Partanyaan tentang kuasa Allah ¹ Wayah Yesus rahatan maajar urang banyak di Bait Allah wan manyampaikan Injil, imam-imam kapala wan ahli-ahli taurat baimbai lawan tua-tua datang lawan Sidin. ² Buhanya bapadah lawan Sidin, 'Padahakan lawan kami lawan kuasa apakah Pian malakuakan hal-hal ini? Atawa, siapa garang nang mambarii Pian kuasa ini?" ³ Yesus manjawab buhannya, "Aku handak batakun jua sabuting pertanyaan wan buhan ikam. Tolong jawab Aku, ⁴ dari mana garang asal baptisan Yohanes? Matan surga atawa matan manusia?" ⁵ Buhanya marundingakan hal nintu diantara buhannnya lawan baucap, "Pabila kita manjawab, "Matan surga," Sidin pacangan baucap, "Pabila kaya itu, baapa ikam kada parcaya lawan Yohanes?" ⁶ Akan tatapi, pabila kita bapadah, "Matan manusia," sabarataan urang pacangan marajam kita sampai mati sabab buhanya yakin bahwa Yohanes adalah saikung urang nabi." ⁷ Jadi, buhannyapun manjawab bahwa buhannya kada tahu matan mana babtisan itu baasal. ⁸ Balalu, Yesus baucap lawan bubuhannya, "Pabila kaya itu, Aku jua kada pacangan mambaritahukan ka ikam lawan kuasa apakah Aku malakuakan hal-hal ini." Parumpamaan tentang Buhan Panyewa Kabun Anggur ⁹ Balalu, Yesus mangesahakan parumpamaan ini lawan urang banyak, "Ada saikung urang nang mananami kabun anggur balalu manyiwaakan lawan babarapa urang patani, imbahtu tulak ka nagari nang jauh gasan waktu nang lawas. ¹⁰ Wayah sampai musim panen, inya manyuruhakan saikung urang palayannya tulak lawan patani-patani itu supaya buhanya mambariakan lawan inya sabahagian matan hasil panen kabun anggur itu. Akan tatapi, buhan patani itu manghambati palayan itu wan mangusirnya tulak lawan tangan kososng. ¹¹ Wan inyapun mangirim palayan nang lain, tatapi patani-patani itu jua manghambati palayan itu wan diparlakuakan lawan hina, balalu mangusirnya tulak lawan tangan kosong. ¹² Balalu, nang ampun kabun anggur itu mauutus palayan nang ka talu ka wadah buhan patani itu, tatapi patani-patani itu juga malukai palayan nang asa ini wan mangusirnya kaluar. ¹³ Nang ampun kabun anggur itu pun baucap, "Apa nang musti aku lakuakan? Aku pacangan mangirim anakku nang ku sayangi, bisa jadi buhanya manghurmatinya." ¹⁴ Wayah buhan patani itu malihat anak nang ampun kabun itu, buhanya barunding asa lawan lainnya, "Sidin adalah ahli waris nang ampun kabun anggur ini, Ayuk kita matii haja supaya warisannya manjadi ampun kita!" ¹⁵ Balalu, buhannya pun malimparakan anak itu ka luar matan kabun anggur wan mematiinya. Balalu, apa nang pacangan dilakuakan oleh nang ampun kabun itu lawan buhannya? ¹⁶ Sidin pacangan datang wan mambinasakan buhan patani-patani itu. Balalu, manyiwaakan kabunya lawan urang lain." Wayah urang banyak mandangar parumpamaan ini, buhannya baucap, "Janganlah hal ini sampai tarjadi!" ¹⁷ Akan tatapi, Yesus mancangangi buhannya wan baucap, "Pabila kayak itu, apa garang artinya ayat ini: "Batu nang dibuang lawan tukang bangunan hudah manjadi batu panjuru" Maz 118 : 22. ¹⁸ Satiap urang nang gugur ka atas batu itu pacangan hancur bakaping-kaping wan siapa haja nang diguguri batu itu pacangan ramuk!" ¹⁹ Wayah ahli-ahli Taurat wan buhan imam kapala manyadari bahwa parumpamaan itu bapander tentang buhannya, buhannya handak banar manangkap Yesus wayah itu jua. Akan tatapi, buhannya takutan lawan urang banyak. Partanyaan tentang Mambayar Pajak ²⁰ Balalu, buhan ahli Taurat maawasi Yesus wan mangirim babarapa urang mata-mata nang kesah tulus supaya buhannya kawa manjabak Yesus lawan partanyaan supaya buhannya kawa manangkap-Nya mamakai pamanderan Sidin saurang wan manyarahakan Sidin kadalam kuasa wan wewenang gubernur. ²¹ Urang-urang suruhan nintu pun batakun lawan Yesus, "Guru, kami tau bahwa Pian bapander wan mangajarakan nang bujur. Pian juga kada mambida-bidaakan urang, tatapi maajarakan jalan Allah dalam kabanaran. ²² Apakah kami kawa mambayar pajak lawan Kaisar atawa kada?" ²³ Akan tatapi, Yesus tahu banar kalicikan buhannya wan baucap lawan buhannya, ²⁴ Cuba tunjukakan lawan Aku sakaping dinar. Gambar wan tulisan siapa garang nang ada pada duit itu?" Jawab buhannya, "Gambar wan tulisan Kaisar." ²⁵ Maka, Yesus baucap lawan buhannya, "Pabila kaya itu, bariakanlah lawan Kaisar apa nang manjadi ampun Kaisar, wan bariakanlah lawan Allah apa nang manjadi ampun Allah." ²⁶ Dengan damikian, urang-urang itu kada kawa manjabak Yesus lawan pamanderan-Nya saurang dihadapan urang banyak; buhanya hiran atas jawaban Sidin wan tadiam. Partanyaan Urang Saduki ²⁷ Balalu, datanglah lawan Yesus babarapa urang Saduki, yaitu golongan nang kada mamparcayai adanya kabangkitan, wan batakun lawan Sidin, ²⁸ "Guru, Musa manulisakan gasan kita, pabila saikung urang lalakian maninggal, sadangkan inya baisi bini wan kada baisi anak, dingsanak lalakianya musti manikahi balu dingsanaknya itu wan mambangkitakan katurunan gasan inya. ²⁹ Nang kaya ini, ada tujuh urang badingsanak. Dingsanak nang paasa manikah, tatapi maninggal kada ba anak. ³⁰ Balalu, dingsanak nang ka dua manikahi binian itu wan maninggal jua tanpa baisi anak. ³¹ Wan, dingsanak nang ka talu manikahi binian itu wan hal ini tarjadi sampai dingsanak nang kapitu, tatapi buhannya sabarataan maninggal wan kadada nang baisi anak. ³² Wayah akhirnya, binian nintu jua maninggal. ³³ Marga itu, Wayah hari panghakiman, siapa garang nang pacangan manjadi laki matan binian itu sabab kapitu dingsanak itu hudah manikahinya?" ³⁴ Jawab Yesus lawan buhannya, "Urang-urang pada wayahini manikah wan dinikahakan, ³⁵ tatapi urang-urang nang dianggap pantas gasan mandapat bagian dalam dunia nang pacangan datang, wan dalam kabangkitan matan urang mati, kada pacangan manikah wan di nikahakan. ³⁶ Buhannya kada kawa mati pulang sabab buhanya sama lawan buhan malaikat. Buhannya adalah anak-anak Allah sabab buhannya hudah dibangkitakan matan kamatian. ³⁷ Musa bahkan hudah manunjukakan tentang kabangkitan urang-urang mati dalam bahagian nang mancatat tentang semak duri nang tabakar. dalam bahagian itu, Tuhan disambat sabagai "Allah Abraham, Allah Ishak, wan Allah Yakub." ³⁸ Ia kadanya Allah urang mati tatapi Allah urang nang hidup, sabab sabarataan urang hidup dihadapan- Sidin. ³⁹ Imbah itu, babarapa ahli Taurat baucap, "Guru, jawaban Pian tepat." ⁴⁰ Wan, kadada lagi urang nang wani maajuakan partanyaan lawan Sidin. Kristus adalah Tuhan. ⁴¹ Balalu, Yesus baucap lawan bubuhannya, "Nangkaya apa urang-urang kawa baucap bahwa Kristus adalah Anak Daud? ⁴² Padahal dalam kitab Mazmur, Daud saurang baucap, "Tuhan Allah baucap lawan Tuanku, "Duduklah di subalah kanan-Ku, ⁴³ sampai Aku manampatakan musuh-musuh-Pian dibawah kaki-Pian. "Mazmur 110 : 1. ⁴⁴ Pabila Daud manyambat Kristus sabagai "Tuan," nang kaya apa mungkin Kristus adalah anak Daud?" Paringatan gasan Bahati-hati tarhadap Ahli Taurat ⁴⁵ Wayah urang banyak mandangarakan, Yesus bapadah lawan murid-murid-Nya. ⁴⁶ "Bahati-hatilah tarhadap ahli-ahli Taurat nang katuju bajalan-jalan mamakai jubah panjang, katuju dihurmati urang dipasar, nang katuju baduduk di wadah nang paling tinggi di sinagoge-sinagoge, wan di wadah nang tarhurmat dipista-pista. ⁴⁷ Buhanya marampas rumah-rumah buhan balu wan badoa panjang-panjang supaya diliati urang. Urang-urang nang kaya ini pasti pacangan manarima hukuman nang labih barat."