¹ Fa gny nahita reo vahoaky JEsosy , dra niakasy teo ambohisy. Fa gny tafapetraky Izy, dra nagnato anazy reo pianany. ² Nanokasy gny vavany Izy dra nampianasy anazy reo, manao ho: ³ ''Sambasy gny mahatra am-pagnahy, fa anazy reo gny fazaka gny lagnisy. ⁴ Sambasy reo mandala . fa hampiono an'ereo. ⁵ Sambasy reo malemy fagnahy , fa ereo gny handova gny tany. ⁶ Sambasy reo ze resy vo magetaheta gny fahamarigna, fa ho vokisa ereo. ⁷ Sambasy reo mpamindra fo, fa hahazo famindram-po ereo. ⁸ Sambasy reo malio am-po, fa hahita agn'Agnahary reo. ⁹ Sambasy reo mpampihava, fa reo gny tokavy ho Zanak'Agnahary. ¹⁰ Sambasy reo ze ezehy noho gny fahamarigna, fa anazy reo gny fazaka gny lagnisy. ¹¹ Sambasy andrareo raha magnirasira andrareo vo magneziky andrareo gny olo, dra mizaka gny karaza vandy rasy iaby hanohisy andrareo noho gny aminahy. ¹² Mifalia vo miravoravoa, fa lahibe gny valisoandrareo agny an-dagnisy. Fa lahibe zay gny fomba magnezeha gny olo reo paminany ze niaigna talohandrareo. ¹³ andrareo gnmy sira gny tany. Fa raha gny sira gny avy masaso, amy fomba akory gny apamasy anizay draiky? Sy ho soa dra amy ino dre amy ino sasy zay fa haria vo ho hisahiny tombony gny olo sisa. ¹⁴ Andrareo gny fahazavan'izao totolo zao. Gny tana miory eo amy havoa dra sy azo havony sasy. ¹⁵ Sy misy olo mandrehisy ziro dra mametraky ze agny ambany taty, fa eo amy fipetrara-ziro, dra magnazava gny iaby ao atragno zay. ¹⁶ Ao hazava eo aloha gny olo manahaky anizay fomba zay gny fahazavandrareo ba ahitan'ereo gny asa soa ataondrareo dra ankalazany gny randrareo ze agny an-dagnisy. ¹⁷ Ka mieritseritsy ho avy handrava gny lala dra reo paminany zaho. Sy avy hanorotoro an'ereo Zaho, fa hagnatateraky anazy reo. ¹⁸ Fa zakao mary amindrareo fa mandra-pahalevogny lagnisy vo gny tany, dra sy ho rava amy lala dre litera raiky vo tendro-sorasy raiky avo, mandra-pahatateraky gny raha iaby. ¹⁹ Noho zay dre iza dre iza mandika dre dra gny masaiky indrindra amin'ereo didy reo vo mampianasy gny hafa anao manahaky anizay dra ho tokavy ho masaiky indrindra ao amy fazakagny lagnisy. Fa dre iza dre iza magnao vo mampianasy reo dra ho tokavy ho lahibe ao amy fazaka gny lagnisy. ²⁰ Fa zakako amindrareo fa raha sy mihoasy noho gny agny panora-dalana vo gny fariseo gny fahamarignandrareo, dra sy hilisy ao amy fazaka gny lagnisy mihisy andrareo. ²¹ Fa rendrareo fa voazaka tamin'ereo fa ela ho: 'Ka mamono olo,'dre iza dre iza mamono olo dra ho helohina agny amy fisara.' ²² Fa zakako amindrareo fa zzay iaby hory amy rahalahiny dra mendriky gny ho hahy agny amy fisara; dre iza dre iza mizaka gny rahalahiny ho:'Ianao dra olo- fahatany! 'dra ho hahy agny amy fila-kevisy; dre iza dre iza mizaka ho:'Mola anao!'dre mendriky gny ho agny amy farihy mirehisy afo. ²³ Noho zay raha manolosy gny fagnatisao eo amy alitara ianao dra saroanao teo fa mana alahelo aminao gny rahalahinao, ²⁴ dra angao eo aloha gny alitara gny fagnatisinao, dra mandehana zory gny lalanao. Mihavana aloha amy rahalahinao, dra laha teo miharegna dra atolory gny fandainao. ²⁵ Mihavagna malaky amy piampanga anao raha b0 miara-lia aminazy amy fisara anao, fandrao