Parumpamaan hal Hakim wan Balu ¹ Imbahitu, Yesus mangesahakan sabuting parumpamaan gasan murid-murid Sidin gasan mamadahakan buhannya bahwa buhannya musti badoa wan kada boleh hambar hati. ² Ujar-Sidin, "Di intang kota, ada saurang hakim nang kada takutan lawan Allah wan kada mahormati urang lain. ³ Intang kota itu, ada saikung balu nang tarus manarus datang wan hakim itu wan baucap, 'bariakan pang kaadilan gasan aku tahadap musuhku.' ⁴ Awalnya, si hakim kada hakun manolong balu itu. Tatapi, imbah itu hakim baucap dalam hatinya, 'Biar aku kada takutan wan Allah wan kada mahargai siapa haja, ⁵ Tatapi lantaran si balu ini sasar manggasakku, aku cagar mambariakan kaadilan gasan inya supaya inya kada mahauri aku lawan sasar mandatangi aku." ⁶ Balalu, Tuhan baucap, "Dangarakan apa nang dipadahakan hakim nang kada adil itu. ⁷ Kadalah Allah cagar mambariakan kaadilan gasan urang-urang pilihan-Sidin nang bakuciak wan-Sidin siang atawa malam? Apakah Sidin cagar maulur-ulur sampai lawas gasan manolong buhannya? ⁸ Aku bapadah wan ikam, Sidin cagar hancap mambariakan kadailan gasan buhannya. Tatapi, rahat Anak Manusia datang, apakah Sidin cagar tatamu iman di bumi?" Parumpamaan hal Urang Farisi wan Pangumpul Pajak ⁹ Yesus jua manyampaiakan parumpamaan ini wan babarapa urang nang maanggap diri inya bujur wan mamandang randah urang lain. ¹⁰ Ada dua urang tulak ka Bait Allah gasan badoa. Nang saikung adalah urang Farisi wan nang lain adalah urang nang mangumpulakan pajak. ¹¹ Urang Farisi itu badiri wan maucapakan doa masalah inya sorang, 'Ya Allah. aku batarimakasih wa Pian lantaran aku kada kaya urang lain; nangkaya marampok, manipu, bazina, atawa nangkaya pamukut pajak ini. ¹² Aku bapuasa dua kali saminggu, aku mambariakan sapersapuluh matan saluruh panghasilanku.' ¹³ Akan tatapi, si pangumpul pajak pina jauh bardiri, bahkan kada wani mamandang ka langit. Sabaliknya, inya mancatuk-catuki dadanya sambil baucap, "Ya, Allah. Berbelas kasihanlah lawan ulun, urang badusa ini." ¹⁴ Aku bapadah wan buhan ikam, pangumpul pajak ini bulik karumahinya manjadi urang nang labih baujur dari pada urng Farisi itu sabab urang nang maninggiakan diri cagar dirandahakan, wan urang nang marandahakan diri cagar ditinggiakan." Yesus wan Kakanakan ¹⁵ Balalu, urang-urang nang mambawa kakanakan nang masih halus manuju Yesus supaya Sidin mambarkati buhannya. Tatapi, rahat buhan murid malihatnya, buhannya mulai manyariki urang-urang itu. ¹⁶ Tatapi, Yesus mangiau kakanakan itu gasan datang wan Sidin balalu baucap, "Biarakan haja kakanakan halus itu mandatangi aku, jangan manangati buhannya sabab Karajaan Allah ampun urang-urang nangkaya buhannya ini. ¹⁷ Aku bapadah nang bujurhaja gasan buhanikam. Siapa haja nang kada manarima Karajaan Allah nangkaya kakanakan halus ini, inya kada pacangan masuk kadalamnya." Urang Sugih wan Karajaan Allah ¹⁸ Ada pamimpin buhannya nang batakun wan Yesus, "Guru nang baik, apa nang harus aku ulah supaya kawa mawarisi hidup kekal?" ¹⁹ Yesus manjawab inya, "Kanapa ikam manyambat Aku baik? Kadadak saikung ikung nang baik kacuali Allah sorangan. ²⁰ Ikam paham lawan hukum-hukum ini: 'Jangan bazina, jangan