¹ Tamin'izay fotoa zay, Heroda pazaka nahare gny vaovao momba an'i Jesosy. ² Ho izy tamin'ereo mpanompony ho:'' I Jaona mpanao batisa zay; nisanga tamy gny maty izy.Noho zay dra miasa ao aminazy reo hery reo.'' ³ Fa Heroda nanambosy an'i Jaona,namehy anazy ,dra nandefa anazy tagny an-tragno mezy noho i Herodiasy,valin'i Filipo rahalahiny. ⁴ Fa hoy Jaona taminazy ho:''Sy ara-dala ho anao gny mana anazy ho valinao.'' ⁵ Nagniry gny hamono anazy Heroda,saiky natahosy gny vahoaky izy,satria nirambesin'ereo manahaky gny mpaminany izy. ⁶ Fa gny avy gny andro nahaterahany'i Heroda,dra nasizaky teo agnevon'ereo vahiny nasany gny zanakapelan'i Herodiasy dra nahafinarisy an'i Heroda. ⁷ Ho setrin'izay,dra nampanatena taminigny fianiana izy gny hagnome ze hangatahiny dre ino dre ino. ⁸ Gny fa avy natorony reniny mariky,dra ho izy ho:''Omeo anahy eto, agn'abony ampondra, gny lohan'i Jaona mpanao Batisa.'' ⁹ Nalahelo fatrasy noho gny fangatahany gny pzaka,saiky noho gny voadiny vo noho reo nisakafo niaraky tanminazy aby,dra nagnome baiko izy fa tokony ho vita zay. ¹⁰ Nagniraky dra nanapaky gny lohan'i Jaona tao an-tragnomezy izy. ¹¹ Laha teo nandesiny tamy finga gny lohany dra nomeny gny zazapela dra nandesiny teo aminy gny reniny zay. ¹² Laha teo dra avy gny mpianany,nangalaky gny faty,dra nandevy anizay. Tafaran'izay,dra nandeha ereo dra nizaka tamin'i Jesosy. ¹³ Dra gny fa nahare anizay Jesoy,dra niala laha teo tamy zambokely raiky izy hagnagny amy toera mitoka raiky.Gny fa nahare anizay reo vahoaky,dra nagnaraky anazy an-tombony laha tagny amin'ereo tana-dehibe. ¹⁴ Laha teo Jesosy nagneo anoloan'ereo dra nahita gny vahoaky maro be.Niferignay anazy reo Izy dra nagnasitrany gny aretin'ereo. ¹⁵ Gny fa avy gny hariva,dra nagneo aminazy reo mpianasy dra nizaka ho: ''Itiho dra toera rava,dra fa tapisy sahady gny andro. Alefao gny vahoaky,ba hahafahan'ereo mandeha agny amin'ereo tana dra hivily hany ho ay vatan'ereo.'' ¹⁶ Fa Jesosy nizaka anazy reo ho:''Sy mila mandeha lavisy ereo.Omeondrareo raha hany ereo.'' ¹⁷ Hoy ereo taminazy ho:''Mofo dimy vo hazandrano ro avo hanagnanay eto.'' ¹⁸ Hoy Jesosy ho:''Andeso atiho aminahy zay.'' ¹⁹ Laha teo Jesosy nibaiko gny vahoaky ba hipetraky eo amy zeky (bozaky). Nalany gny mofo dimy vo hazandrano ro. Niandrandra tagny an-dagnisy,dra nisaotra Izy dra nanapaky gny mofo dra nomeny gny mpianany,dra mpianasy nagnome anizay ho an'ereo vahoaky. ²⁰ Nihina avo koa izy aby dra visy.Laha teo dra navorin'ereo gny sisan'ereo poti-sakafo dra nahafeno dimy arivo lahy teo gny nihina,hafasy gny zaza amam-pela. ²² Avy dra nasainy nagnao amy sambokely dra handeha hialoha anazy ho egny ampita gny mpianany, raha bo nandefa gny vahoaky Izy. ²³ Tafarany nandefasany gny vahoaky,dra nandeha niakasy tegny an-tendrombohisy raiky Izy ba hivavaky. Gny fa avy gny harivamdra izy raiky teo. ²⁴ Dra gny sambo dra fa lasa lavisy gnytanety,nakopakopany oza.satria nitsoka nanohisy anazy gny rivosy. ²⁵ Taminigny fiambena fahefasy gny hariva dra nagnato anazy reo Jesosy,nandeha tegny agn'abony ranomasy. ²⁶ Gny fa nahita anazy nandeha tegny agn'abony ranomasy gny mpianasy,dra lasa natahosy dra nizaka ho:''Biby io,''dra nihiakiaky tami-tahosy ereo. ²⁷ Fa Jesosy nizaka tamin'ereo avy hatrany ho: ''Mahereza! Izaho itiho! Ka matahosy.'' ²⁸ Namaly Anazy Petera dra nanao ho:''Topo,raha anao io,dra zakao magnato anao egny agn'abonygny rano zaho.'' ²⁹ Hoy Jesosy ho:''Magnato''dra niala laha tao amy sambokely Petera dra nandeha teo agn'abony rano ba hagnato an'i Jesosy. ³⁰ Fa gny nahita gny sioky Petera,dra llasa natahosy. Raha igny izy nanomboky niletiky igny,dra nikoraky fatrasy izy sady nizaka ho:''Topo vozeo Zaho!'' ³¹ Avy hatrany Jesosy dra nanondrosy gny tagnany, nita an'i Petera,dra nizaka taminazy ho:''Ianao ry masaiky finoa,fa magnino anao gny misalasala?'' ³² Laha teo Jesesy vo i Petera nandeha nita gny sambokely,nizano nitsioky gny sioky. ³³ Laha teo gny mpianasy tao agnaty sambokely nidera an'i Jesosy dra nizaka ho:''Anao mary gny Zanak'Agnahary.'' ³⁴ Gny fa avy nisaky ereo,dra avy tegny an-tanety tao Genesareta. ³⁵ Gny fa nahafatasy an'i Jesosy gny lelahy tao amin'izay toera zay,dra nandefa hafasy tegny amy farisy magnodidy iaby,dra nandesin'ereo teo aminazy ze olo narary aby. ³⁶ Nandohaliky taminazy ereo ba hahafahan'ereo mikasiky gny sisin'akazony avo, dra maro gny nikasiky anizay dra sitrany.