¹ Gny fa vitan'i Jesosy ze zaka zay,dra nizaka tamin'ereo mpianany Izy ho: ² ''Fatasindrareo fa afaky ro andro dra ho avy gny Pasaka,dra hatolosy homboa amin'gny hazofizalia gny Zanak'olo.'' ³ Laha teo gny lehiben'gny pisoro vo gny loholo niara-nivory tao amin'gny lapan'gny pisorom-be,ze nitokavy ho Kaiafa. ⁴ Niara-nanao tetiky ereo ba hanambosy mangyky an'i Jesosy dra hamono Anazy. ⁵ Fa ho ereo ho:''Sy amin'gny fety,ba sy hisian'gny korota eo amin'gny olo.'' ⁶ Dra Jesosy gny fa tao Betania tao an-tragnon'i Simona boka, ⁷ raha nipetraky nihina teo amin'gny latabasy,dra nisy ampela raiky nana botela alabastara feno menaky lafo vily nagnato Anazy,dra nandraraky anizay tamin'gny lohany. ⁸ Fa gny hitan'ereo pianany zay,dra ory ereo dra nanao ho:''Ino gny aton'izao fandania zao? ⁹ Afaky navily sarosy dra nome reo mizaky io.'' ¹⁰ Fa Jesosy,nahafatasy anizay,nizaka anazy reo ho:''Nanao akory andrareo gny manahira-say rapela?Fa raha soa gny nataony taminahy. ¹¹ Eo amindrareo mandrakizay gny mizaly,Fa zaho dra sy ho eo amindrareo mandrakariva. ¹² Fa gny nandraraky anizay menaky magnisy zay tamin'gny vatako izy,dra nataony ho agny fandevegna Anahy zay. ¹³ Zakako mary amindrareo,dre eza dre eza hitoria gny filazasara eto amin'izao toto zao aby,ze nataon'itiho ampela itiho dra ho zaka avo koa ho fahasiarova anazy.'' ¹⁴ Laha teo gny raiky tamin'ereo ro ambiny folo,ze nitokavy ho Jodasy Iskariota, nagnagny amin'gny lahiben'gny pisoro ¹⁵ dra nanao ho:''Omeondrareo hotrino zaho hanolorako Anazy amindrareo?''Nandaza volafosy maliniky telopolo ereo ho anazy. ¹⁶ Tamin'izay fotoa zay dra nitalia fahafaha izy ba hanolora Anazy amin'ereo. ¹⁷ Tamin'gny andro volohan'gny mofo sy misy lalivay dra nagnato an'i Jesosy reo pianasy dra nizaka ho:''Eza gny tianao hanomananay ho anao hihina gny hanin'gny Pasaky?'' ¹⁸ Namaly Izy ho:''Milira ao an-tana misy lelahy raiky dra zakao izy ho:'Hoy gny mpampianasy ho:''Fa mariny gny fotoako.Ato an-tragnonao Zaho gny hanao gny pasaky miaraky amin'ereo mpianasy.'''''' ¹⁹ Nataon'ereo pianany araky ze nampanovin'i Jesosy zay,dra nagnoma gny sakafon'gny pasaky ereo. ²⁰ Gny fa avy gny hariva,dra nipetraky nihina niaraky tamin'gny pianany ro ambiny folo Izy. ²¹ Gny fa nihina ereo,dra ho Izy ho:''Zakako mary amindrarro fa hisy raiky amindrareo hamaliky Anahy.'' ²² Nalahelo ereo dra nanomboky nagnotany Anazy kirairaiky ho:''Sy ho zaho mihisy ,ry Topo?'' ²³ Namaly Izy ho:''Ze niaraky nampisoboky gny tagnany taminahy tao agnaty finga gny raiky hamaliky Anahy. ²⁴ Handeha gny Zanak'olo,araky ze fa voasorasy momba Anazy.Nefa lozan'gny olo ze hamaliky gy Zanak'olo! Soa avo ho an'izay olo zay gny sy teraky .'' ²⁵ Jodasy,ze hamaliky Anazy nizaka ho:''Izaho se zay,Raby o?''Ho Izy taminazy ho:''Voalazanao.'' ²⁶ Raha bo nihina ereo,dra nangalaky gny mofo Jesosy,nisaosy,dra nanapaky anizay.Nomeny reo pianasy izay dra nizaka ho:''Rambeso,hano.Itiho gny Vatako.'' ²⁷ Nandray gny Kapoaky Izy dra nisaosy dra nagnome anizay reo dra nizaka ho:''Andrareo aby,nomy itiho. ²⁸ Fa itiho gny lion'gny fanekem-pihavaha arosaky ho agny maro ho famela-keloky. ²⁹ Fa zakako amindrareo,fa