¹ Gny olo raiky ze nandray anasy maro kanefa magnamafy gny hatony dra ho rava ao agnatinigny fotoa fahy sy misy fagnasitragna. ² Gny fa mitombo gny olo-mary rasy fagnahy gny panapaky, dra miseho gny olo. ³ Na iza na iza tia gny fahedrena dra mahafaly gny babany, fa izay midray amigny pizangazanga dra manola gny hareny. ⁴ Mametraky gny tany amigny babany gny pazaka, fa izay mangataky solosy koa dra manola izay. ⁵ Gny olo izay mandoka gny namany dra mamelasy harato ho an'ny tombony. ⁶ Ao amigny fahotan'ny rasy fagnahy gny fadriky, fa gny olo- marina koa dra mihira dra mifaly. ⁷ Gny olo-marina dra mihevisy gny alin'ny olo mahatra; gny olo rasy fagnahy dra sy mahatakasy fahalalana toy izay. ⁸ Mapirehisy gny tanana gny panirasira, fa ireo izay hedry koa dra mapivily fahatezerana. ⁹ Gny fa mialy hevisy amigny mola gny olo-hedry, dra sy hisy fisahara. ¹⁰ GNy lia-dra dra malaiky izay sy mana-signy dra mifofo gny ain'ny marina. ¹¹ Gny mola dra mapiseho gny haoriany aby, fo gny olo-kendry koa dra mitan'anizay dra mapitony gny vatany. ¹² Raha miteno vandy gny panapaky, dra ho rasy fagnahy avokoa reo mana-pahefan'aby. ¹³ Gny olo mahatra vo gny papahory dra mitovitovy, fa Yaveh dra magnome hazava ho anigny mason'ereo ro. ¹⁴ Raha misara gny mahatra aminigny fahamarigna gny pazaka raiky, dra hitoby mandrakizay gny seza fiandrianany. ¹⁵ Gny sorakazo vo gny anasy dra magnome fahendrena, fa gny zanaky afaky taminigny fisipiky dra mahamegnasy gny reniny. ¹⁶ Gny fa eo aminigny fahefa gny olo rasy fagnahy, dra mitombo gny fandika-dalana, fa gny olo-mary koa dra hahita gny fiongananigny olo rasy fagnahy. ¹⁷ Fehezo gny zanakao dra hagnome fisaharan'anao izy; hinday hamamia aminigny fiegnanao izy. ¹⁸ Agny amizy sy misy fahita ara-paminany dra mihabiby gny olo, fa tahy ze mitandry gny lalana. ¹⁹ Sy ho voahisy aminigny zaka gny andevo, fa na dre mahatakasy izy; dra sy hisy valiny. ²⁰ Atio gny olo ze malaky fizaka? Misy fanatena bebe kokoa ho anigny mola noho gny aminazy. ²¹ Ze mapihata gny andevony hatraminigny fahatanorany, dra hana olon'agny aminigny faran'izay. ²² Gny olo ory magnesiky fifandira dra gny toponigny fahoria hanao fahota maro. ²³ Gny avognavonigny olo mapihetry anazy, fa ze mana fagnahy mietry koa dra homem-boninahisy. ²⁴ Ze mizara aminigny pangalasy dra malaiky gny ainy avo; mahare gny ozo izy fa sy mizaka na ino na ino. ²⁵ Gny tahosy gny olo dra mahaavy fandriky, fa ze matoky an'i Yaveh gny ho voaaro. ²⁶ Maro reo ze mitalia gny tavanigny panapaky, kanefa boak'amin'i Yaveh gny rariny ho anigny olo raiky. ²⁷ Gny olo sy mary dra fahavetaveta ho anigny olo-mary, fa ze mahisy lala koa dra maharikoriko gny olo rasy fagnahy.