¹ Tamin'izay fotoa zay Jesosy nandeha namakivaky gny tanimbary tamy gny andro Sabata.Resy reo mpianany dra nanomboky nioty salohim-bary dra nihina ereo. ² Nefa noho gny hitan'ereo Farise zay,dra hoy ereo tamin'i Jesosy ho:''Hatio,reo mpianasinao manao ze sy ara-dalana gny manao anazy amy Sabata.'' ³ Fa Jesosy nizaka anazy reo ho:''Bo sy nivakindrareo mihisy se gny raha nataon'i Davida, gny fa resy izy,vo reo lelahy aby niaraky taminazy? ⁴ Nilisy tao amy tragnon'Agnahary izy dra nihina gny mofo gny fanatreha,ze sy ara-dalana ho anazy raha hany dra sy ara-dalana ho an'ereo ze niaraky taminazy,nefa ara-dalana ho agny loha gny mpisoro raiky avo. ⁵ Sy bo nivakindrareo se gny ao amy lalana,fa amy Sabata reo mpisoro ao an-tepoly dra manota gny Sabata nefa sy mana-signy? ⁶ Kanefa zakako amindrareo fa eto gny raiky lahibe noho gny tempoly. ⁷ Raha ba haindrareo gny hevisy gny ho:'Famindram-po gny iriko fa sy soro,'dra sy nagnahy gny sy mana-signy andrareo. ⁸ Fa gny zanak'olo gny Topony gny Sabata.'' ⁹ Laha teo Jesosy niala tao dra nilisy tao amy Synagogan'ereo. ¹⁰ Indro, nisy lelahy ze malemy tagna teo.Nagnotany an'i Jesosy reo Fariseo,nanao ho:''Mety se gny magnasitra amy Sabata?''ba hiampangan'ereo anazy amy fahota. ¹¹ Hoy Jesosy tamin'ereo ho:''Olo iza amindrareo eo, iza,raha agn'ondry raiky avo gny anagnany,dra raha lasaky agnaty lavaky laliky gny agn'ondry amy Sabata,gny sy hanambosy anazy dra sy hampiakasy anazy? ¹² Sy manan-daza mihoasy lavisy ,se, gny olo noho gny agn'ondry! Dra noho zay dra mety gny manao soa amy andro Sabata.'' ¹³ Laha teo hoy Jesosy tamin-dralelahy ho:''Ahisio gny tagnanao.''Dra nahisiny zay,dra nihery gny fahasalamany ,manahaky gny tagnany ilany. ¹⁴ Fa niboaky reo Fariseo dra nitetiky gny hamono Anazy. Nitalia hevisy gny amy fomba mety hamonoa Anazy reo. ¹⁵ Gny fa nahay anizay Jesosy,dra niala teo Izy.Olo maro gny nagnaraky Anazy,dra nisitraniny aby izy. ¹⁶ Dra nandidy anazy reo Izy ba sy hampafatasy Anazy amy hafa, ¹⁷ ba hahatateraky, ze fa nambara tamy alalan'Isaia mpaminany,manao ho: ¹⁸ ''Hatio,gny mpanopoko ze nifiliko; ry malalako,zay sitrakiny gny fagnahiko indrindra. Hapetrako ao aminazy gny fagnahiko,dra hagnambara gny fisara amy zetilisa izy. ¹⁹ Sy hifagnakany dre hitoka fatrasy izy; dra sy hisy olo hahare gny feony egny an-dala. ²⁰ Sy hanapaky gny volotara torotoro izy;sy hamono ze lahi-ziro manendroky , mandra-panovany gny rairiny ho fandrese, ²¹ dra amy agnarany gny hanagnan'ireo zetilisa fanatena.'' ²² Laha teo nisy olo poaky vo moana, nipetrarany devoly, nandesy teo amy Jesosy. Nisitraniny izy, vokasin'izay dra nizaka vo nahita gny moana. ²³ Latsa reo vahoaky aby dra nizaka ho:''Mety io lelahy io se gny zanak'i Davida?'' ²⁴ Kanefa gny fa nahare anizay fahagaga zay reo Fariseo,dra hoy ereo ho:''Io lelahy io dra sy mamoaky devoly raha-sy amy alalan'i Belzeboba,lahibeny gny devoly.'' ²⁵ Kanefa fatasin'i Jesosy gny eritserin'ereo dra nizaka anazy reo ho:''Gny fazaka iaby mialy an-tragno dra sy haharisy ,dra gny tana na tragno aby mialy an-tragno dra ho rava. ²⁶ Raha mamoaky satana gny satana,dra mialy an-tragno izy. manao akory gny hizoroany fazakany? ²⁷ Dra raha mamoaky reo devoly amy alalan'i belzeboba zaho,dra amy alalan'iza zay gny androahany zanakindrareo anazy reo?NOho zay atony zay dra ho pisara ereo. ²⁸ Kanefa raha mamoaky reo devoly amy alalany Fagnahin'Agnahary