¹ Niboaky gny fengona Jesosy dra lasa nandeha. Nagnato Anazy reo pianany ba hagnoroa Anazy gny rafisy gny fengona . ² Nefa namaly Izy dra nizaka tamin'ereo hô:''Sy hitandreo se reo raha aby reo? Zakako mary amindrareo,sy hisy vato ho tavela na raiky hafa ze sy ho rava.'' ³ Raha nipetraky teo an-dohambohisyn'oliva Izy,dra nagnato Anazy mangingiky reo mpianany dra nizaka ho:''Zakao anay, ombia reo raha reo gny hisanga?Ino gny famatara gny fahavianao vo gny fara-andro?'' ⁴ Namaly Jesosy dra nizaka anazy reo ho:''Mitandrema ba sy hisy hamitaky andrareo''. ⁵ Fa ho maro gny ho avy amy agnarako.Dra hizaka ereo ho;Izaho gny Kristy,'dra maro gny ho voafitaky. ⁶ Mahare aly vo tatisy aly andrareo. Mitandrema ba sy hidobodoboky andrareo,fa sy maisy hisy zay raha zay;nefa sy bo avy gny farany. ⁷ Fa hisy firenena hisanga hanohisy firenena,dra fazakana hanohisy fazakana.Hisy mosary vo horohoron-tany amy toera samihafa. ⁸ Nefa zay raha zay dra fiandoahany faharariany gny fiteraha avo . ⁹ Dra ho atolosin'ereo ho amy fahoria andrareo dra ho vonony. Ho halany firenena aby andrareo noho gny agnarako. ¹⁰ Dra maro gny ho tafitohy,dra hifamaliky vo hifahakalaiky gny kirairaiky. ¹¹ Mpaminany sandoky maro gny hisanga dra hamitaky olo maro. ¹² Satria gny faharasia dra hitombo,dra hihamangasiaky gny fitiavanigny maro. ¹³ Fa gny raiky miharisy hatraminigny farany dra ho voavozy. ¹⁴ Itiho filazasarany fazaka itiho ho tory erak'izao totolo zao ho vavolombelo amy firenena iaby.Laha teo dra ho avy gny farany. ¹⁵ Noho zay,raha mahita gny fahavetavetany gny fandrava andrareo,ze nizakan'i Daniela Mpaminany,dra hisanga eo amy toera Masy andrareo''(ao gny pamaky hahatakasy ), ¹⁶ ''Ao reo ze agny Jodia handositry ho agny an-dohambohisy, ¹⁷ ao ze ao agn'abo gny tragno sy hizoso hangalaky raha laha tao an-tragno, ¹⁸ dra ao ze agny antanimboly sy hihery hangalaky gny lambany. ¹⁹ Fa loza ho an'ereo bevoka vo mampinono amin'izay andro zay! ²⁰ Mivavaha ba sy ho aminigny ririny na amy Sabasy gny hisanga gny fandosindrareo. ²¹ Fa hisy fahoria lahibe,ze sy bo nisy manahaky anizay hatrany am-piandohan'izao totolo zao mandraky amizao,haha,dra sy hisy sasy. ²² Raha sy afohezy reo andro reo,dra sy hisy nofo ho voze.Fa noho gny olom-boafily,dra hafohezy reo andro reo. ²³ Fa raha misy olo mizaka andrareo ho: 'Indro,itiho gny Kristy',ignihoky gny Kristy;dra ka mino anizay. ²⁴ Fa gny kristy sandoky vo gny mpaminany sandoky dra ho avy dra hampiseho famatara lahibe vo raha-mahagaga,ba hamitaky,raha azo atao,egny fa dra reo olo-voafily avo. ²⁵ Indro,fa nizakako andrareo mialohanigny fotoa. ²⁶ Noho zay,raha mizaka andrareo ereo ho:'Indro,agny agn'efesy izy,'dra ka magnagny agn'efisy. Dra ho 'indro,agny agnaty efitragno izy'dra ka mino anizay. ²⁷ Fa manahaky gny hondriky ze mihelasy laha tagny asignana dra mazava hatragny andrefa,dra tahaky anizay