¹ Raha misy fifamalia eo amireo lelahy dra magnagny amigny fisara ereo, dra saran'ireo pisara ereo, dra hafahin'ereo maliolio gny mary dra hasiaha gny rasy fagnahy. ² Raha mendriky gny ho zera gny meloky, dra ho apandrianigny pisara izy dra ho zera eo agnatrehany mindray amigny isanigny zera voatondro,araky gny helony. ³ Mety hagnome zera efa-polo anazy gny pisara, saiky sy afaky mihoasy an'io isa io izy; akory raha magnome mihoasy io isa io izy dra mazera anazy bebe kokoa, dra ho afa-baraka eo amasondrareo reo Israelita namandrareo. ⁴ Ka magnakombo gny vavanigny agnomby aby mihina vary izy. ⁵ Raha misy pirahalahy mindray mipetraky dra maty gny raiky amin'ereo, dra sy nanagnanaky lahy, dra sy mahazo manambaly olo ivelanigny fianakavia gny valinigny lelahy maty. Fa koa, sy maisy mindray mandry aminazy gny zaodahiny dra mangalaky valy anazy, dra manao gny adidy amigny maha-zaodahy anazy. ⁶ Zay dra ba hahombiazanigny teraky volohany ze nandesiny tao atrony amigny agnaranigny rahalahin'io lelahy io ze maty, ba sy ho levon'ao Israely gny agnarany. ⁷ Fa raha sy mana-pagniria gny hangalaky gny valinigny rahalahiny honazy gny lelahy, dra sy maisy magnagny amigny vavahady agny amireo loholona gny valinigny rahalahiny dra mizaka ho: 'Gny zaodahiko dra manda gny hagnome agnara ho anigny rahalahiny eto Israely; sy hanao gny adidinigny zaodahy aminahy izy.' ⁸ Boak'eo reo loholon'eo atanany sy maisy mitoka anazy dra hizaka aminazy. Fa raha atao ho mihizingizy izy dra mizaka ho: 'Sy mana-pagniria hangalaky anazy zaho.' ⁹ Boak'eo gny zaodahiny sy maisy magnaton'anazy eo agnatrehan'ireo loholo, mangalaky gny kapa egny atombony, dra mandrora egny amigny tarehiny. Sy maisy mamaly anazy izy dra mizaka ho: 'Manahaky anizay gny atao amigny lelahy ze sy magnory gny tragnonigny rahalahiny.' ¹⁰ Gny agnarany dra hotokavy ao amin'i Israely ho: 'Gny tragnonigny nala gny kapany.' ¹¹ Raha mialy reo lelahy, dra avy gny valinigny raiky ba hagnavosy gny valiny egny atananize namely anazy, dra raha magnizisy gny tagnany dra mitakasy anazy agny amigny filahiany izy, ¹² dra sy maisy tapahinao gny tagnany; sy tokony hana famindra-po gny masonao. ¹³ Sy tokony hana vatomizana samihafa hanao ao agnaty kitaponao, gny masaiky vo gny lahibe. ¹⁴ Sy tokony hana fandresena samihafa hanao eo atragnonao, gny masaiky vo gny lahibe. ¹⁵ Vatomizana tonga lafasy vo mary gny tokony hanagnanao; fandrefesa tonga lafasy vo marina gny tokony hanagnanao, ba ho lava gny andronao ao amigny tany ze amen'i Yaveh zagnaharinao anao. ¹⁶ Fa reo ze manao raha manahaky anizay aby, gny fa ze manao fihesiky sy apahamarigna, dra fahavetavetan'eo agnatrehan'i Yaveh Zagnahanao. ¹⁷ Tadidio ze nataon'i Amalekita anao tegny an-dala raha niboaky an'i Egypta handrareo, ¹⁸ gny fomba nihognany taminao tegny an-dala vo gny nanafihany gny ilany taminao boak'ao afara, reo ze osa aby tafaranao, gny fa reraky vo sasasy hanao; sy nagnome voninahisy an'Agnahary izy. ¹⁹ Noho zay, gny fa namen'i Yaveh zagnaharinao fisahara tamireo fahavalo nagnodidin'anao hanao, tao amigny tany ze namen'i Yaveh zagnaharinao anao ba ho lova, dra sy tokony halignonao fa sy maisy mamono gny fahasiaronan'an'ireo Amelekita eo ambany lagnisy hanao.