A vosa vakatautauvata ni dauniyau tawa dodonu, 1 -13. Sa vunauci ira na Farisi ko Jisu, 14 - 18. Sa tukunia na tamata vutuniyau kei Lasarusa, 19 - 31. 11
1
E na gauna sara lia ka masu tiko kinia ena dua na yasana ko Jisu, qai dua vi iratou na tisaipeli sa tukunia vua, kemunu na Turaga ni vulici kimamu me vaka sara lia nona vavulici ira nona tisaipeli o Joni.
2
A sa tukunia vi ira, ko koya, ni dou sa masu dou kaya, "Tamai kimamu mai lomalagi me vakarokorokotaki na yacamuni, me yaco na nomuni lewa, me vaka sa caka na lomamuni e vuravura me vaka sa caka voki lia mai lomalagi.
3
Mo ni solia mai vi kimamu ena siga yadua na kakana me rauti kimamu.
4
Ia mo ni kakua ni cudruvi kimamu ena vuku ni nimamu i valavala ca, ni kimamu sa yali cudruvi ira era sai valavala ca vi kimamu. Ia mo ni kakua ni kauti kimamu kina vere, ka mo ni vakabulai kimamu mai na ca.
5
A sa tarogi iratou ko koya, o cei vi iko dou sa dua na wekana sa qai vua ena lomaloma ni bogi ka tukunia vua, na wekaqu au kerekere mo solia mai vei au e tolu nai buli madrai.
6
Ni sa dua na wekaqu sa mai vakacegu vei au e na nona qai tu, sa yali na ka vei au meu taucia vua.
7
E na qai tukunia ko koya mai vale, kakua ni vakaocai au, na darava voki lia e se sogo tu ka keitou se davo iratou na luvequ ena mocemoce, au yali rawa ni solia.
8
Au sa kaya voki lia vei ikodou, kevaka e bese ni tucake ka solia vua ni sa wekana, ia ni sa cikevia tiko ko koya ena tucake ka solia na ka ena rauti koya.
9
Au sa via tukunia vi ikodou, dou kerekere ka na soli vi ikodou, dou vakasaqara ka dou na raicia, dou tukituki ka na dola vi ikodou.
10
Ni sa soli vi koya yadua sa kerekere ka sa raicia ko koya sa vakasaqara, ia ena dolavi vua sa tukituki.
11
E dua li vi ikodou na tama ni gone, kevaka sa mai kere madrai vei iko na luvemu, o na solia beka vua e dua na vatu?
12
Ia kevaka sa kere ika ena solia beka vua e dua na gata mei sosomi ni ika?
13
Ia kevaka e kere yaloka, ena solia beka vua e dua na batibasaga? Ia kevaka dou kilai ikodou sa tamata ca mo dou solia na ka vinaka vei ira na luvemudou, sa qai dina vakalevu cake, ni solia na Yalo Tabu ko koya na tamamudou vakalomalagi vei ira sa kerekere vua.
14
A sa tovocia tani tiko e dua na tevoro ko koya, a sa galu. Ia ni sa qai tani na tevoro sa vosa na galu ka kurabui ko ira na lewe vuqa.
15
Sa tukunia e so vi ira, sa cemuria tani na tevoro ko koya ena kaukauwa nei Pielisipupi na nodra turaga na tevoro.
16
Ia ka so voki era sa vatovolei koya, ka raicia e dua nai vatakilakila mai lomalagi.
17
Ia sa kila vinaka o Jisu na ka era sa vinanuyakia ka tukunia vi ira, na matanitu era yali ni duavata na lewena era na rusa lia, ka vaka voki lia na vuvale era yali ni duavata era na bale.
18
Kevaka voki lia e yali ni duavata na matanitu nei Setani era na tudei vakaevei? me vaka ni dou tukunia ni dou sa cemuri ira na tevoro ena kaukauwai Pielisipupi.
