¹ Dra gny fotosy gny raha zakanay dra izao: Isika dra mana pisorombe ze nitoby teo atagna akavananigny seza fiandriagnanigny be voninahisy agny an-dagnisy. ² Izy dra panopo ao amigny toera masy, gny tabernakely mary zay gny Topo, fa sy gny olo, gny nagnorin'anazy. ³ Fa gny pisorombe aby dra nitendre hanolosy fagnomeza vo soro. Noho izay dra taliavy gny mana raha hatolosy. Dra gny teo atany Kristy, dra sy ho pisoro koa Izy, akory misy reo ze manolosy fagnomeza araky gny lalana. ⁵ Ereo dra, manopo ao amigny tabernakely ze tandindo vo aloky gny raha agny andagnisy, Izay dra manahaky gny napitandreman'Agnahary an'i Mosesy raha izy handeha hamboasy tabernakely: Hoy Zagnahary ho: "Atio ba hataonao araky gny modely ze fa naseho anao tegny atendrombohisy gny raha aby." ⁶ Fa amizao Kristy dra nitakasy asa fanopoa soa lavisy. Izay dra noho izy pagnelagnela avo koa amigny fagnekena soa, ze mifehy amigny fapanatena soa koa. ⁷ Fa raha sy nana-signy zay fagneke volohany zay, dra sy nisy nitaliava fagneke faharo koa. ⁸ Fa gny fa nahita tamigny olo Zagnahary, dra hoy Izy ho: "Ingo, ho avy gny andro__hoy gny Topo__gny fa hanao fagneke vaovao amigny olon'Israely vo gny olon'i Joda Zaho. ⁹ Dra sy hanahaky gny fagneke ze nataoko nindray tamigny razan'ereo tamigny andro ze nindesako anereo tamigny tanany hoiala boaky aminy tany Egypta zay. Fa ereo dra sy nitoby tao amigny fagnekeko, dra Izaho sy niraharaha anereo__hoy gny Topo. ¹⁰ Fa izao gny fagneke ze hataoko amigny olon'Israely afaran'ireo andro reo__hoy gny Topo. Hataoko ao asain'ereo gny lalako, dra ho soratiko ao apon'ereo avo koa zay. Ho Zagnaharin'ereo Zaho, dra ereo ho oloko. ¹¹ Ereo dra sy hapianasy gny piaramony dra gny rahalahiny aby, hizaka anizahoky ho: 'Fataro gny Topo.' Fa hahafatasy Anahy gny olon'aby, manomboky amigny masaiky dra hatramigny lahibe amin'ereo. ¹² Fa izaho dra hamindra fo amigny sy fahamarignan'ereo, dra sy hahasiaro reo fahotany sasy." ¹³ Amigny fizaka ho " Vaovao", dra nanao gny fagneke volohany ho taloha izy, dra ze fa lany andro vo atisy dra fa mariny ho velo.