Yesus wan Zakheus ¹ Balalu, masuklah Yesus lawan maliwati kota Yerikho. ² Disana ada saikung lalakian nang bangaran Zakheus, inya adalah kapala pangumpul pajak wan urang nang sugih ³ Inya bausaha handak malihat Yesus, tatapi kada kawa lantaran tahalang urang banyak; sabab awaknya handap. ⁴ Jadi, Zakheus bukah mandahului urang banyak balalu manaiki pohon ara supaya kawa malihat Yesus lantaran Sidin cagar maliwati jalan itu. ⁵ Imbah Yesus sampai di wadah Zakheus, Sidin manangadah wan baucap wan inya, "Zakheus, lakasi turun karena hari ini Aku harus manumpang di rumah ikam." ⁶ Balalu, Zakheus hancap turun wan manarima Yesus lawan himung banar. ⁷ Tatapi, imbah sabarataan urang malihat masalah itu, buhannya manggarunum wan baucap, "Sidin manjadi tamu di rumah urang nang badosa." ⁸ Imbah itu, Zakheus badiri wan baucap wan Yesus, "Tuhan, lihati, saparu matan harta ulun pacangan kubariakan wan urang miskin, wan pabila ulun udah maambil hak urang, aku cagar mambulikakan 4 kali lipat." ⁹ Balalu, Yesus baucap wan Zakheus, "Hari ini jua, kasalamatan udah datang ka dalam rumah ini sabab urang ini anak Abraham jua. ¹⁰ Sabab, Anak Manusia datang gasan mancari wan manyalamatakan nang hilang." Hamba nang Setia wan Hamba nang Jahat ¹¹ Samantara buhannya mandangarakan , Yesus manarusakan wan mangesahakan sabuah parumpamaan lantaran Sidin sudah parak lawan Yerusalem wan lantaran buhannya mangira bahwa Karajaan Allah pacangan lakas datang. ¹² Uleh sabab itu, Sidin baucap, "Ada saikung bangsawan tulak ka negeri nang jauh gasan diangkat manjadi raja, wan imbah itu inya pacangan bulik. ¹³ Balalu, tuan itu mangumpulakan sapuluh urang palayannya wan mambarii buhanya duit sabanyak sapuluh mina. Ujarnya lawan buhannya, "Badaganglah mamakai duit ini sampai aku bulik," ¹⁴ Akan tatapi, urang-urang sabangsanya muar lawan inya wan mangirimakan utusan imbah inya tulak gasan bapadah, "Kami kada hakun urang ini manjadi raja kami." ¹⁵ Imbah diangkat manjadi raja, bangsawan itu bulik wan mamarintahakan hamba-hamba nang hudah dibariinya duit itu dikiaunya supaya inya kawa menahui sabarapa ganal kauntungan nang buhannya dapatakan matan badagang. ¹⁶ Palayan nang paasa datang wan baucap, "Tuan, duit 1 mina ampun pian itu hudah manghasilakan10 mina pulang." ¹⁷ Raja itu baucap lawan inya, "Bagus banar, hai ikam hamba nang baik! Lantaran ikam satia lawan masalah nang halus, ikam pacangan mamarintah atas sapuluh kuta." ¹⁸ Palayan nang kadua pun datang wan bapadah, "Tuan, uang 1 mina ampun pian itu hudah manghasilakan 5 mina." ¹⁹ Balalu sang raja baucap lawan hamba itu, "Barkuasalah ikam atas 5 kuta." ²⁰ Balalu, datanglah hamba nang asa lagi wan bapadah, "Tuan, ini duit 1 mina ampun pian nang ulun simpan dalam saputangan ulun. ²¹ Ulun takutan lawan pian sabab pian urang nang harat. Pian maambil apa nang kada suah pian simpan wan mangatam apa nang kada suah pian tanam." ²² Balalu, raja itu bapadah lawan inya, "Aku pacangan mangadili sasuai lawan ucapan ikam sorang, hai ikam hamba nang jahat! Jadi, ikam tahu sorang, bahwa aku adaah urang nang harat, nang maambil apa nang kada suah kusimpan wan mangatam apa nang kada suah aku tanam? ²³ Amunya kaya itu, baapa ikam kada maandak duitku diwadah urang nang manjalanakan duit sahingga wayah aku bulik, aku pacangan manarima duitku itu sakalian lawan bunganya? ²⁴ Balalu, raja itu baucap lawan urang-urang nang badirian disitu, "Ambil mina itu matan inya wan bariakan lawan urang nang baisi 10 mina itu." ²⁵ Namun, buhanya baucap