¹ Tamin'izay andro zay Jesosy nandeha niboaky gny tragno dra nipetraky teo amoronigny ranomasy. ² Nisy vahoaky maro nivory nagnodidy Anazy,dra nilisy tao asambokely Izy dra nipetraky tao amin'izay.raha nisanga teo amoron-dranomasy koa gny vahoaky iaby. ³ Laha teo Jesosy nizaka raha maro tamin'ereo tamigny alalany fagnohara.Ho Izy ho:''Indro,nisy mamboly raiky nandeha niboaky hamafy tegnan-draha. ⁴ Raha izy namaly igny,dra nisy tegnany sasany lasaky tegny amoron-dala,dra tamy reo voro dra nandrapaky reo. ⁵ Reo tegnany hafa draiky dra lasaky tegny amy tany maro vato,ze sy nahazoan'ereo nofo-tany soa,avy dra nisiry reo,satria sy laliky gny tany. ⁶ Fa gny niboaky gny masoandro,dra maiky reo satria sy nisy vahany,dra nalazo. ⁷ Nilasaky teo amy raha maragnisy koa gny tegnany hafa.Nisiry reo tsilo dra nialaibe anazy reo. ⁸ Gny tegnany nilasaky tamigny tany soa dra namoa,gny sasany agn'abo zato heny,gny sasany eni-polo,dra gny sasany telo-polo. ⁹ Ze mana-sofy,ao izy hiteno.'' ¹⁰ Tamy reo mpianasy dra nizaka an'i Jesosy ho:''Manao akory anao gny miresaky amin'ireo vahoaky amy alalany fagnohara?'' ¹¹ Namaly Jesosy dra nizaka anazy reo ho:''Andrareo gny nome tombony hahafasy raha-mivony amy fazaka gny lagnisy reo,fa ho anazy reo dra sy nome anizay. ¹² Satria dre iza dre iza mana,dra ho be avo gny home.Fa dre iza dre iza koa sy mana,dre ze hanagnany avo ho ala aminazy. ¹³ Zay gny atony hiresahako amin'ereo amy alalanigny fagnohara:Dre dra hagnety avo aza reo,dra sy mahita; dre miteno avo ereo,dra sy mahare,dre mahazo. ¹⁴ Amin'ereo gny faminanian'Isaia gny tateraky,ze mizaka ho:'Gny fa miteno dra hahare andrareo,saiky sy hahazo mihisy;gny fa magnety dra hahita andrareo,saiky sy hahatakasy. ¹⁵ Fa nazary sy nahay gny fon'itiho vahoaky itiho,dra fatrasy sofy ereo,dra natoran'ereo gny masony,ba sy hahita amy mason'ereo,dre hahare amy sofin'ereo,dre hahazo amigny fon'ereo,dra hibebaky ereo,dra hagnasitra anazy zaho.' ¹⁶ Fa sambasy gny masondrareo,satria mahita;dra gny sofindrareo,satria mahare. ¹⁷ Zakako mary amindrareo fa paminany vo olo-mary maro gny nagniry gny hahita reo raha ze hiandrareo,kanefa sy nahita an'ereo.Nagniry gny hahare reo raha ze rendrareo ereo,nefa sy nahare an'ireo. ¹⁸ Koa mitenoa dra gny fagnohara gny amy pamboly raiky namafy gny tegnany. ¹⁹ Gny fa misy mahare gny zaka gny fazaka nefa sy mahazo zay,dra avy gny rasy dra magnombosy ze nafafy tao am-pony.Io gny tegnany nafafy tegny amoron-dana. ²⁰ Gny nafafy amigny tany be vato dra gny olo ze mahare gny zaka dra avy hatrany dra mandray anazy am-pifalia, ²¹ Saiky sy bo miorim-paka ao agnatiny izy dra maharisy tselatsela avo. Gny fa avy gny faharasia dre gny fagnezeha noho gny amy zaka,dra malaky fafitohy