mambunuh, jangan mancuntan, jangan badusta wan hurmati kuitan ikam.''' ²¹ Urang itu manjawab, " Aku sudah mantaati itu sabarataan mulai matan aku masih anom." ²² Imbah Yesus mandangar inya bapander, Sidin baucap wan urang itu, "Masih ada satu hal nang kurang. Juali sabarataan harta ikam balalu bagiakan gasan urang miskin, maka ikam cagar baisi harta di surga; imbah itu hayu, umpat Aku." ²³ Imbah urang itu mandangar nang dipadahakan Yesus itu, inya manjadi sangat sedih lantaran inya sugih banar. ²⁴ Imbah itu yesus mamandang inya wan baucap, "Dasar ngalihnya buhan nang sugihni mun handak masuk ka karajaan Allah! ²⁵ Bahkan, labih mudah saikung unta masuk malalui lubang jarum daripada urang sugih masuk ka karajaan Allah." Pangikut Yesus cagar Manarima Hidup Kekal ²⁶ Urang-urang nang mandangar panderan itu baucap, "Amun kayaitu, siapa garang nang kawa disalamatakan?" ²⁷ Yesus manjawab, "Apa mustahil gasan manusia adalah mungkin gasan Allah." ²⁸ Imbah itu, Petrus baucap, "Itihi, kami sudah maninggalakan samuaan nang kami ampun wan maumpati Pian." ²⁹ Yesus bapadah wan buhannya, "Aku mamadahakan nang sabujurnya wan buhan ikam, kada saikung-ikung nang imbah maninggalakan rumahnya, bininya, dinsanaknya, kuitannya atawa anaknya demi karajaan Allah, ³⁰ nang kada manarima hal-hal itu balipat ganda intang wayahini, wan intang waktu nang cagar datang kena yaitu hidup nang kekal." Mamadahakan masalah Kamatian wan Kabangkitan Yesus ³¹ Imbah itu, Yesus mangumpulakan kadua walas murid-Sidin wan bapadah wan buhannya, "Dangarakan, kita cagar tulak ka Yerusalem wan sabarataan nang sudah ditulis oleh buhan nabi masalah Anak Manusia pacangan diganapi, ³² Inya cagar disarahakan ka urang-urang nang kada pinandu wan Allah. Inya pacangan dihulut, dianiaya, wan diludahi. ³³ Wan, imbah buhannya mancambuki-Nya, buhannya pacangan mambunuhi-Nya. Tatapi, pas hari nang ka talu, Inya cagar bangkit" ³⁴ Sakalinya, buhan murid kada paham saikung-ikungnya masalah itu, Arti nang dipanderakan itu tasambunyi gasan buhannya sahingga buhannya kada mamahami sama sakali apa nang sudah dipanderakan. Yesus Mawarasakan Urang Buta ³⁵ Pas rahat Yesus parak sampai di Kota Yerikho, ada saikung urang buta nang rahat duduk di pinggir jalan sambil mangamis. ³⁶ Rahat urang itu mandangar urang banyak lewat, inya manakunakan apa garang nang rahat tajadi. ³⁷ Wan, urang-urang bapadah waninya, "Yesus matan Nazaret rahat lewat." ³⁸ Balalu, bakuciak urang nang buta itu, "Yesus, Anak Daud, kasihani ulun!" ³⁹ Urang-urang nang bajalan di muka rombongan, manyariki urang buta itu wan manyuruh inya badiam. Tatapi, inya makin gancang bakuciak, "Anak Daud, kasihani ulun!" ⁴⁰ Balalu Yesus batahan wan manyuruhakan urang buta itu dibawa baparak-Sidin. Imbah urang buta itu baparak, Sidin batakun lawan inya, ⁴¹ "Apa garang nang ikam handak supaya Kuulahi gasan ikam?" Urang buta itu manjawab, "Tuhan, ulun handak supaya mata ulun kawa malihat." ⁴² Yesus baucap wan inya, "Malihatlah, iman ikam sudah manyalamatakan ikam." ⁴³ Rahat itu jua, inya kawa malihat wan mulai maumpati Yesus sambil mamuji Alah. Imbah urang banyak malihat kajadian itu, buhannya mamuji Allah jua.