¹ Raha misy lelahy mangala valy dra manambaly anazy, dra rasy sy mahita sitraky eo amasony rapela akory nahita raha sy mety taminazy izy, dra sy maisy manorasy taratasy fagnamariha fisaraha-panambalia aminazy izy, apetraho eo apelatagnany zay dra roaho ao atragnony izy. ² Gny fa niala tao amigny tragnony izy, dra afaky mandeha vo ho valinigny lelahy hafa. ³ Raha malaiky anazy gny valiny faharo dra hanorasy taratasy fagnamariha fisaraha-panambalia, dra apetraho eo apelatagnany zay, dra roaho ao atragnony izy; na raha maty gny valiny faharo, gny lelahy ze nangalay anazy ho valy__ ⁴ dra afasy sy mangalaky valy anazy sasy gny valiny teo aloha, ze volohany nandroaky anazy, gny fa voaloto izy; akory ho fahavetaveta amin'i Yaveh zay. Ka manao ze mahaavy gny tany ho meloky hanao, dra gny tany ze amen'i Yaveh zagnaharinao ho lova. ⁵ Raha misy lelahy vo mangala-baly, dra sy tokony handeha an'aly amindray amigny tafiky izy, na baikoy handeha hanao asa aterovozo; ho afaky hipetraky ao atragnony mandrisy gny heri-tao dra hapifaly gny valiny ze napekary izy. ⁶ Sy misy lelahy mangalaky fikosoham-bary na gny vatony agnabo ho atoky, akory zay dra mangalaky gny ain'olo ho atoky. ⁷ Raha misy lelahy trasy mangalak'akeriny gny raiky amireo rahalahiny ze eo amigny vahoakin'Israely, vo manao anazy hanahaky gny andevo dra hamarosy anazy, dra sy maisy ho maty ze pangalasy anizay; dra hagnafaky gny rasy eo aminao hanao. ⁸ Mitandrema amigny areti-mandringanigny haboka, ba hahafahanao magnara-maso vo magnaraky gny toromariky aby ze name andrareo vo ze napenarin'ireo pisoro, reo Levita andrareo; araky gny nandidiako anereo, dra harahindrareo. ⁹ Sarovy gny nataon'i Yaveh zagnaharinao tamin'i Miriama gny fa avy tagny Egypta handrareo. ¹⁰ Gny fa mapisambo-draha gny piara-belo aminao hanao, dra ka milisy ao atragnony ba hangalaky gny atokany. ¹¹ Hizoro ao ivelany hanao, dra gny lelahy ze napindraminao dra hinday gny atoky hiboaky eo aminao. ¹² Raha lelahy mahatra izy, ka andesy mandry ho fanagnanao gny atokay. ¹³ Fa sy maisy aherinao agny aminazy gny atoky amigny fotoa hiletehanigny masoandro, ba hahafahany mandry ao agnaty lambany dra hitahiany anao; ho fahamarigna honao eo agnatrehan'i Yaveh zagnaharinao zay. ¹⁴ Ka mapahory gny panopo nikarama ze mahatra vo ao agnatinigny sy fahapia, na zanak'ireo Israelita namanao, na reo vahiny ze ao amigny rany ze ao am-bavahadinigny tananao; ¹⁵ omeo anazy isan'andro gny karamany; ka anga ho trasy gny masoandro miletiky zay, akory mahatra izy dra miandrandra anizay. Atovy zay ba sy hitaregnany agny amin'i Yaveh gny aminao, dra ba sy ho fahota ho anao zay. ¹⁶ Gny ray aman-dreny dra sy tokony ho vono noho reo zanany, na gny zanaky ho vono noho reo ray aman-dreniny. Fa koa, gny sirairay aby dra sy maisy vono nohonigny fahotany manoka. ¹⁷ Sy tokony hapiasa hery hanao ba hangala gny rariny amigny vahiny na gny kamboty, na hangalaky gny lambanigny pitondrategna ho atoky. ¹⁸ Fa koa, sarovy fa hanao dra andevo tagny Egypta, dra Yaveh zanaharinao gny namozy anao tagny. Noho zay magnanasy anao hakato anizay didy zay zaho. ¹⁹ Raha miziza gny vokasao agny amigny sakanao hanao, dra raha nagnaligno amboara dra tagny agnahisy, dra ka mihery mangalaky anizay; angao ho anigny vahiny, ho anigny kamboty dra ho anigny pitondratena zay, ba hitahian'i Yaveh zagnaharinao anao amigny asanigny tagnanao aby. ²⁰ Gny fa magnisa gny hazo olivana hanao, dra ka magnery misipon'anireo egny amigny sapany sasy; ho anigny vahiny, ho anigny kamboty, dra ho anigny pitondraregna zay. ²¹ Gny fa mamory gny voaloboky egny amigny tanim-boalobokao hanao, dra ka misipo anizay sasy. Fa ze sisa tavela dra ho anigny vahiny, ho anigny kamboty, dra ho anigny pitondrategna. ²² Sarovy fa andevo tagny amigny tany Egypta hanao; noho zay magnanasy anao hakato anizay didy zay zaho.