gny fihaviany Zanak'olo. ²⁸ Dre eza dre eza misy biby maty,dra agny gny hiangona gny volotara. ²⁹ Raha vao afaky gny fahoria amin'ereo andro reo dra ho mezy gny mahasoandro,sy hagnome gny hazavany gny volana,hilasaky laha tagny an-dagnisy gny vasia,dra hihozongozo gny heriny lagnisy. ³⁰ Laha teo dra hiboaky amy lagnisy gny famatarany Zanak'olo,dra gny foko agn'abonigny tany iaby handala. Hahita gny Zanak'olo avy amy rahonigny lagnisy miaraky amy hery vo gny voninahisy lahibe Izy reo. ³¹ Handefa reo azeliny Izy miaraky amy feo trompetra fatrasy,dra hamory gny olo-voafiliny laha tagny amy vaza-tany efasy ereo,manomboky amy faralagnisy dra hatragny amy hafa. ³² Mianara gny leso laha tamy aviavy.Raha vatany vao hatisy gny sampany dra mamoaky gny ravyny,dra fatasindrareo fa magneky gny fahavarasy. ³³ Manahaky anizay avo koa,raha mahita anizay raha zay andrareo aby,dra tokony ho fatasindrareo fa mariny Izy,eo amin'ireo fefy mahisy. ³⁴ Zakako mary amindrareo,fa sy ho lany itiho taranaky itiho mandra-piboahan'izay aby. ³⁵ Sy hisy sasy gny lagnisy vo gny tany,fa gny vatako dra sy ba ho levo mandrakizay. ³⁶ Kanefa gny mahakasiky anizay andro vo gny lera zay dra sy misy mahay,dre gny azeliny gny lagnisy, dre gny zanadahiny,fa gny Ray avo. ³⁷ Manahaky tamy andron'i Noa,dra tahaky anizay avo koa gny fihaviany Zanak'olo. ³⁸ Fa manahaky gny tamin'ereo andro mialoha gny safo-drano dra nihina vo nino ereo,nanambaly vo nampakasy mandra-pahaviny gny andro niliran'i Noa tao agnatiny gny sambo , ³⁹ dra sy nahafatasy dre ino dre ino ereo mandra-pahaviny safondrano dra nandringa anazy aby dra tahak'izay gny fihaviany gny Zanak'olo. ⁴⁰ Laha teo hisy lelahy ro egny an-tanimboly gny raiky ho rambesy,dra gny raiky ho anga. ⁴¹ Ampela ro gny hatisa vary-gny raiky ho rambesy,dra gny raiky anga. ⁴² Noho zay dra miambena,fa sy fatanandreo ze andro hiaviany gny Topondrareo ⁴³ Fa fatanao zao,raha fatasy gny topon-tragno ho amy firy hariva gny hiaviany gny pangalasy ,dra ho niamby izy dra sy nagnenga gny tragnony ho vaky. ⁴⁴ Noho zay dra sy maisy mivonona avo koa andrareo,fa ho avy gny Zanak'olo amy lera sy ampoizindrareo. ⁴⁵ Dra iza moa gny mpanopo mahatoky vo hendry ze nitendreny gny topony hanapaky gny borazany ba hagnomeza anazy reo gny hanin'ereo amy fotoa mety? ⁴⁶ Sambasy ze mpanompo zay ze hitany Topony fa manao anizay gny fa avy ziy. ⁴⁷ Zakako mary amindrareo fa gny topony gny hanapaky anazy ho agn'abony raha ze anagnany aby. ⁴⁸ Fa raha misy mpanompo rasy mizaka am-pony ho:'Ela fiavy gny topoko', ⁴⁹ dra manomboky mamono reo manopo namany,vo mihina dra mino miaraky amin'ireo pimamo; ⁵⁰ dra ho avy gny tapony gny mpanompo amy fotoa ze sy apoiziny dra amy lera ze sy fatany. ⁵¹ Dra ho tapatapainy topony izy dra ho ataony manahaky gny an'ereo pihasaravelasiny gny azarany,ze hisy gny fitomagnia vo gny fikitroha-nify.