¹ Dra fa niamary gn'andro,dra nitetiky hanohisy an'i Jesosy ba hamono Anazy reo lahiben'gny pisoro vo gny loholo aby. ² Izy reo namafehy Anazy,nitariky Anazy ambaliky agny ,dra nanolosy Anazy tamin'i Pilato gevernora. ³ Dra Jodasy,gny namaliky Anazy,gny fa nahita fa voaheloky Jesosy,dra nibebaky izy dra nagnery gny volafosy telopolo tamin'ereo lahiben'gny pisoro vo reo loholo,dra nizaka hô:''Nanota zaho tamin'gny namalihako lio sy manasigny.''Fa izy reo nizaka hô:''Ataonay ino?Anao zay.'' ⁵ Dra natorany tao ampengona gny volafosy,dra nagnenga vo niboaky vo namehy gny vatany Izy. ⁶ Reo lahiben'gny pisoro nangalaky reo volafosy dra nizaka hô:''Sy ara-dala gny mametraky itiho ao amy fignazam-vola,satria itiho dra vilan-dra.'' ⁷ Niaraky niresaky gny olana ereo dra nivily gny tanin'gny panao vilagny tanimanga ze handevegna reo vahiny tamin'ereo vola. ⁸ Dra zay gny atony nitokava anizay tanimboly zay hô:''Tanimbonin'gny Lio''mandrak'androany. ⁹ Dra tateraky ze nivoazaka tamin'gny mpampianany Jeremia,manao hô:''Nangalaky gny volofosy telopolo ereo,vily nanombanan'ereo vahoakin'Israely Anazy, ¹⁰ dra ereo nagnome anizay hô agny tanimboly panao volagny tanimanga,araky gny natoron'gny Topo Anahy.'' ¹¹ Dra Jesosy nisanga teo alohan'gny governora,dra gny governora nagnontany Anazy hô,''Ianao se gny Pazakan'ereo Jiosy?'' Jesosy namaly anazy hô:''Voalazanao.'' ¹² Fa gny nampangenin'ereo lahiben'gny pisoro vo reo loholo Izy,dra sy namaly dre ino dre ino. ¹³ Dra nizaka taminazy Pilato hô:''Sy renao se gny fampangena atao aminao?'' ¹⁴ Fa sy namaly dre dra zaka raiky Izy,gaga tateraky noho zay gny governora. ¹⁵ Dra isakin'gny firavoravoa dra fomban'gny governora gny mamehy gadra raiky voafilin'gny vahoaky. ¹⁶ Tamin'io fotoa io,nana gadra malaza rasy tokavy ho Barabasy ereo. ¹⁷ Noho zay gny fa niara-niango ereo,dra hoy Pilato tamin'ereo hô:''Iza gny tiandrareo halefako hô andrareo? Barabasy,sa Jesosy ze nitokavy hô Kristy?'' ¹⁸ Fatany fa nohon'gny fialona gny nanoloran'ereo an'i Jesosy taminazy. ¹⁹ Raha nipetraky teo amin'gny seza fisara izy,dra nandefa zaka tamin'gny valiny dra nanao hô:''sy mana dre ino dre ino atao amin'itiho lelahy sy manasigny itiho zaho.Fa ory loasy zaho androany nohon'gny nofy azoko momba Anazy.'' ²⁰ Dra reo lahiben'gny pisoro vo reo loholo nandresy lahasy gny vahoaky ba hangataky an'i Barabasy ,dra hampamono an'i Jesosy. ²¹ Nagnotany anazy reo gny Governora hô:''Iza amin'izy ro gny tianao halefako hô andrareo?''Hô ereo hô:''Barabasy.'' ²² Pilato nizaka tamin'ereo hô:''Ino gny tokony ataoko amin'i Jesosy ze nitokavy ho Kristy?''Izy aby namaly hô:''Fasiho amin'gny hazofizalia Izy.'' ²³ Dra hô Izy hô:''Nanao akory ,ino gny rasy nataony?''Fa