izy. ²² Gny nafafy tegny amy tsilo,io dra gny olo ze mahare gny zaka,saiky gny fisalasalan'izao totolo izao vo gny fitaky gny hanagna gny magnabe gny zaka,dra lasa sy mamoa izy. ²³ Gny nafafy teo amy tany soa,io gny olo ze mahare gny zaka dra mahazo anizay.Mamoa misy tegnany izy dra mahavy gny tegnany raiky,hagnome avo zato heny mihoasy ze nambole,gn'ilany enim-polo, gn'ilany avo telo-polo heny.'' ²⁴ Nagnaboaky fagnohara raiky hafa tamin'ereo Jesosy.Ho Izy ho:''Gny fazaka gny lagnisy dra manahaky gny lelahy raiky ze namafy tegnan-draha soa tao aminigny tanimboly. ²⁵ Fa raha nandry igny gny olo,dra avy gny fahavalony dra namafy voa-simparifary avo koa tao amin'ireo vary dra nandeha. ²⁶ Gny fa nisiry gny vary dra avy eo namokasy gny tegnany,dra nipoisy avo koa gny voa-simparifary. ²⁷ Niavy reo mpanompony Topon-tany dra nizaka taminazy ho:'Topoko,sy namafy tegnany soa tao amy tanimbolinao se ianao? Nanao akory izy amizao gny misy tegna-simparofary?' ²⁸ Ho izy tamin'ereo ho:'Nisy fahavalo nanao anizay.'Hoy gny mpanompo taminazy ho:'Tianao se gny handehananay magnombosy anazy reo?' ²⁹ Gny topon-tany nizaka ho:'Haha. Satria raha magnombosy gny simparifary andrareo,dra mety hagnombosy gny vahan'ireo vary miaraky amin'ireo koa. ³⁰ Angao hiaraky hirisy ereo ro hatramigny fanapaha anazy.Amy fotoa-fanapaha dra hizaka amy mpanapaky zaho ho:''Alao seky reo ahi-drasy dra fehezo ho maromaro ba hagnoroa anazy reo,fa havorio ao amy fagnisia vokasy reo vary.'''''' ³¹ Laha teo Jesosy nampiboaky fagnohara raiky hafa tamin'ereo .Ho Izy ho:''Gny fazakany gny lagnisy dra manahaky gny tegnasinampy ze nalany gny lelahy raiky dra nafafiny teo amy tanimboliny. ³² Io tegnany io tokoa gny tegnany masaiky indrindra amy tegna-draha hafa iaby.Fa gny nisiry zay,dra lahibe noho reo raha-misiry ao amy tanimboly.Nazary hazo zay,ba hiavian'ereo voronigny lagnisy dra hanao gny tragnon'ereo eo amin'ireo rasany.'' ³³ Laha teo Jesosy nizaka fagnohara raiky hafa.''Gny fazakanigny lagnisy dra manahaky gny lalivay ze nalany ampela raiky dra naharony taminy lafariny itelo famara mandra-piakasy gny foto-koba manotolo.'' Fagnohara gny nagnambaran'i Jesosy reo raha-iaby reo taminigny vahoaky;dra sy nizaka dre ino dre ino tamin'ereo afa-sy taminigny fagnohara Izy. ³⁵ Zay dra ba hahatateraky ze nizaka taminigny alalany mpaminany, gny fa nizaka Izy ho:''Izaho hizaka amigny alalany fagnohara. Hizaka raha ze navoniny hatrizay nagnorena zao totolo zao zaho.'' ³⁶ Avy eo Jesosy niriosy gny vahoaky dra nagnao an-tragno.Nagneo aminazy gny mpianany dra nizaka ho:''Azavao aminay gny fagnohara momba gny simparifarinigny tanimboly.'' ³⁷ Namaly Jesosy dra nizaka ho:''Gny mamafy tegnany soa dra gny Zanak'olo. ³⁸ Gny