¹ Na dre gny fagneke volohany aza dra nana fisipi-pivavaha vo fitoera masy eto atany. Fa nisy tabernakely ze nomany. Gny efisy volohany, ze nisy gny pisy ziro, gny latabasy, dra gny mafonigny fagnatreha, dra natao anizahoky ho fitoera masy. ³ Ao ambaliky gny lamba faharoa dra nisy efisy raiky hafa, atao ho toera masy faratapony. ⁴ Nisy alitara volamena ho anigny didi-kazo magnisy zay. Nisy gny fiaranigny fagneke avo koa, ze rakosy volamena tateraky. Tao agnatinin'izay dra nisy volamena maro gny mana, gny tehin'i Arona ze nagniry, dra vato pisaky gny fagneke, dra kerobima be voninahisy maro gny magnaloky gny lombony fandombofa anazy, ze sy afaky zakanay amigny asipiriany amizao. ⁶ Gny fa voaoma reo raha reo, dra nilisy tao amigny efisy ivelanigny tabernakely avo reo pisoro ba hanao gny fanopoan'ereo. ⁷ Fa gny pisorombe avo gny nilisy ndray mandeha isatao tao amigny efisy faharo, dra nindray tamigny lio ze natolony ho anigny vatany vo ho anireo fahota sy ninian'ireo olo. ⁸ Nasehonigny Fagnahy Masy fa gny lala magnao amigny toera masy indrindra dra bo sy naseho raha bo misanga gny tabernakely volohany. ⁹ Izay dra fagnohara ho an'izao fotoa amizao. Reo fagnomeza vo reo soro ze atolosy amizao dra samby sy afaky hahatateraky gny fieriseretanigny pivavaky raiky. ¹⁰ Mifatoky amigny hany vo raha nomy vo karaza-pomba filiova maro avo reo. Reo aby reo dra fisipiky ho anigny nofo avokoa ze name mandra-pagnamboara gny fandamigna vaovao. ¹¹ Kristy dra niavy manahky gny pisoronamben'ireo raha soa ze avy. Nandeha tamigny alalanigny tabernakely lahibe vo lafasy ze sy an'izao totolo voahary izao. [Fagnamariha: Reo dika zaka ilany dra mivaky manahaky anizahoky: "Jesosy dra avy manahaky gny pisoromben'ireo raha soa ze ho avy."] ¹² Sy tamigny lion'ireo osy lahy vo vatos'agnomby vaviny zay, fa tamigny liony manoka ze nilisy tao amigny toera masy faratapony ndray mandeha ho anigny niaro gny famozesika aby mandrakizay. ¹³ Fa raha gny lion'ireo osy vo reo agnomby lahy dra gny famafaza gny lavenoky gny vatos'agnomby vavy eo amireo ze lasa maloto gny manoka anereo eo amin'agnahary ho fagnaliova gny nofon'ereo, ¹⁴ manahaky akory gny fihiasigny lion'i Kristy, ze nanolosy gny Vatany sy misy kilema ho an'Agnahary tamigny alalanigny Fagnahy mandrakizay, hagnalio gny fieriseretasika hiala amigny asa maty ba hanopoa gny Zagnahary velo? ¹⁵ Noho ixzay atony izay, dra Izy gny pagnalala gny fagneke vaovao. Izay dra, akory nisy fahatesa indray niseho ba hagnafaky reo ze ambaninigny fagneke volohany amigny fahotan'ereo, dra hitakasy gny fapanatenanigny lova mandrakizay reo ze voatoka. ¹⁶ Fa raha misy didi-panagna, gny fahafatesanigny olo ze nanao anizay dra sy maisy voaporofo. ¹⁷ Fa gny fa misy fahafatesa avo koa mana-kery gny didi-panagna, akory sy mana-kery izay raha ohasy bo velo gny olo ze nanao anizay. ¹⁸ Koa na dre gny fagneke volohany aza sy natao raha sy nisy lio. ¹⁹ Fa gny fa nagnome tamireo olon'aby i Mosesy, dra nangalaky gny lionigny agnomby vo gny osy, nindray tamigny rano, volon'agnondry zaky mena, vo hysopa izy, dra namafy teo amigny boky vo gny olon'aby. ²⁰ Dra izy nizaka ho: "Tihoky gny lionigny fagneke ze nandidian'Agnahary ho andrareo." ²¹ Manahky anizay koa, dra namafy gny liopny teo amigny tabernakely vo reo pisy raha aby hapesa amigny fanopoa izy. ²² Araky gny lalana, dra saiky gny raha aby gny ho ny voalio taminigny lio. Raha sy misy fandasahan-dio dra sy misy famela-kelok. ²³ Noho izay dra nitaliavy gny tandindo'ireo raha agny an-dagnisy ba ho voalionigny soron'ireo biby reo. Na izay aza, reo raha gny lagnisy mihisy gny tokony ho ny liovy tamigny soro soa. ²⁴ Fa Kristy dra sy nilisy tao amigny toera masy ze nataonigny tagna, ze tandindinigny raiky ze tena izy avo koa. Fa nilisy tagny an-dagnisy mihisy Izy, ba hiseho eo amigny fagnatrehan'Agnahary ho asika amizao. ²⁵ Sy nandeha tao ba hanolosy gny tagnany imaro Izy, manahaky gny fanaonigny pisorombe, ze milisy ao amigny toera masy indrindra isatao niaraky tamigny lionigny hafa. ²⁶ Fa raha izay gny raha niseho, dra tokony nizaly maro nanomboky tamigny fagnoregna anizao totolo izao Izy. Fa amizao dra indray mandeha avo gny fahota amigny alalanigny soronigny vatany avo. ²⁷ Fa natao ho maty ndray mandeha gny olon'aby, dra afaran'izay gny ho avy gny fisara. ²⁸ Manahaky anizay avo koa, Kristy, ze natolosy ndray mandeha ba hangala reo fahotanigny maro, dra hiseho fagnindrony, sy handraraha gny ota, fa ho anigny famoze reo ze mandigny anazy ami-pahareta.