Parsambahan Saikung Urang Balu ¹ Wayah Yesus mamandang ka atas, Sidin malihat babarapa urang sugih mamasukakan parsambahan buhannya ka kutak parsambahan. ² Sidin jua malihat saikung urang balu miskin mamasukakan 2 kaping duit tambaga. ³ Yesus baucap, "Aku bapadah nang sasungguhnya lawan ikam, balu miskin ini mambariakan labih banyak matan pada sabarataan urang sugih itu. ⁴ Sabab, buhannya mambari parsambahan matan kalabihan buhannya, tatapi balu ini mambari parsambahanya matan kakurangannya, yaitu sabartaan ampun inya gasan malanjutakan hidup." Tanda-Tanda Akhir Zaman ⁵ Wayah babarapa murid rahatan mamanderakan tentang Bait Allah nang dihiasi lawan batu-batu indah wan parsambahan-parsambahan, Yesus baucap, ⁶ "Akan tiba wayahnya, sabarataan nang ikam lihat ini pacangan dihancurakan. kadada satupun batu nang bardiri diatas batu nang lain nang kada pacangan dirobohakan." ⁷ Imbah itu, buhan murid batakun wan Sidin, " Guru, pabila hal nang itu cagar bakajadian? Wan apa garang ciri-cirinya pabila itu pacangan terjadi?" ⁸ Yesus manjawab, "Bahati-hati haja supaya ikam kada disasatakan sabab banyak urang nang cagar datang mamakai ngaran-Ku wan baucap, Akulah Sidin ,' wan 'waktunya sudah parak,' Jangan ikam maumpati buhannya. ⁹ Akan tatapi, pabila ikam mandangar hal peperangan wan pambaruntakan, jangan ikam takutan karena samuaan itu memang harus terjadi labih dahulu, tatapi panghabisannya kada cagar lakas datang." ¹⁰ Balalu Yesus baucap wan buhannya, "Bangsa cagar malawan bangsa wan karajaan pacangan bangkit malawan karajaan. ¹¹ Pacangan tajadi gempa bumi nang dasyat, bancana kalaparan, wan bamacam-macam panyakit dimana haja. Pacangan muncul paristiwa-paristiwa nang mengeriakan wan tanda-tanda nang ganal matan langit. ¹² Tatapi, sabalum sabarataan itu tajadi, urang-urang cagar manangkap wan manganiaya ikam. Buhannya cagar manyarahakan ikam ka sinagoge-sinagoge wan mamasukakan ikam ka dalam panjara-panjara. Buhannya cagar mambawa ikam jua mahadap buhan raja wan gubernur oleh lantaran ngaran-Ku. ¹³ Tatapi, hal ini cagar jadi kasampatan gasan ikam untuk basaksi. ¹⁴ Lantaran itu, taguhakan hati ikam supaya kada mamikirakan apa nang cagar ikam panderakan gasan mambela diri, ¹⁵ Sabab Aku cagar mambariakan kabijaksanaan wan ikam supaya kadada nang kawa malawan atawa ditantang uleh musuh-musuh ikam. ¹⁶ Ikam cagar dikhianati uleh kuitan ikam, dinsanak lalakian ikam, kaluarga ikam, wan kakawanan ikam, wan buhannya pacangan mambunuh babarapa urang diantara buhan ikam. ¹⁷ Ikam pacangan dimuari oleh sabarataan urang sabab ngaran-Ku. ¹⁸ Akan tatapi, kadak salambar rambut pun matan kapala ikam nang pacangan gugur. ¹⁹ Lawan kasabaran ikam, ikam pacangan baulih hidup." Pambaritahuan tentang Kahancuran Yerusalem ²⁰ Akan tetapi, wayah ikam malihat kuta Yerusalem dikapung uleh pasukan-pasuksn tantara,ikam pacangan tahu bahwa kahancurannta hudah parak. ²¹ Wayah itu urang-urang nang ada di wilayah Yudea musti malariakan diri ka pagunungan, urang-urang nang baada di dalam kuta musti tulak kaluar kuta, wan urang nang baada di disa-disa kada dibariakan masuk ke kuta Yerusalem. ²² Itulah hari-hari panghukuman supaya sabarataan hal nang hudah tatulis diganapi ²³ Cilakalah buhan babinian nang rahatan batianan wan manyusui wayah itu sabab pacangan tarjadi pandaritaan nang liwar banar di nagari ini, wan nang liwar banar lawan bangsa ini. ²⁴ buhannya pacangan dibunuh lawan mandau wan ditawan lawan bangsa-bangsa. Kuta Yerusalem pacangan di kuasai bangsa-bangsa asing sampai masa kajayaan bangsa-bangsa itu baampihan." Kadatangan Anak Manusia dalam Kamuliaan ²⁵ Pacangan ada tanda-tanda lawan matahari, bulan, wan bintang-bintang. Di bumi, bangsa-bangsa pacangan katakutan wan kabingungan ulih gamuruh lautan wan deru umbak. ²⁶ Urang-urang pacangan siup sabab katakutan wan manghadangi hal-hal nang pacangan tarjadi atas bumi ini sabab sabarataan kuasa nang ada di langit pacangan di guncangakan. ²⁷ Balalu, buhannya pacangan malihat Anak Manusia datang dalam awan lawan kuasa wan kamuliaan nang ganal. ²⁸ Apabila hal-hal ini mulai tarjadi, bardirilah wan angkatlah kapala ikam sabab wayah pambibasan ikam hudah parak." Parumpamaan Puhun Ara ²⁹ Balalu Yesus mangesahakan sabuah parumpamaan lawan buhannya; "Liati puhun ara wan sabarataan puhun nang lain. ³⁰ Apabila puhun itu manumbuhakan daun-daunnya, ikam pacangan paham wan tahu bahwa musim panas hudah parak. ³¹ Nang kaya itu jua pabila ikam malihat sabarataan itu tarjadi, ikam pacangan tahu bahwa Karajaan Allah hudah Parak. ³² Sasungguhnya Aku baucap lawan ikam, ganarasi ini kada pacangan mati sampai sabarataan hal ini terjadi. ³³ Langit wan bumi pacangan hilang, tetapi apa nang Aku panderakan kada pacangan hilang," Siap Sadialah Satiap Saat ³⁴ Baawas-awaslah agar hati ikam kada dihibaki lawan kahandak gasan bapista, bamabuk-mabukan, wan mangkhawatirakan hidup. Wan, hari itu pacangan datang ka ikam nang kaya parangkap. ³⁵ Sabab, hari itu pacangan datang ka atas sagala sasuatu nang badiam di atas saluruh panjuru bumi ini. ³⁶ Bajaga-jagalah satiap waktu wan titir badoa supaya ikam mandapatakan kakuatan gasan malapasakan diri matan sabarataan hal nang pacangan tarjadi itu wan gasan badiri di hadapan Anak Manusia." ³⁷ Wayah siang hari, Yesus maajar urang banyak di palataran Bait Allah, tatapi wayah malam hari Sidin maninggalakan kuta wan bamalam di Bukit Zaitun. ³⁸ Wan, pagi-pagi, sabarataan urang datang lawan Sidin di dalam Bait Suci gasan mandangarakan Sidin.