¹ Tamin'izay andro zay dra nandeha nitory tagny agn'efis'i Jodia i Jaona panao Batisa manao ho: ² ''Mibebaha, fa mariny gny fazaka gny lagnisy.'' ³ Fa izy gny nizakan'Isaia paminany, manao ho:''Misy feo raiky mitoka fatrasy agny agn'efisy ho:' Amboaro gny lala gny Topo, ahisio gny lalany.''' ⁴ Dra Jaona niakazo volon-drameva vo nanao fehitroky holisy tamy valahany. Valala vo tately remby gny nataony fihinana. ⁵ Dra Jerosalema , Jodia manotolo, vo gny farisy aby magnodidy gny reniranon'i Jordana dra nagnato anazy. ⁶ Nataony batisa tegny amy reniranon'i Jordana ereo, fa gny nagneky gny fahotany. ⁷ Fa gny nahita reo Fariseo vo Sadoseo maro nagnato anazy ba ho atao batisa izy, dra hoy izy tamin'ereo ho: ''Ry taranaky menarana feno poizy, iza gny napitandry andrareo hilomay gny fahoria ze ho avy? ⁸ Mamoaza tegnany miendriky gny fibebaha. ⁹ Dra ka misay gny hizaka anakam-po ho: 'Mana an'i Abrahama ho ranay izahay.'Fa zakako amindrareo fa Zagnahary dra mahavita mananga zanaky ho an'i Abrahama dre dra laha tamy tahoky vato tahoky avo. ¹⁰ Gny fa napetraky eo am- potosy gny hazo gny famaky. Koa reo hazo iaby ze sy mamoa soa dra ho tapahy dra hatoraky agny agnaty afo. ¹¹ Manao batisa andrareo amy rano ho amy fibebaha zaho. Fa mahery noho zaho izy zay avy afarako,dra zaho dra sy mendriky avo na dra gny hinday gny kapany avo. Hanao batisa andrareo amy Fagnahy masy vo gny afo Izy. ¹² Fa egny an-tagnany gny fikororohany ba hagnaliova gny famoloany dra hamory gny variny agny amy sihim-bary. Fa izy dra hagnoro reo lila amy afo ze sy mety maty.'' ¹³ Avy eo Jesosy laha tagny Galilia dra avy teo amy reniranon'i Jordana ba ho ataoan'i Jaona batisa. ¹⁴ Nefa i Jaona dra niezaky nanaka anazy , manao ho: ''Izaho gny mila ataonao batisa, nefa anao draiky seky gny magnato anahy? '' ¹⁵ Jesosy namaly dra nizaka taminazy ho: ''Ekeo zay amizao, fa izao gny mety amisika hahatateraky gny fahamarigna iaby.'' Laha teo Jaona nagneky anazy. ¹⁶ Nogny vita batisa Izy, dra niboaky gny rano avy hatra Jesosy, dra indro, nisokaky taminazy gny lagnisy. Hitany gny fagnahin'Agnahary nizoso manahaky gny voromailala dra nagneo agn'abony. ¹⁷ Dra indro, nisy feo laha tagny an-dagnisy nanao ho:''Itiho gny zanako malalako. zay sitrako indrindra.''