¹ Gny fa avy agny amigny tany ze hamen'i Yaveh zagnaharinao ho lovanao hanao, dra gny fa lasanao vo honenanao zay, ² sy maisy alanao gny ilany amigny voloham-bokasy aby eo amigny tany ze nandesan'anao teo amigny tany ze namen'i Yaveh zagnaharinao. Sy maisy hataonao ao agnaty horogna zay dra handeha agny amigny toera ze nisafidin'i Yaveh zagnaharinao ho fitoera masy hanao. ³ Sy maisy mandeha agny amigny pisoro ze hanopo amireo andro reo hanao, dra hizaka aminazy ho: 'Magneky an'i Yaveh zagnaharinao zaho amizao fa zaho dra boak'amigny tany ze nianianan'i Yaveh tamireo razasika ba hame asika.' ⁴ Sy maisy halanigny pisoro eo atagnanao gny horogna dra hapetrany manoloa gny alitaran'i Yaveh zagnaharinao. ⁵ Sy maisy mizaka eo agnatrehan'i Yaveh zagnaharinao hanao ho: 'Syrianina mieziezy gny razambeko. Nandeha nizoso tagny Egypta izy dra nizano tagny, dra kelik'asisa reo vahoany. Tagny gny lahalahibe anazy, nahery, dra firenena be ponona. ⁶ Rasy findesa vo napahory asika reo Egyptiana. Napanoviny gny asan'ireo andevo isika. ⁷ Nitaray tamin'i Yaveh, gny Zagnaharin'ireo razasika isika, dra tenony gny feosika dra hitany gny fahoriasika, gny asasika, dra gny fizaliasika. ⁸ Nandesin'i Yaveh niboaky boak'agny Egypta tamigny tagna mahery isika, tamigny fanizira sandry, vo tamigny fapitahora lahibe, tamigny famatara, dra tamigny fahagaga; ⁹ dra Izy ninday asika tamity toera tihoky vo nagnome asika ty tany tihoky, dra tany ze tondra-dronono vo tately. ¹⁰ Ingo amizao, minday voaloham-bokasy gny tany ze namenao, Yaveh, anahy zaho.' Sy maisy hapetrakoo eo ambany manoloan'an'i Yaveh zagnaharinao zay dra manova fanopoa-pivavaha eo anoloany; ¹¹ dra hanao dra sy maisy miravoravo amize raha soa nataon'i Yaveh zagnaharinao taminao aby, tamigny akohonanao__hanao, vo gny Levita, dra reo pivahiny eo aminao. ¹² Gny fa avy manolosy gny apahafolonigny vokasao aby tamigny tao fahatelo hanao, ze , taonanigny apahafolo-karena, dra sy maisy hamenao ho anigny Levita zay, ho anigny vahiny, ho anigny kamboty, vo ho anigny pitondrategna, ba hahafahan'ereo mihinan'ao agnatinigny vavahadiny gny tananao dra ho visy. ¹³ Sy maisy mizaka eo anoloan'i Yaveh zagnaharinao hanao ho: 'Nandesiko niboaky gny tragno reo raha ze an'i Yaveh, dra nameko gny Levita, gny pivahiny, gny sy manan-dra, vo gny pitondra tegna, araky gny didinao aby ze namenao anahy. Sy nisy nidikako reo didinao, na nihalignoko reo. ¹⁴ Sy nihina tamizay zaho nandrisy gny fandalako, na nataoko tegny ho egny tamigny andronigny fahalotoko, na nameko ho faha-kany hagnaza gny maty. Niteno gny feon'i Yaveh zagnaharinao zaho; nakatoaviko avokoa ze nandidianao anahy aby ba hataoko. ¹⁵ Magnety ambany boak'egny amigny toera masy ze hitoeranao, boak'egny andagnisy, dra tahio reo Israely vahoakao, vo gny tany ze namenao anay, araky ze nianiananao tamireo razanay, dra tany tondra-dronono vo talely.' ¹⁶ Amizao Yaveh zagnaharinao dra mandidy anao ba hakato reo lalana vo didy reo; noho zay dra hitandrin'anazy reo hanao dra hagnaraky anizay amigny fonao manotolo vo gny fagnahinao manotolo. ¹⁷ Nanao fagnambara hanao androany fa Yaveh dra zagnaharinao, dra handeha amigny lalany hanao dra hitandry reo fisipiny, reo didiny, vo reo lalany, dra hiteno gny feony hanao. ¹⁸ Amizao Yaveh dra manao fagnambara fa hanao dra vahoaky ze gnanazy manoko, araky ze napanatenany anao, dra hanao natao hitandry reo didiny aby, ¹⁹ dra hataony ho agnabo noho reo firenena hafa aby ze nataony hanao, dra hanao dra hahazo dera, laza, dra voninahisy. Ho vahoaky voatoka ho an'i Yaveh zagnaharinao hanao, araky ze nizakany."