukuli Sidin. ⁶⁴ Buhannya manutupi mata-Sidin wan baucap, 'Tangguh! Siapa nang mamukuli Pian?" ⁶⁵ Buhannya jua manyambat banyak lagi nang lain gasan manantang wan mahina Sidin. Yesus di Hadapan Pamimpin Yahudi ⁶⁶ Kaisukan harinya, tua-tua pamimpin Yahudi, imam-imam kapal, wan ahli-ahli Taurat bakumpul balalu ambawa Yesus ka Mahkamah Agama buhannya. ⁶⁷ Buhannya baucap, "Pabila Ikam adalah Mesias, padahakan wan kami," Tatapi Yesus baucap wan buhannya, "Pabila Aku bapadah wan buhan ikam, buhan ikam kada pacangan parcaya wan Aku. ⁶⁸ Wan pabila Aku batakun wan ikam, ikam kada pacangan manjawab. ⁶⁹ Akan tatapi, mulai wayah ini Anak Manusia cagar duduk di sabalah kanan Allah Yang Mahakuasa," ⁷⁰ Buhannya sabarataan baucap, ' Amun kayaitu, apakah Ikam Anak Allah?" Yesus manjawab buhannya, "Buhan ikam sorang nang manyambat bahwa Akulah-Sidin," ⁷¹ Imbah itu buhannya baucap, "Kasaksian apa lagi nang kita cari? Kita sudah mandangar saurang matan mulit-Nya!"