¹ Mangataha ora amin'i Yaveh aminigny vani-potoanigny oran-dohatao__Yaveh ze manao kotrokora__dra magnome ora mivatravatra ho anigny saka. ² Fa reo sapy ao atokatragno dra mizaka vandy; mizaka nofy fitaky ereo dra magnome fapionogna vandy, dra mirenireny manahaky gny agnondry dra mizaly nohonigny sy fisianigny piaraky anereo. ³ Gny haoriako dra mirehisy amireo piarak'agnondry; reo osilahy__pitariky__gny ho faiziko. Yaveh toponigny maro avo koa dra hagnatriky reo agnondriny, dra gny taranak'i Joda, dra hanao anereo manahaky gny sovala fetiny agny aminigny aly! ⁴ Boak'amin'ereo gny hevianigny vato fehizoro; boak'amin'ereo gny hevianigny fetognan-draha gny lay; boak'amin'ereo gny hevianigny sipiky felia; boak'amin'ereogny hevianigny pitaariky aby hindray. ⁵ Hanahaky gny pialy ze magnisaky gny fahavalony eo aminigny fotaky gny lala aminigny alin'ereo; hialy ereo, akory Yaveh gny momba anereo, dra hahamegnasy reo ze mitikisy sovalin'aly ereo ⁶ Hapahery gny taranak'i Joda Zaho dra hamozy gny taranak'i Josefa; fa hagnerin'anereo aminigny loniny Zaho dra hamindra fo amin'ereo. Hanahaky gny ho sy nandagnako ereo, akory Zaho gny Yaveh Zagnaharin'ereo, dra hamely anereo Zaho. ⁷ Dra hanahaky gny pialy i Efraima, dra hifaly manahaky gny azonigny divay gny fon'ereo; hahita anizay reo zanany dra hifaly. Hifaly Aminahy gny fon'ereo! ⁸ Hisioky ho anereo Zaho dra hamory anereo, akory hamozy anereo Zaho, dra ho lahibe manahaky gny taloha ereo! ⁹ Namafy anereo tegny amireo olo Zaho, nefa hahasiaro Anahy agny amireo firenena lavisy ereo, dra ho velo vo hihery ereo vo gny zanany. ¹⁰ Fa hapoly anereo boak'agny aminigny tany Egypta Zaho dra hamory anereo boak'agny Asyria. Hinday anereo agny aminigny taninigny Gileada vo Libanona Zaho mandra-paha sy hisy efitragno ho anereo sasy. ¹¹ Hamakivavay gny ranomasi-pahorian'ereo Zaho; hamely reo ozan'izay ranomasy zay Zaho dra hagnamaiky gny lalan'i Neily aby. Hahetry gny voninahis'i Asyria, dra gny tehi-pazakan'i Egypta hialy amireo Egyptiana. ¹² Hagnamafy orin'anereo aminahy Zaho, dra handeha aminigny agnarako ereo__zay gny fagnambaran'i Yaveh.