19
Ia kevaka kau sa cemuri ira na tevoro ena kaukauwa nei Pielisipupi, ena cemuri na kaukauwa nei cei ko ira na nomudou? o koya ena lewai kemudou kinia ko ira koya.
20
Ia kevaka au sa cemuria tani na tevoro ena dua lia nai qaqalo ni Kalou, sa kenai balebale na matanitu Kalou sa tu vei kemudou.
21
Ni sa vakaiyaragi vinaka tu e dua na qaqa ka yadravia tu na nona vale, sa na tu vinaka tu lia na nonai yaya.
22
Ia ni sa qai mai vua e dua e qaqa cake vua sa vamalumalutakia ka kalirakia na nonai yaragi ka dau vakararavi tu kinia ka vivotayakia na nonai yau.
23
O koya sa yali ni to vata ki au sa noqu meca, kei koya e yali ni kumunia vata ki au sa vidaiyakia.
24
Ni sa dainia e dua na tamata na yalo velavela, sa na viqaiyaki voli ena vanua talasiga me vaqara e dua na vanua me vakacegu kinia. Ia kevaka sa yali ni kunea, ena tukunia, "au na qai voki ki na noqu vale kau a qai mai kinia".
25
Ni sa yaco kinia, a sa raicia ni sa samaki vinaka tu ka tuvani vakamatau.
26
Sa qai ko koya ka yadia vata mai e vitu voki na tevoro eratou ca vakalevu cake mai vua. E ratou sa curu ka tiko kinia, ka sa yaco e muri me ca vakalevu cake sara na tamata oya mai na nona bula eliu.
27
NI sa cavutia tiko na vika koya ko Jisu, sa qai rogo cake mai na domona e dua na yalewa mai vi ira na lewe vuqa ka tukunia vua, "sa kalougata na kete o ni sa sucu mai kinia kei na matanisucu ko ni a sucumia.
28
Ia sa qai saumia o Jisu ka tukunia, "e ra sa kalougata cake ko ira era rogocia na vosa ni Kalou ka muria."
29
Ni ra sa soqoni vata tiko vei Jisu na lewe vuqa, sa qai tukunia, "ke sa dua nai tabatamata ca; e vakaraicia e dua nai vatakilakila, ia e yali ni soli kinia e dua nai vatakilakila, vakavo lia nai vatakilakila kei Jona na parofita.
30
Me vaka ni a yaco o Jona mei vatakilakila vi ira na kai Ninive, ena vaka voki lia kinia na Luve ni tamata vi na tabatamata ke.
31
E na siga ni lewa, ena tucake mai na Radini Sipa, ka beitaki ira na tabatamata ke ena nodra cala baletia ni a qai via mai o koya na sala balavu mai na yalayala kei vuravura me mai rogocia nai vavuvuli vuku i Solomoni, ia au sa tukunia vi kemunu ni sa tu koya e dua e uasivi cake sara mai vei Solomoni.
32
E ra na tucake na kai Ninive ena siga ni lewa koya ka ra na beitaki kemunu kinia ni ra a vivutuni ena vunau i Jona, ia sa tu koya e dua e levu cake vei Jona.
33
"E yali ni na tamata ni sa tutuvakia oti na cina, me qai dainia ena dua na tikina vuni se ena rukuni vakarau ni sila, ia e dainia lia e na kenai tutu ka me raicia rawa na kena rarama o ira era curu mai.
34
A cina ni yago na mata. Ni sa vinaka tu na matamu, sa rarama kinia na yagomunu taucoko, ia ni sa ca tu na matamunu, sa butobuto kinia na yagomunu taucoko.
35
O koya mo qai qaraunia de na qai butobuto na rarama ka tu vi iko.
36
Kevaka sa sinai na yagomunu taucoko ena rarama, ka yali ni dua na tikina e butobuto, ena rarama taucoko sara, me vaka lia ni sa cinavi iko na cina e na kenai serau.