Zaho,dra fa avy amindrareo gny Fazakan'Agnahary. ²⁹ Amy fomba manao akory gny ahafahany gny milisy ao an-tragnony lelahy mahery dra mangalaky anereo fanagnany raha sy hafehiny gny lelahy mahery?Laha teo hangalaky reo fanagna ao an-tragnony izy. ³⁰ bZe sy momba anahy dra manohisy anahy,dra ze sy mitambasy miaraky aminahy dra miparitaky. ³¹ Noho zay zakako amindrareo fa,ho voavela heloky gny olo amy fahota vo fizaka-drasy iaby,fa gny fizaka-drasy amy Fanahy masy dra sy hahazoa famelan-keloky. ³² Dre iza dre iza mizaka manohisy gny zanak'olo,dra ho voavela izy.Fa dre iza dre iza mizaka manohisy gny fanahy masy,dra sy ho voavela izy,dre amin'izao fiaigna izao,dre amin'izay ho avy. ³³ Atovy soa gny hazo dra hamoa soa ,dre atovy rasy gny hazo dra hamoa rasy zay,fa fatasy amigny tegnany gny hazo. ³⁴ Andrareo taranaky gny menarana,satria rasy fagnahy andrareo,dra manao akory gny afahandrareo mizaka raha soa? Fa avy amy habeny ao am-pony gny izakany gny vavany. ³⁵ Gny olo soa avy amigny hanagna soa ao am-pony dra mamokasy ze soa,dra gny olo-drasy laha tamy hanagna rasy ao am-pony dra mamokasy ze rasy. ³⁶ Zakako amindrareo fa amy androny gny fisarana dra ho adigny amigny zaka sy voahevisy nizakany aby gny olo. ³⁷ Fa gny zakanao gny hagnamary anao,dra gny zakanao gny hagnahia anandrareo.'' ³⁸ Laha teo nisy mponora-dalana vo Farise sasasany namaly an'i Jesosy dra nizaka jo:''Ry Mpampianasy, magniry gny ahita fanatara laha taminao zahay.'' ³⁹ Fa namaly Jesosy dra nizaka anazy reo ho:''Misy taranaky rasy fagnahy vo mpizangazanga mitalia famatara. Kanefa sy misy famatara ome anazy afa-sy gny famataran'i Jaona mpaminany. ⁴⁰ Fa mitovy an'i Jaona ze telo andro vo telo hariva tao agnatiny trokiny fia lahibe zay,dra hanahaky anizay koa gny hitoerany gny zanak'olo telo andro vo telo hariva ao agnatiny gny tany. ⁴¹ Reo olon'i Ninive dra hisanga eo amy fisarana miaraky amin'itijo taranaky itiho dra hagnahy anizay. Fa nibebaky ereo taminigny toriten'i Jaona,dra indro,misy olo lahibe noho Jaona eto. ⁴² Gny pazakavavy gny asimo dra hiara-hisanga amin'ireo lelahin'itiho taranaky itiho amigny androny fisara dra hagnahy zay.Avy laha tagny amy farany gny tany izy ba hahare gny fahendren'i Salomona,dra indro,misy olo lahibe noho Solomona eto. ⁴³ Rehefa nisy fagnahy rasy niala tao amy lelahy raiky,dra mandalo tany maiky izy dra mitalia fisahara,nefa sy mahita anizay. ⁴⁴ Zay dra mizaka ho:'Miharegna agny amy tragnoko ze nihaviako zaho.'Dra nony avy ,dra nahita fa voafafa gny tragno dra nilamy. ⁴⁵ Laha teo dra nandeha izy dra ninday fagnahy rasy mihoasy fito niaraky taminazy ze rasy mihoasy anazy,dra nilisy nony tao izy iaby.Laha teo niha-rasy noho gny volohany gny fiafaran'izay lelahy zay.Dra hanahaky anizay koa amin'itiho taranaky rasy fagnahy itiho.'' ⁴⁶ Raha bo nizaka tamin'ereo vahoaky Jesosy,dra indreo,gny reniny vo reo rahalahiny nisanga tagny ambaliky,nitalia hiresaky aminazy. ⁴⁷ Nisy olo raiky nizaka taminazy ho:''Hatio, gny reninao vo reo rahalahinao misanga ao ambaliky, mitalia iresaky aminao.'' ⁴⁸ Fa namaly Jesosy vdra nizaka tamigny nizaka Anazy ho,''Iza gny reniko dra iza reo rahalahiko?'' ⁴⁹ Laha teo nahisiny tamin'ireo moianany gny tagnany dra nizaka ho:''Hatio ,tahoky gny reniko vo reo rahalahiko! ⁵⁰ Fa ze manao gny sitrapony Rako ze agny an-dagnisy,dra ze olo zay gny rahalahiko,vo gny anabaviko,dra reniko.''