¹ Aoky ho tanandrareo reo didy aby ze omeko andrareo androany, ba ho velo vo hihamaro handrareo, dra handeha dra hahazo gny tany ze nianianan'i Yaveh tamireo razambendrareo. ² Aoky ho saroanao gny lalana aby ze nitarihan'i Yaveh Zagnaharindrareo anao tamigny efapolo tao tagny agnefisy, ba hapietreny anao, ba hisapany anao hahafatara ze ao aponao, raha hita reo didiny anao na sia. ³ Napietry anao Izy, vo naharesy anao, dra namisy mana anao, ze sy fatasao dra sy fatas'ireo razanao. Nataony zay ba hahafataranao fa sy gny mofo avo gny hivelomanigny olo; fa koa, gny raha aby ze aloakigny vavan'i Yaveh dra ivelomanigny olo. ⁴ Sy rivosy dra sy niala taminao gny akazonao, dra sy naba gny tombonao nandris'iregny efapolo tao regny. ⁵ Aoky hanao hihevisy ao aponao, gny fomba hifehezanigny gny olo gny zanany, dra manahaky gny hifehezan'i Yaveh Zagnaharinao anao. ⁶ Hotananao reo didin'i Yaveh Zagnaharinao amigny lalany vo hagnazanao Anazy. ⁷ Fa Yaveh Zagnaharinao dra minday anao amigny tany soa, tanin-dohasakan-driaky, loharano, mikoria avy amireo lohasaka dra egny agnevonigny havoa; ⁸ tanim-barim-bazaha vo vary hordea, voaloboky, hazon'aviavy, dra apongaben-dagnisy; tanin'oliva vo tately. ⁹ Tany ze hihinananao hany sy lany lany, dra ze handehananao sy hisy raha-mahory; tany ze misy vy gny vatony, dra boak'ao amigny havoany gny hialianao varahy. ¹⁰ Hihina hanao dra ho visy, dra hisaotra an'i Yaveh Zagnaharinao hanao nohonigny tany soa ze fa nameny anao. ¹¹ Tandremo ba sy hagnaligno an'i Yaveh zagnaharinao hanao, dra sy hanao sinosino reo didiny, reo fisipiny, dra reo lalany ze handidiako anao androany, ¹² raha sy zay, gny fa mihina hanao dra visy, dra gny fa magnory tragno soa tarehy dra mitoby ao amizay, dra hirehareha gny fonao. ¹³ Tandremo gny fa mihamaro gny agnombinao vo gny agnondry aman'osinao dra mitombo gny volafosy vo gny varahinao, dra mitombo ze aby hanagnanao, ¹⁴ dra hirehareha gny fonao dra halignonao i Yaveh zagnaharinao, ze ninday anao niboaky boak'ao amigny tany Egypta, boak'ao amigny tragno fanandevoza. ¹⁵ Ka magnodidy anazy ze nitariky anao tagny amigny tany efasy lahibe vo mapatahory, mindray amigny menarra misy poizy sy nisy rano, ze namoaky rano ho anao boak'ao amigny vatolapy agnevo. ¹⁶ Namisy mana anao tagny agnefisy Izy ze sy ba fatas'ireo razambenao, ba hahafahany mapietry anao vo misapa anao, ba hagnasoa anao amigny farany, ¹⁷ fa hanao mety hizaka ao aponao ho: 'Gny heriko vo gny herinigny tagnako gny nahazoako harena tahoky aby.' ¹⁸ Fa aoky hahasiaro an'i Yaveh zagnaharinao hanao, akory Izy magnome anao gny hery hahazoa harena; ba hagnoregnany gny fagnekeny ze nianianany tamireo razanao, manahaky anizao zao. ¹⁹ Dra raha hagnaligno an'i Yaveh Zagnaharinao hanao dra hagnaraky zagnahari-hafa, hanopo anereo, dra hekohoky amin'ereo, dra mizoro vavolombelo amindrareo zaho anio fa ho maty vatany handrareo. ²⁰ Manahaky reo firenena ze nataon'i Yaveh ringa teo agnatrehandrareo, dra hanahaky anizay gny haharingan'andrareo, akory sy miteno gny feon'i Yaveh zagnaharindrareo handrareo.