Dosa wan Pangampunan ¹ Balalu Yesus bapadah lawan buhan murid-Nya, "Batu sandungan pasti pacangan ada, tatapi calakalah urang nang manyabapakanya. ² Labih baik sabuah batu kilangan di jaratakan pada gulunya wan inya di limparakan ka dalam laut matan pada inya maulah sandungan bagi kakanakan halus ini. ³ Waspadalah! Pabila dinsanak ikam baulah dosa wan ikam, tagur haja inya; Pabila inya manyasali dosanya, maafakan haja inya. ⁴ Bahkan,, pabila inya badosa wan ikam sabanyak tujuh kali dalam sahari, wan inya babulik wan ikam tujuh kali sambil baucap, 'Aku manyasal,' maafakan inya," Kuasa Iman ⁵ Ujar rasul-rasul itu wan Tuhan, "Tambahakan pang iman kami!" ⁶ Ujar Tuhan wan buhannya, "Pabila buhan ikam baisi iman ganalnya nangkaya biji sasawi haja, ikam kawa bapadah wan pohon murbei ini, 'Tajabutlah matan tanah wan tatanamlah di laut,' balalu pohon itu cagar taat wan ikam." Hamba nang Manaati Parintah Tuannya ⁷ "Siapahaja matan buhan ikam nang baisi hamba, nang rahat mambajak atawa manggambala, cagar baucap wan hambanya itu rahat inya bulik matan ladang, 'Hayu, baduduk wan makan'? ⁸ Kadalah inya pacangan baucap wan hambanya itu, 'Siapakan pang makan gasanku wan baju nang tabaik gasan malayani aku rahat pas aku makan wan minum. Imbah itu, hanyar inya buleh makan wan minum'? ⁹ Kakira inya pacangan batarima kasih garang wan hambanya itu lantaran udah maulah apa nang diparintahakannya? ¹⁰ Kayaitu jua wan ikam. Pabila ikam imbah maulah sabarataan nang diparintahakan wan ikam, hendaklah ikam bapadah, "Kami adalah hamba nang kada baharga. Kami hanya malakuakan apa nang wajib kami lakuakan." Sapuluh Urang Kusta Disambuhakan ¹¹ Dalam parjalanan-Nya manuju Yerusalem, Yesus manyusuri sapanjang parbatasan antara Samaria wan Galilea. ¹² Wayah masuk ka sabuah disa, Sidin tatamu lawan sapuluh urang kusta nang badirian jauh-jauh matan Sidin, ¹³ wan buhannya nyaring bakuciak, "Yesus, Guru, kasihanilah kami!" ¹⁴ Wayah Yesus malihati bubuhanya, Sidin bapadah lawan bubuhannya, "Tulaklah wan tunjukakan diri ikam lawan imam-imam." Wan, wayah buhanya dalam parjalanan, buhannya manjadi sambuh. ¹⁵ Wayah salah saikung matan buhannya itu malihat bahwa dirinya hudah sambuh, inya babulik wan mamuji Allah lawan suara nang nyaring. ¹⁶ Balalu basujud di hadapan batis Yesus wan batarimakasih lawan Sidin. Urang itu adalah saikung urang Samaria ¹⁷ Balalu Yesus pun bapadah lawan urang itu, "Kadakah ada sapuluh urang nang di sambuhakan tadi? dimana garang nang sambilan urang nang lain? ¹⁸ Kadadakah di antara buhanya nang babulik gasan mamuliakan Allah salain urang asing ini? ¹⁹ Wan Yesus pun bapadah lawan inya, "Bangun wan tulaklah, imanmu, hudah manyalamatakan ikam," Kadatangan Karajaan Allah ²⁰ Wayah ditakoni ulih bubuhan Farisi tentang kapan Karajaan Allah pacangan datang. Yesus manjawab buhanya wan baucap, "Karajaan Allah pacangan datang tanpa ada tanda-tanda nang kawa talihat, ²¹ kada pacangan ada urang nang baucap, "Lihati, Karajaan Allah ada di sini!" atawa "Karajaan Allah ada disana!" sabab sabujurnya Karajaan Allah itu ada ditangah-tangah ikam. ²² Balalu, yesus bapadah lawan murid-murid-Nya, "Pacangan sampai wayahnya ikam handak banar malihat asa hari matan pada hari-hari Anak Manusia, tatapi ikam kada kawa malihatnya. ²³ Urang-urang pacangan bapadah lawan ikam, 'lihat di sana!" atawa "Lihat di sini!" Akan tatapi, kada usah ikam tulak wan maumpati urang-urang itu." Kadatangan Anak Manusia ²⁴ sabab nang kaya kilat nang mamancar matan ujung langit nang asa ka ujung langit nang lain, nang kaya itu jua Anak Manusia wayah hari-hari- Nya. ²⁵ Akan tatapi, Anak Manusia musti mandarita banyak hal tarlabih badahulu wan di tolak matan ganarasi ini. ²⁶ Wan, nang kaya nang hudah tarjadi wayah hari-hari di zaman Nuh, nang kaya itu jua nanti pada wayah hari-hari Anak Manusia. ²⁷ Urang-urang makan wan nginum, manikah wan dinikahakan sampai wayah hari Nuh masuk kadalam bahtera wan datanglah banjir ganal balalu mambunuh buhannya sabarataan. ²⁸ Sama halnya nang bakajadian intang zaman Lot, wayah itu urang-urang makan, minum, manukar, manjual, mananam, wan mambangun. ²⁹ Tatapi, pas hari Lot maninggalakan kota Sodom, api wan balerang gugur matan langit kaya hujan balalu mambunuh buhannya sabarataan. ³⁰ Nangkaya itulah kena pas hari Anak Manusia ditampaikan. ³¹ Pas hari itu, siapa haja nang rahat di atap rumah, wan barang-barangnya ada di dalam rumah, kada usah inya turun maambilinya; wan siapa haja nang rahat intang pahumaan, kada usah inya bulik. ³² Ingatakan apa nang terjadi rhat zaman Lot! ³³ Siapa haja nang bausaha mamalihara nyawanya, pacangan kahilangan nyawanya. Wan siapa haja nang kahilangan nyawanya, pacangan disalamatakan. ³⁴ Aku bapadah wan ikam, pas malam itu pacangan ada 2 urang nang guring di ranjang. Tatapi, nang saikung dibawa, tatapi nang lain ditinggalakan. ³⁵ Dua babinian nang rahat manggiling gandum . Nang saikung dibawa, sadangkan nang lain pacangan ditinggalakan. ³⁶ [Kayaitu jua dua nang bagawi di pahumaan, nang saikung dibawa, tatapi nang lain ditinggalakan."] ³⁷ Balalu murid-murid batakun lawan Yesus, "Di mana garang, Tuhan?" Yesus manjawab buhannya, "Dimana ada bangkai, di situjua burung alang cagar takumpul."