lawan sang raja, "Tuan, hamba iu hudah baisi 10 mina." ²⁶ Jawab raja itu, "Aku baucap lawan ikam, satiap urang nang baisi pacanga dibarii labih, tatapi matan urang nang kada baisi apa-apa, sabarataan ampun inya pacangan di ambil. ²⁷ Akan tatapi, masalah musuh-musuhku nang kada katuju aku manjadi raja atas buhanya, bawa buhanya kamari wan matii buhanya dihadapanku." Yesus Disambut Sabagai Raja ²⁸ Imbah Yesus maucapakan hal-hal itu, Sidin bajalan tarlabih badahulu manuju Yerusalem. ²⁹ Wayah sidin sampai diparak disa Betfage wan Betania, parak bukit nang bangaran Bukit Zaitun, Sidin mautus dua ikung urang murid-Nya. ³⁰ Sidin bapadah lawan bubuhannya, "Tulak haja ka disa nang ada di dapan itu. Wan, wayah ikam masuk kasana, ikam pacangan malihat saikung anak keledai nang tajarat wan balum suah di naiki urang. Lapasakan haja kanakan keledai itu wan bawa kamari. ³¹ Pabila ada urang nang batakun lawan ikam, "Baapa ikam mambawa keledai itu?" padah haja kaya ini; Tuhan mamarluakanya." ³² Balalu, tulaklah kadua murid nang diutus Sidin itu wan manamuakan sagala sasuatu nang kaya nang hudah dipadahakan Sidin lawan buhannya. ³³ Rahatan buhanyya malapasakan kanakan keledai itu, nang ampun keledai itu batakun lawan buhannya, "Baapa ikam malapas anak keledai itu?" ³⁴ Buhanya pun manjawab, "Tuhan mamarluakanya," ³⁵ Balalu, buhanya mambawa anak keledai itu lawan Yesus wan maandak pakaianya ka atas punggung keledai itu, balalu manaikakan Yesus kaatasnya. ³⁶ Wayah Yesus lalu di jalanan itu , urang-urang mambantangakan pakaian buhanya dijalan. ³⁷ Wan, wayah Yesus hudah semakin parak Yerusalemn, yaitu dijalan nang manurun matan arah bukit Zaitun, sabarataan nang maumpati-Nya mulai mamuji Allah lawan suka cita wan suara nang nyaring. Buhannya basukur lawam Allah atas sabarataan mukjizat nang hudah buhannya lihat. ³⁸ Buhannya bakuciak, "Dibarkahilah Ia nang datang sabagai Raja dalam ngaran Tuhan, damai sajahtara di surga wan kamuliaan di wadah nang maha tinggi!" Mazmur 118 ; 26 ³⁹ Babarapa urang Farisi matan karumunan urang banyak itu bapadah lawan Yesus, "Guru, tagurakan murid-murid pian." ⁴⁰ Akan tatapi, Yesus manjawab, "Aku bapadah lawan ikam, pabila bubuhanya badiam, batu-batu inilah nang pacangan bakuciak-kuciak." Yesus Manangisi Yerusalem ⁴¹ Wayah Yesus hudah parak ka kuta Yerusalem wan malihat kuta itu, Sidinpun managisinya. ⁴² Ujar Sidin, "Saandainya hari ini ikam tahu apa nang mandatangakan damai sajahtara gasan ikam. Akan tatapi, wayahini hal itu tasambunyi matan mata ikam. ⁴³ Sabab pacangan sampai saatnya wayah musuh-musuh ikam pacangan mambangun timbok panghalang disakaliling ikam wan mangapung ikam matan saabarataan arah. ⁴⁴ Buhanya pacangan maruntuhakan ikam, ikam lawan anak-anak ikam nang basambunyi di timbuk ikam. Wan, buhannya kada pacangan manyisaakan asa batupun tasusun di atas batu nang lain sabab ikam kada maminnandui kapan wayah Allah malawat ikam." Yesus Mangusir Urang-Urang nang Bajualan di Bait Allah ⁴⁵ Balalu, Yesus masuk ka Bait Allah wan mulai mangusir kaluar urang-urang nang bajualan di sana. ⁴⁶ Kata-Nya lawan bubuhannya, "Ada tatulis; Rumah-Ku pacangan manjadi rumah doa," tatapi ikam hudah manjadiakanya nang kaya sarang parampok!" ⁴⁷ Balalu, Yesus maajar di Bait Allah satiap hari. Namun, imam-imam kapala, ahli-ahli Taurat, wan buhan pamimpin bangsa itu mancari cara gasan mambunuh Yesus. ⁴⁸ Akan tatapi, buhanya kada tahu nang kaya apa malakuakannya sabab sabarataan urang kuat bapingkut lawan pamanderan Yesus.