² Kita Kada Kawa Malayani Dua Tuan ¹ Yesus bapadah lawan murid-muridnya, "Ada sikung urang sugih nang baisi kapala palayan. wan, lawan urang sugih itu dilapurakan bahwa kapala palayannya hudah mamborosakan hartanya. Sabab itu, urang sugih itu mangiau kapala palayannya wan baucap, "Apa nang aku dangar tentang ikam ini? Bariakanlah partanggung jawaban atas tugas ikam sabab ikm kada kawa lagi manjadi bandaharaku." ³ Kapala palayan itu bapikir, "Apa nang pacangan aku ulah sabab wayahini tuanku hudah mamacat aku matan gawianku? Aku kada cukup kuat gasan mancangkul wan supan gasan mangamis. ⁴ Aku tahu apa nang musti aku ulah supaya wayah aku di pecat sabagai bandahara, urang-urang pacangan manarima aku di rumah bubuhanya." ⁵ Balalu, inya pun mangiau satiap urang nang bahutang lawan tuannya. Lawan urang paasa inya bapadah, "Barapa hutang ikam lawan tuanku?" ⁶ Urang itu manjawab, "Saratus bat minyak zaitun," balalu, kapala palayan itu bapadah lawan inya, "Ambillah surat utang ikam, lakaslah duduk wan tulislah 50 bat," ⁷ Imbah tu kapala palayan itu batakun lawan urang lain, "Barapa banyak utang ikam?" Urang itu manjawabnya , 'saratus kor gandum." balalu bandahara itu bapadah lawan inya, "Ambillah surat utang ikam wan tulislah bahwa utang ikam 80 pikul." ⁸ Imbah tu, urang kaya itu mamuji kapala palayan nang kada jujur itu sabab inya barlaku cardik. Sabab, kakanakan dunia ini labih cardik, pabila baurusan lawan sesamanya matan pada kakanakan tarang. ⁹ Aku bapadah lawan ikam, ulahlah paesahabatan lawan mamon nang kada bujur supaya wayah mamon itu habis, ikam pacangan disambut di rumah abadi. ¹⁰ Siapa haja nang satia dalam hal-hal nang halus, inya jua satia dalam hal-hal nang ganal. Wan, siapa haja nang kada jujur dalam hal-hal nang halus, inya jua kada jujur dalam hal-hal nang ganal. ¹¹ Jadi, pabila ikam kada kawa di parcaya gasan mangalola harta duniawi, siapa nang pacangan mamparcayaakan harta nang sasungguhnya lawan ikam? ¹² Wan, pabila ikam kada kawa di parcaya dalam manggunakan ampun urang lain, siapa nang pacangan mambariakan apa nang saharusnya manjadi ampun ikam? ¹³ Kadada palayan nang kawa malayani dua majikan sabab inya pacangan mambanci majikan nang asa wan katuju awan majikan nang lain. Atawa, inya pacangan patuh lawan majikan nang asa wan mangabaiakan nang lainnya. Ikam kada kawa malayani Allah wan mamon." Paringatan gasan Urang Farisi ¹⁴ Urang-urang Farisi, nang adalah pancinta duit, mandangar hal ini wan mahulut Yesus. ¹⁵ Yesus baucap lawan buhanya, "Ikam adalah urang-urang nang mambanarakan diri ikam saurang dihadapan manusia. tatapi Allah tahu isi hati ikam nang sasungguhnya sabab nang diagung-agungkan di antara manusia adalah sasuatu nang manjijikkan di panghadapan Allah. ¹⁶ Hukum Taurat wan kitab buhan nabi di ajarakan sampai jaman Yohanes; sajak jaman Yohanes , Kabar Baik tentang Karajaan Allah hudah di baritaakan wan sabarataan urang mamaksa gasan masuk ka dalamnya. ¹⁷ Namun sasungguhnya, labih nyaman bagi langit wan bumi gasan lanyap matan pada satu titik dalam hukum Taurat dibatalakan. Tentang Persarakan ¹⁸ Satiap urang nang manyarak binianya wan manikahi binian lain, inya barbuat zina. Wan, urang nang manikahi babinian nang disarakakan lakinya itu, jua barbuat zina." Urang Kaya wan Lazarus ¹⁹ Ada saikung urang sugih nan rajin mamakai pakaian ungu wan kain linen, wan barsanang-sanang saban hari dalam kamiwahan. ²⁰ Di lawang garbang urang sugih itu, tabaring saikung urang nang miskin nang bangaran lazarus, nang awaknya hibak lawan borok. ²¹ Ia baharap dibari makan apa haja nang gugur matan mija makan urang sugih itu; bahkan anjing-anjing datang manjilati boroknya. ²² Suatu katika, urang miskin itu maninggal wan dibawa uleh bubuhan malaikat ka pangkuan Abraham. Urang sugih itu jua maninggal lalu dikuburakan. ²³ Di alam maut, wayah disiksa, urang sugih itu mancangangi ka atas wan malihati Abraham di kajauhan baimbai lawan Lazarus di pangkuanya. ²⁴ Wan, urang sugih itu bakuciak, "Bapa Abraham, kasihanilah ulun wan suruhakan Lazarus mancalupakan hujung jarinya ka banyu gasan manyajukakan ilat ulun sabab ulun mandarita dalam nyala api ini." ²⁵ Akan tatapi, Abraham bapadah, "Nak, ingatlah wayah ikam masih hidup, ikam hudah manarima hal-hal nang baik, samantara Lazarus manarima hal-hal nang buruk; wayahini, Lazarus dihiburakan, samantara ikam disiksa. ²⁶ Salain sabarataan itu, ada jurang ganal nang mamisahakan kita sahingga urang nang handak manyubarang matan sini ka wadah ikam kada kawa manyubarang, wan urang nang matan wadah ikam jua kada kawa manyubarang ka wadah kami." ²⁷ Balalu, urang sugih itu bapadah, " Pabila nang kaya itu, ulun muhun lawan pian Bapa, utuslah Lazarus ka rumah abah ulun, ²⁸ sabab ulun baisi lima dingsanak lalakian. Biarlah Lazarus mamparingatakan buhanya supaya kaina buhanya kada masuk ka wadah panyiksaan ini." ²⁹ Namun, Abraham bapadah, "Buhannya baisi hukum Musa wan kitab nabi-nabi, biarlah buhanya tahu matan sabaratan nintu," ³⁰ Ujar urang sugih itu pulang, "Kada Bapa Abraham. Pabila ada saikung urang matan antara urang mati datang lawan bubuhanya barulah bubuhanya pacangan bartubat." ³¹ Jawab Abraham lawan urang sugih itu, "pabila dingsanak-dingsanak ikam kada mandangarakan Hukum Musa wan kitab buhan nabi, buhanya kada pacangan kawa diyakinakan, bahkan uleh saikung urang nang bangkit matan antara urang mati."