A vosa vakatautauvata ni dauniyau tawa dodonu, 1 -13. Sa vunauci ira na Farisi ko Jisu, 14 - 18. Sa tukunia na tamata vutuniyau kei Lasarusa, 19 - 31. 15
1
Sa qai taro voleka mai vei koya ko ira kecelia na kumunia nai vakacavacava, kei ira vokilia a tamata i valavala ca, me ra rogoci koya.
2
A sa vosakudrukudru ko ira kecelia na Farisi kei ira vokilia na vunivola, ka tukunia, ko koya sa veilasamaki vata kei ira na tamata ca, ka kana vata vokilia kei ira.
3
A sa tukuna vei ira ko koya na vosa vakatautauvata, ka vaka,
4
Ko cei vei i konu na tamata, sa dua na drau na nona sipi, kevaka sa vakayalia e dua vei ira ena yali bekani dainia tu na ciwasagavulu ka ciwa ena veico, ka vakasaqarai koya sa yali me kunea mada?
5
Ia ni sa raicia, sa viribale ki domona, ka reki.
6
Ia ni sa lesu voki kina nona vale, sa kacivi ira vata na wekana kei ira vokilia na lewe ni koro, ka tukunia vei ira. Tou mai reki vata, niu sa raicia na noqu sipi ka yali.
7
Au sa tukunia vei i konu, ni sa levu vaka kinia na reki mai lomalagi ena vuku ni tamata i valavala ca e le dua loa lia sa qai veivutuni, ia ka lailai lia ena vukudra na tamata yalododonu e le ciwasagavulu ka ciwa, sa yali ni yaga vei ira na veivutuni.
8
Se ko cei voki na yalewa sa tini na nona tiki ni siliva, kevaka sa vakayalia e dua na tikina, sa yali beka ni tutuvakia na cina ka tavirakia na vale, ka vakasaqara matua, me raicia mada?
9
Ia ni sa raicia, sa kacivi ira vata na wekana kei ira vokilia na lewe ni koro, ka kaya, Tou mai reki vata, niu sa raicia na tikina kau a vakayalia.
10
Au sa kaya vei i konu, sa vakakinia na reki ena matadra na agilosi ni Kalou, ena vuku vokilia ni tamata i valavala ca e dua loa lia sa qai veivutuni.
11
Sa tukunia voki ko koya, E dua lia na tamata sa lewe rua na luvena tagane:
12
Ka sa tukunia vei tamana koya sa gone veirau, I Tamaqu, solia mai vei au nai votavota ni yau sa vota me noqu. A sa vota vei rau na i yau.
13
A sa bogi vica lia, sa qai kumunia vata na ka kece lia na gone, ka qai tani kina dua na vanua vakayawa, ka sa vakayalia kinia na nona i yau ena i valavala vakamarau ca.
14
Ia ni sa vakaotia kece, sa qai tubu na dausiga levu ena vanua gona, a sa qai dravudravua saralia ko koya.
15
A sa laki tiko vokilia kei na dua na lewe ni koro gona; a sa talai koya kina nona veiwere me vakani ira na vuaka.
16
A sa garovia na qana era dau kania na vuaka, me mamau kinia na ketena; a sa yali ni dua sa vakani koya.
17
Ia ni sa kilai yalona voki, sa tukunia , sa le vuqa na tamata nei tamaqu sa voli na nodra cakacaka, era sa mamau ena madrai ka vo voki tu yani, ia koi au sa mate ena viakana.
18
au na ia, ka qai vei tamaqu, kau na tukunia vua, Tamaqu au sai valavala ca ki lomalagi, vi konu vokilia.
19
Kau sa yali kinia ni yaga meu vakatokai voki me luvemu: lesi au meu vakatakia e dua na nomuni tamata sa voli na nona cakacaka.
20
A sa ia, ka lesu voki vei tamana. Ia ni sa yawa sara, sa raici koya ko tamana, a sa lomania, ka cicivia, ka mokoyia, ka regucia.
21
A sa tukunia na luvena kivei koya, I Tamaqu au sai valavala ca ki lomalagi, vei i konu vokilia, kau sa yali kinia ni yaga meu vakatokai voki meu luvemunu.
22
A sa tukunia na tamana vei ira na nona tamata, Dou yadia mai na i sulu vinaka sara, ka vakaicurucuru taki koya; daramakia voki lia edua na mama ki ligana, kei na i vava ki na yavana.
23
ia dou yadia mai na luve ni pulumakau sa uro, ka vakamatea; ka me datou kana, ka marau;
24
ni sa mate na luvequ koya, ka saqai bula voki; sa yali ka sa qai kune voki. A ra vakatekivu me ra marau.
25
A sa tiko mai na were na luvena ka qase vei irau; ia ni sa lesu voki mai ka toro volekatia na vale, sa rogocia na bitu ni vakatagi kei na meke vokilia.
26
A sa kacivia e dua vei ira na tamata, ka tarogia nai kena ibalebale ni soqo sa caka tiko.
27
A sa tukunia vua ko koya, sa lesu voki mai na tacimu; ka sa motukia ko tamammu na luveni pulumakau sa uro, ena vuku lia ni sa lesu voki mai ka sa bula vinaka.
28
A sa cudru ko koya, ka sa yali ni via curu i vale sa qai mai ki tuba ko tamana ka vakamasuti koya.
29
Sa qai vosa ko koya, ka tukunia vei tamana Raicia, e vuqa na yabaki koya kau sa qaravi iko kinia, ia kau sa yali saralia ni talaidredre kina nomunu vosa: ia ko sa yali saralia ni solia vei au edua wale lia na luve ni me, me keitou marau vata kinia kei ira na wekaqu:
30
ia ni sa lesu voki mai na luvemu koya , ko koya sa vakaotia na nomui yau vei ira na yalewa dautagane, ko sa vakamatea me kena na luveni pulumakau uro.
31
A sa tukunia vua ko koya, Na luvequ e daru sa tiko vatalia vakadua, ia na ka kecelia sa tu vei au sa nomu.
32
Ia sa dodonu lia meda reki, ka marau vokilia, ni sa mate na tacimu koya, ka sa qai bula voki; sa yali, ka sa qai burai voki.