vo maiky ereo nikoraky fatrasy hô:''Fasiho amin'gny hazofizalia Izy.'' ²⁴ Fa gny hitan'i Pilato fa sy afaky hanao dre ino dre ino izy,kanefa nanomboky gny tabataba,dra nangalaky rano izy,nanasa gny tagnany teo alohany vahoaky,dra nanao hô:''Sy manasiny amin'gny lion'itiho lelahy sy manasigny itiho zaho.Fa asandrareo zay.'' ²⁵ Gn'olo aby nizaka ho:''Ho aminay vo gny zanakay seky gny liony.'' ²⁶ Dra nalefany ho an'izay gny Barabasy,fa nively karavasy an'i Jesosy izy dra nanolosy Anazy ho fasihy. ²⁷ Laha teo gny miaramilan'gny gevernora nangalaky an'i Jesosy hangao an-dapa dra namory gny vondro miaramila aby. ²⁸ Nangalaky gny ankazony ereo dra nampanao akazo jaky Anazy. ²⁹ Nanamboasy satro-boninahisy tsilo ereo dra napetany zay teo an-dohany,dra napetraky tehina teo amin'gny tagnany ankavana. Nandohaliky teo anatrehany ereo dra nakizaky Anazy,nanao hô:''Arahaba,ry pazakan'i Jiosy!'' ³⁰ Nandroran'ereo Izy,dra nalan'ereo gny tehina dra nizera Anazy imaro dra be teo amin'gny lohany. ³¹ Gny fa vay nikizaky Anazy reo,dra nangalaky gny akazo lavany dra napagnisiny Anazy gny akazony,dra ninday Anazy niboaky ba hamasika Anazy amin'gny hazofizalia. ³² Gny fa niboaky ereo,dra nahita lelahy raiky laha tagny Syrena mana agnara hô Simona,ze niteren'ereo hiaraky amin'ereo ba hampitarazo gny hazofizalia. ³³ Nagnagny amin'gny toera mana agnara hô Golgota ereo,ze midika hi''Toeran'gny Karandoha.'' ³⁴ Nomen'ereo divay miharo amin'gny afero Izy ba ho nominy.Fa gny nandramany zay,dra sy ninominy. ³⁵ Dra gny nifasihin'ereo tamin'gny hazofizalia Izy,dra nataon'ereo loka gny fizara gn'akazony, ³⁶ dra nipetraky ereo dra nizano niamby Anazy. ³⁷ Teo agn'abonin'gny lohany gny nametrahan'ereo sorasy mizaka gny nagnahia Anazy,ze mivaky ho:''Itiho gny Jesosy,pazakan'ereo Jiosy.'' ³⁸ Nisy Jiolahy ro nifasihiny niaraky taminazy,gny raiky teo ankavanany dra gny raiky teo ankavia. ³⁹ Reo ze niriosy dra nanevateva Anazy,nanivingivina gny lohan'ereo ⁴⁰ dra nanao:''Anao ze handrava gny fengona dra hanamboasy anizay draiky ao agnatin'gny telo andro,vozeo gny vatanao!Raha anao gny Zanak'Agnahary,mizosoa laha tegny amin'gny hazofizalia!'' ⁴¹ Manahaky anizay reo lehiben'gny pisoro nikizaky Anazy,niaraky tamin'ereo panora-dalana vo gny loholo,dra nizaka hô: ⁴² ''Nagnavosy reo hafa Izy fa sy afaky magnavosy gny vatany.Izy gny pazakan'Israely.Angao Izy hizoso egny amin'gny hazofizalia,dra hino Anazy isika. ⁴³ Natoky an'Agnahary Izy,havelao Zagnahary hamozy Anazy zao,raha makasitraky gny hagnafaky Anazy Zagnahary.Fa dre Izy dra nizaka hô:'Zaho gny Zakan'Agnahary.'''' ⁴⁴ Manahaky anizay koa reo Jiolahy ze nifasihiny niaraky taminazy nizaka fanevateva taminazy avo koa. ⁴⁵ Dra nanomboky tamin'gny lera fahaeny dra nandrakosy gny tany aby gny hezy dra hatramin'gny lera fahasivy. ⁴⁶ Teo amin'gny lera fahasivy,dra nikoraky tamin'gny feo fatrasy Jesosy dra nanao ho:''Ely,Ely,lama sabatany?''Zay midika ho:''Zagnahariko,Zagnahariko,nanao akory gny nagnenga Anahy Anao?''