sy ba hino gny vokasy gny voloboky sasy Zaho, mandra-pihavinin'gny fisotroa vaovao hiarahako amindrareo agny amin'gny fazakan'gny Rako.''' ³⁰ Gny fa niatsa asa fidera ereo,dra nandeha tagny amin'gny lohambohisin'i Oliva. ³¹ Laha teo hoy Jesosy tamin'ereo ho:''Andrareo aby dra hiriosy Anahy nohon'gnuy amimahy amiza hariva za, fa voasorasy ho:''Hamarosy gny mpiaraky agn'ondry Zaho dra hibarakay gny agn'ondry.' ³² Fa tafarany gny fisanganako amin'gny maty,dra handeha aloha gny lala drareo agny Galilia .'' ³³ Fa Petera nanao ho Taminazy ho:''Dra hagnenga nohon'gny aminao avo gny maro,zaho sy ba hagnenga mihisy.'' ³⁴ Hoy Jesosy taminazy ho:''Zakako mary aminao,fa anizao hariva zao raha bo sy magneno gny akoho,dra handa Anahy itelo anao.'' ³⁵ Petera nizaka taminazy ho:''Dre dra sy maisy ho maty miaraky aminao avo zaho,dra sy hagnenga anao.''Manahaky anizay avo koa gny nizakan'ereo pianasy hafa. ³⁶ Dra Jesosy nandeha niaraky tamin'ereo nagnagny amy toera atao ho Getsemane dra nizaka tamin'gny pianany ho:''Mipetraha eto raha bo handeha eriho hivavaky Zaho.'' ³⁷ Ninday an'i petera bamin'gny zanak'i Zebedio ro lahy Izy dra nanomboky nalahelo vo ory. ³⁸ Laha teo ho Izy tamin'ereo ho:''Fadiranovana gny fagnahiko,manahaky gny fa ho maty. Mitoera eta dra mihambena miaraky aminahy.'' ³⁹ Nisitaky Izy, nandohaliky dra nivavaky.Ho Izy ho:''Ry Rako,raha azo atao,dra ao alao aminahy itiho kapoaky itiho.Nefa,ao sy araky gny sitrapoko ,fa gny sitraponao.'' ⁴⁰ Nagnato reo pianany Izy dra nahita anazy reo te-handry,dra ho Izy tamin'i petera ho:''Ino,sy mahavita miamby miaraky aminahy dre dra lera raiky avo se andrareo? ⁴¹ Miambena dra mivavaha ba sy ho azon'gny fakam-panahy andrareo.Mety avo gny fagnahy,fa gny nofo gny malemy.'' ⁴² Bo nandeha fanindrony Izy dra nivavaky.Ho Izy ho:''Ry rako,raha toa sy azo ala aminahy itiho raha sy mino Zaho,dra ho atao seky gny sitraponao.'' ⁴³ Nihery draiky Izy dra bo nahita anazy reo nandry,fa navesasy gny mason'ereo. ⁴⁴ Dra nagnenga anazy reo draiky Izy,lasa dra nivavaky fanitelony,nizaka gny zaka reo avo. ⁴⁵ Laha teo Jesosy nagnato reo pianasy dra nanao tamin'ereo ho:''Bo mandry vo manalaky havozaha seky andrareo?Hatio,fa mariny gny fotoa,dra gny Zanak'olo dra hatolosy eo an-tagnan'ereo panota. ⁴⁶ Misangana,andeha isika.Hatio,fa mariny gny hamaliky Anahy.'' ⁴⁷ Raha bo nizaka Izy,dra avy Jodasy,raiky amin'ereo ro ambiny folo.Nisy vahoaky maro avy niaraky taminazy laha tamin'gny lahibenympisoro vo reo loholo.Avy niaraky tamin'gny lefo vo langilangy ereo. ⁴⁸ Dra nagnome famatara anazy reo gny lelahy hamaliky an'i Jesosy,manao ho:''Ze horohako,gny Izy.Sambory Izy.'' ⁴⁹ Teo no eo avo dra nagnato an'i Jesosy izy dra nizaka ho:''Finarisy,Raby!''Dra nagnoriky Anazy izy. ⁵⁰ Hoy Jesosy taminazy ho:''Ry sakaiza,atovy ze lianao eto.''Laha teo avy izy reo,nanondrosy tagna tamin'i Jesosy,dra nisambosy Anazy. ⁵¹ Indro,gny raiky tamin'ereo niaraky tamin'i Jesosy nananga gny tagnany,nagnapotaky gny lefony,nikapa gny panopon'gny mpisorom-be,dra nahafaky gny sofiny. ⁵² Laha teo hoy Jesosy taminazy ho:''Hahireno gny toerany gny lefonao,fa reo ze nandray