gny piampanga anao hanolosy anao amy pisara, dra gny pisara mety hanolosy anao amy manam-bonignahisy, dra hatao ao an-tragno mezy anao. ²⁶ Zakako mary amindrareo, fa sy ho afaky miboaky ao mihisy anao mandra-pandohavavao gny vola fara gny keliky indrindra amy trosanao. ²⁷ Fa rendrareo fa voazaka ho:'Ka mizangazanga.' ²⁸ Kanefa zakako amindrareo fa ze magnety ampela iaby dra magniry anazy dre fa nizangazanga tao am-pony. ²⁹ Raha manafitohy anao gny masonao ankavana, dra alao zay dra hario lavisy anao. Fa soa koa ho anao raha gny raiky amy vatanao gny tokony ho simba fa sy gny vatanao iaby gny haria agny amy helo. ³⁰ Raha manafitohy anao gny tagnanao ankavanao, dra tapaho dra hario lavisy hiala aminao. Fa soa koa ho anao raha gny raiky amy vatanao gny tokony ho levo fa sy gny vatanao iaby gny hatoraky amy helo. ³¹ Dra fa voazaka avo koa ho : 'Dre iza dre iza misaraky amy valiny, dra ao izy hagnome anazy gny taratasy fisaraham-panambalia.' ³² Fa Izaho koa mizaka amindrareo fa zay aby misaraky amy valiny, afa-sy noho gny fizangazanga, dra mampizangazanga anazy. Dre iza dre iza manambaly anazy afarany fisarahany dra mizangazanga . ³³ Rendrareo fa nizaka tamy razam-be ho:' Ka miania fianianana diso,fa andeso eo anatrehany Topo gy fiaignanao.' ³⁴ Fa zaho koa mizaka amindrareo. ka miania amy raha iaby, dre amy lagnisy avo, fa seza fiandrian'Agnahary zay; ³⁵ dra amy tany, fa fipetrara-tombony zay; dre koa amy Jerosalema, fa tanan'i pazaka lahibe zay. ³⁶ Ka miania amy lohanao, fa sy afaky magnafosy dra magnamety gny singam-polo raiky anao. ³⁷ Fa ao gny zakanao ho, 'Eka, eka,'Haha, haha.'Zay mihoasy anizay dra avy amy gny rasy. ³⁸ Rendrareo fa nizaka ho:'Maso sologny maso, dra nify sologny nify.' ³⁹ Fa Izaho koa mizaka amindrareo ho, ka manohisy ze rasy. Dre iza dre iza mamely gny takolakinao ankavana dra atolory anazy koa gny ilany. ⁴⁰ Dra raha misy olo magniry gny hiaraky aminao ho agny amy fisara dra magnendaky gny akazonao, dra angao ho anazy avo koa gny lambanao. ⁴¹ Dra iza dre iza manery anao andeha kilometasy raiky, mandehana miaraky aminazy amy kilometasy ro. ⁴² Omeo ze mangataky aminao, dra ka manda dra iza dre iza magniry gny hindra aminao. ⁴³ Fa rendrareo fa voazaka ho:'Sy maisy mitia gny piaram-belo amianao ianao dra malegna gny fahavalonao.' ⁴⁴ Fa zakako amindrareo, tiavo gny fahavalondrareo dra mivavaha ho an'izay magnendriky andrareo, ( Fagnamariha: Gny dika-teny taloha soa indrindra dra mangalaky gny ho: ''''Misaora reo ze magnozo andrareo, manova gny soa amin'ereo ze malaiky andrareo.'''') ⁴⁵ ba ho avy zanaky gny randrareo ze agny an-dagnisy andrareo. Fa Izy dra mampiposaky gny masoandrony amy rasy vo gny soa, dra mampilasaky gny ora amy mary vo gny sy mary. ⁴⁶ Fa raha reo ze tia drareo gny taliavindrare, ino gny valisoa azondrareo? Moa se dra gny pamory hetra avo sy ba manao manahaky anizay koa? ⁴⁷ Raha gny rahalahindrareo raiky avo gny arabandrareo, ino gny ba ataondrareo mihoasy gny hafa? Moa se dra gny zetilisa avo sy ba manao manahaky anizay koa? ⁴⁸ Noho zay dra sy maisy tateraky andrareo, manahaky gny fahatateraha gny Randrareo ze agny andagnisy.