|v 47 Gny fa ren'gn'ilany tamin'ereo ze nisanga teo zay,dra ho izy reo:''Mitoka an'i Elia Izy.'' ⁴⁸ Teo no eo dra nilomay gny raiky tamin'ereo dra nangalaky spaonjy, namonto anizay tamy vinaingitra, nametraky anizay tamy tohitohy bararata, dra nagnome anizay anazy ba ho nomy. ⁴⁹ Gny sasany tamin'ereo nizaka ho: ''Angao Izy. Hitasika eo raha ho avy hamozy anazy Elia. '' ⁵⁰ Dra nihiaky tamy feo fatrasy draiky Jesosy dra nanolosy gny fagnahiny. ⁵¹ Indro, gny lamba gny tempoly nitriasy ro hatragny agn'abo ka hatragny ambany, dra nihorohoro gny tany , dra vaky nisasaky reo vatolapy. ⁵² Nisokasy reo lolo, dra gny fatin'ereo olon'Agnahary maro ze nimaty dra nasanga . ⁵³ Izy reo dra niboaky laha tao amy lolo tafarany fisanganany tamy maty, nilisy gny tana masy, dra niseho tamy maro. ⁵⁴ Dra reo Kapiteny vo reo ze nagnety an'i Jesosy fa gny nahita gny horohoro-tany vo reo raha ze niseo , dra lasa natahosy fatrasy dra nanao ho: '' Zanak'Andriamanitra marina itio.''55 Nisy ampela maro ze nagnaraky an'i Jesosy hatragny Galilia ba hikarakara anazy teo nagnety lavisy eny. ⁵⁶ Tamin'ereo Maria Magdalena, Maria renin'i Jakoba vo Josefa, dra gny renin'ereo zanakilahin'i Zebedio. ⁵⁷ Fa gny hariva gny andro, dra nisy lelahy raiky mana-karena laha tagny Armatia avy , tokavy ho Josefa, zay pianasin'i Jesosy avo koa. ⁵⁸ Nagnato an'i Pilato izy dra nangataky gny fatin'i Jesosy . Dra nibakon'i Pilato omena anazy zay. ⁵⁹ Nangalaky gny faty Josefa, namogno anizay tamy gny lamba rongony malio, ⁶⁰ dra nampandry anizay tamy lolony vaovao ze nihaliny tamy vatolampy. Dra nasia vato lahibe handrindrigna gny vandrangara gny lolo izy dra niboaky. ⁶¹ Maria Magdalena vo reo Maria hafa dra teo. nipetraky teo andafiny gny lolo. ⁶² Gny andro magnaraky, zay andro afarany Fagnomana, dra niara-niango tamin'i Pilato reo lehibe gny pisoro vo reo Fariseo. ⁶³ Hoy ereo ho:''Topoko, tadidinay fa tamy bo velo igny pamitaky igny, dra hoy Izy ho:'Afarany telo andro, dra hisanga draiky zaho.' ⁶⁴ Dra noho zay, mandidia ba ho ambena gny lolo hatramy andro fahatelo, raha sy zay reo pianany mety ho avy dra hangalaky anazy dra hizaka amy olo ho: 'Nisanga tamy maty Izy, dra gny fitaky farany dra ho rasy noho gny tamy volohany.'' ⁶⁵ Hoy Pilato tamin'ereo ho: ''Mangala mpiamby. Mandehana dra ambeno soa araky ze vitanandrareo zay. '' ⁶⁶ Dra nandeha ereo dra niamby gny lolo, nagnisy tombo-kase gny vato dra nametraky gny piamby.