lefo dra ho vono amy lefo. ⁵³ Mieriserisy se andrareo fa sy afaky mitoka gny Rako Zaho,dra Izy dra afaky mandefa ho Anahy tafik'azely mihoasy noho gny ro ambiny folo? ⁵⁴ Fa atao nanao akoryzay gny hahatateraky gny Sorasy Masy,ze mizaka fa sy maisy hisanga zay?'' ⁵⁵ Tamin'izay andro zay Jesosy nizaka tamin'gny vahoaky hô:''Avy miaraky amy lefo vo langilangy hanambosy Anahy tahaky gny malaso se andrareo?Isan'andro dra nipetraky napianasy teo amin'gny fengona Zaho,fa sy nisamborindrareo. ⁵⁶ Fa zay aby zay dra nisanga ba hahatateraky ze voasorasin'ereo paminany.''Laha teo niriosy Anazy reo mpianasy iaby dra nilomay. ⁵⁷ Nandesin'ereo nanambosy anazy tagny amin'i Kaiafa pisorom-be Jesosy,ze nivorian'ereo panora-dalana vo loholo. ⁵⁸ Fa petera nagnaraky Anazy laha tagny nagnagny amin'gny kiazany pisorom-be.Nilisy tao anagnatiny izy dra nipetraky niaraky tamin'ereo mpiamby raharaha ba hahita ze hiafarany. ⁵⁹ Dra gny lahiben'gny pisoro vô ereo Synedriona aby dra nitalia anova anazy sy mary manohisy an'i Jesosy, ba mety ahafahan'ereo mamono Anazy. ⁶⁰ Sy nahita dre ino dre ino ereo,dre dra nisy pijoro vavolombelo maro sy mary avy avo teo.Dra masaiky laha teo dra nisy ro avy nagnato teo ⁶¹ dra nizaka hô:''Io lelahy io dra nizaka hô:'Afaky mandrava gny fengonan'Agnahary Zaho dra mananga anizay draiky afaky telo andro.''' ⁶² Nisanga gny mpisorom-be dra nanao taminazy hô:''Sy mana-kavaly se anao?Ino zay rasy nanamboran'ereo Anao zay?'' ⁶³ Fa sy nizaka Jesosy.Hoy gny pisorom-be taminazy hô:''Mandidy Anao amin'gny alalan'Agnahary velo zaho,zakao aminay raha anao gny Kristy,Zanak'Agnahary.'' ⁶⁴ Jesosy namaly anazy hô:''Voalazanao.Fa zakako amindrareo,manomboky zao dra ho hitandrareo gny Zanak'olo hipetraky eo an-tagna ankavanan'gny Hery,dra ho avy eo amy rahon'gny lagnisy.'' ⁶⁵ Laha teo gny pisoro nangitikitiky gny akazony dra nizaka hô:''Nizaka rasy Izy! Nanao akory isika gny bo mila pizoro vavolombelo?Indro,rendrareo gny zakany rasy zao. ⁶⁶ Ino gny hevisindrareo?''Namaly ereo dra nanao hô:''Mendriky gny ho maty Izy.'' ⁶⁷ Laha teo ereo nandrora gny tamy tarehiny vô nazera Anazy,dra nanapify Anazy , ⁶⁸ dra nanao hô:''Maminania aminay,ry Krisy.Iza gny nazera Anao?'' ⁶⁹ Dra Petera ambaliky gny kiaza,dra nisy mpanompo ampela avy nagnato anazy nizaka hô:''Anao avô koa dra niaraky tamin'i Jesosin'i Galilia.'' ⁷⁰ Fa nanda anizay teo anoloan'ereo izy,manao hô:''Sy fatako ze gny zakanao.'' ⁷¹ Gny fa niboaky gny vavahady izy,dra nisy mpanopo ampela hafa nahita anazy dra nizaka tamin'ireo ze teo hô:''Itiho lelahy itihô avo koa dra niaraky tamin'i Jesosy laha tagny Nazareta.'' ⁷² Bo nanda draiky izy niaraky tamin'gny fianiana ho:''Sy fatako ze lelahy zay!'' ⁷³ Nony afaka tselatsela dra nagnato reo ze nisanga teo dra nizaka tamin'i Petera hô:''Ianao avo koa dra tena raiky amin'ereo,fa gny fomba fizakanao dra miampanga anao.'' ⁷⁴ Laha teo nanomboky nagnozo vo ninia dra nanao hô:''Sy fatanao ze lelahy zay.''Dra teo no eo dra nagneno gny akoho. ⁷⁵ Tadidin'i Petera gny zaka nambaran'i Jesosy hô:''Bo sy magneno gny akoho dra handa Anahy itelo anao.''Laha teo izy niboaky dra nitomagny fatrasy.