tanimboly dra zao totolozao;dra gny tegnany soa,reo gny zanaky gny fazaka.Gny simparifary dra gny zanaky gny rasy, ³⁹ dra gny fahavalo ze namafy anazy reo dra gny devoly.Gny finapaha dra gny fiafaran'izao totolo zao,dra gny mpanapaky dra reo azely. ⁴⁰ Noho zay,tahaky gny amoria vo hagnoroa gny simparifary amy afo,gny atao koa amy fiafaran'izao totolo zao. ⁴¹ Hagniraky gny azeliny gny Zanak'olo,dra ho ahoron'ereo hiala amy fazaka gny raha iaby ze mahavy fahota,vo gny ze manao rasy. ⁴² Hatoran'ereo ao amy laforo lahibe mirehisy afo ereo,ze hisy gny fitomagnia vo gny fikitroha-nify. ⁴³ Laha teo hamirasy manahaky gny mahasoandro ao amy fazakanigny Rain'ereo gny olo-mary. Zay mana-sofy,ao izy hiteno. ⁴⁴ Gny fazakanigny lagnisy dra manahaky gny hanagna ze mivony ao aminigny tanimboly raiky. Nisy lelahy nahita anizay dra navoniny. Nandeha taminigny hafaliany izy,nivarosy ze anagnany iaby,dra nivily anio tanimboly io. ⁴⁵ Dra gny fazakany gny lagnisy dra manahaky gny lelahy ze mpivarosy mitalia voahangy lafo vily. ⁴⁶ Gny fa nahita voahangy raiky zay tena lafo vily izy,dra nandeha ka nivarosy se anagnany iaby dra navily . ⁴⁷ Gny fazaka gny lagnisy dra manahaky gny harato ze natoraky tagny an-dranomasy,dra namory gny karaza-draha-magnay. ⁴⁸ Gny fa feno zay,dra nisitomin'ereo pagnarato ho eo amoron-dranomasy. Laha teo ereo nipetrky dra nagoro gny raha soa ho ao amy fipetrarany,fa gny raha sy taliaviny koa narian'ereo. ⁴⁹ Hanahaky anizay amy fiafaran'izao totolo zao. Ho avy gny azely dra hagnasaraky gny rasy fagnahy amin'ereo mary. ⁵⁰ Hatorakin'ereo ao amy fagnoroa lahibe mirehisy afo ereo, ze hisy gny fitomagnis vo fikitroha-nify. ⁵¹ Azondrareo se ze raha iaby zay?''Hoy reo mpianany taminazy ho:''Eka.'' ⁵² Laha teo Jesosy nizaka tamin'ereo ho:''Noho zay gny mpanora-dala iiaby ze lasa mpianasy eo amy fazakanigny lagnisy dra manahaky gny lelahy topon-tragno raiky ,ze mamoaky gny raha fa ela vo gny raha vaovao laha tao amy hanagnany.'' ⁵³ Laha teo gny fa nahavita anireo fanohara reo Jesosy,dra niala tamin'izay toera zay Izy. ⁵⁴ Laha teo Jesosy nilisy tao amy taniny manoka dra nampianasy gny vahoaky tao amy synagogan'ireo.Vokasin'izay dra talazo ereo dra nizaka ho:''Avy eza gny ahazoan'itiho lelahy itiho gny fahendreny vo gny fagaga reo? ⁵⁵ Sy io lelahy io se gny zanaky gny mpandrafisy?Sy maria se gny fitokava gny reniny? Sy Jakoba, Josefa,Simona,dra Jodasy se gny rahalahiny? ⁵⁶ St miaraky amisika se reo anabaviny iaby? Avy eza gny nahazoany gny raha reo iaby?'' ⁵⁷ Tohina noho gny aminazy ereo.Fa hoy Jesosy tamin'ereo ho:''Sy misy mpaminany sy misy hajany raha sy ao amy fireneny vo ao amy fianakaviany avo.'' ⁵⁸ Sy dra nanao fahalasam-be tao Izy noho gny sy finoan'ereo.