¹ Tahoky gny didy aman-dalana ze ho tandremanao ao amigny tany ze namen'i Yaveh, zagnahariny gny razanao, ho fanagnanoa, amigny andro aby hiegnandrareo ety atany. ² Ho ravanao vatany gny toeran'aby ze nanopoan'ireo firenena ze ho roahinao reo zagnahariny, ze egny amigny tendrombosy abo, egny amigny havoa, dra egny ambany hazo mavana, ze halanao. ³ Aoky hazeranao gny alitaran'ereo, ho torotoronao reo sangam-bato, dra horoa reo baon'Aserahany. ⁴ Aoky ho tapatapahinao gny sary sokis'ireo zagnahariny dra haringanao hiala amizay toera zay gny agnaran'ereo. Aoky sy hanopo an'i Yaveh Zagnaharinao manahaky anizay hanao. ⁵ Fa ao amigny toera ze ho filin'i Yaveh zagnaharinao eo amireo fokonao ba hametraky gny Agnarany, dra izay gny ho toera honenany, dra agny gny handehananao. ⁶ Agny gny hindesanao gny fagnatisy oroa, gny soronao, gny apahafolo-karena, dra reo rakisy hatolosy gny tagnanao, gny raki-boadinao, gny fanati-sitraponao, dra gny voaloha-teraky gny agnomby vo gny agnondry aman'osy. ⁷ Agny gny hihinanao eo agnatrehan'i Yaveh zagnaharinao vo hiravoravoanao amigny raha aby ze nametrahanao gny tagnanao, dra hanao vo gny akohonanao, agny amize nitahian'i Yaveh zagnaharinao anao. ⁸ Aoky sy hanao reo raha aby ze ataony amizao hanao; fa amizao dra manao ze marin'aby eo amasony avo gny olon'aby; ⁹ akory sy bo avy teo amigny fisahara, eo amigny lova ze amen'i Yaveh zagnaharinao anao hanao. ¹⁰ Fa gny fa mita an'i Jordana hanao dra monin'ao amigny tany ze hapandovan'i Yaveh anao, dra gny fa magnome anao fisaharan'amigny fahavalonao aby magnodidy Izy, ba hiegnanao apilamina, ¹¹ dra ho amigny toera ze ho filin'i Yaveh zagnaharinao ba hahavelo gny Agnarany, agny hanao gny hinday ze handidiako anao aby: dra gny fagnatisy oroa, gny soronao, gny apahafolo-karenanao, dra gny rakisy atolosy gny tagnanao, vo reo raki-boady aby ze safidinao hivoadia amin'i Yaveh. ¹² Hiravoravo eo agnatrehan'i Yaveh Zagnaharinao hanao__hanao, gny zanadahinao, gny zanakapelanao, gny panopo lahinao, gny panopo vavinao dra reo Levita ze ao amigny vavahadinao, akory sy manan'azara na lova eo aminao izy. ¹³ Tandremo soa gny vatano ba sy hanolosy gny fagnatisy oroa egny amigny toeran'aby ze hitanao; ¹⁴ fa eo amigny toera ze ho filin'i Yaveh eo amigny raiky amigny fokonao gny hanoloranao gny fagnatisy oroa, dra agny gny handenanao ba hanao ze handidiako anao aby. ¹⁵ Kanefa, afaky mamono na mihina biby ao agnatinigny vavahadinao aby hanoa, araky ze tianao, amigny fandresa gny fitahian'i Yaveh Zagnaharinao noho ze nameny anao aby; samby afaky mihinan'amizay gny olo maloto vo gny olo malio, dra gny biby manahaky gny gazela vo gny diera. ¹⁶ Fa aoky sy hihina gny liony hanao; hararakao amigny tany manahaky gny rano zay. ¹⁷ Sy mahazo mihina amigny apahafolonigny voanao, gny divay vaovaonao, gny dililonao, na gny voloha-teraky gny agnomby na gny agnondry aman'osinao ao agnatinigny vavahadinao hanao; dra sy mahazo mihinan'amigny hena nataonao soro miakasy amize mety ho voady ataonao, na reo fagnati-sitraponao, na gny fagnatisy ze atolosy gny tagnanao hanaoa. ¹⁸ Fa koa, hohaninao eo agnatrehan'i Yaveh zagnaharinao ao amigny toera ze filin'i Yaveh zagnaharinao zay__hanao, gny zanadahinao, gny zanakapelanao, gny panopo lahinao, gny panopo vavinao, dra gny Levita ze ao amigny vavahadinao; hiravoravo eo agnatrehan'i Yaveh zagnaharinao gny amigny raha aby ze nametrahanao gny tagnanao hanao. ¹⁹ Tandremo soa gny vatanao ba sy hahafo gny Levita raha bo miain'eo amigny taninao koa hanao. ²⁰ Gny fa magnitasy gny sisi-taninao Yaveh Zagnaharinao, araky ze napanatenany anao, dra nizaka hanao ho: 'Hihina nofo zaho,' nohonigny fagnirianao hihina-kena, dra afaky mihina-kena hanao, araky ze irinigny fagnahinao. ²¹ Raha lavisy anao loasy gny toera ze nifilin'i Yaveh zagnaharinao hametraha gny agnarany, dra aoky hanao hamono gny ilany amigny agnomby vo gny agnondry aman'osinao ze namen'i Yaveh anao, araky ze nandidiako anao; afaky mihina ao amigny vavahadinao hanao, araky ze irinigny fagnahinao. ²² Manahaky gny hihinana gny gazela vo gny diera, dra manahaky anizay gny hihinananao amizay; afaky mihina-kena amizay manahaky anizay gny olo maloto vo malio. ²³ Tandremo fosiny ba sy hihina gny lio hanao, fa ay gny lio; dra aoky sy hihina gny ay mindray amigny hena hanao. ²⁴ Sy hihina an'izay hanao; ararakao eo amigny tany manahaky gny rano zay. ²⁵ Sy hihina anizay hanao, ba ho lavorary gny aminao, vo gny taranaky mandimby anao, gny fa manao ze mary eo amason'i Yaveh hanao. ²⁶ Fa reo raha ze an'i Yaveh ze hanagnanao vo reo raki-boadinao__aoky hanao hangalaky anizay dra handeha agny amigny toera ze safidin'i Yaveh. ²⁷ Agny gny hanoloranao gny fagnatisy oroa, dra gny hena vo gny lio, eo amigny alitaran'i Yaveh zagnaharinao; hararaky eo amigny alitaran'i Yaveh zagnaharinao gny lionigny soronao, dra hohaninao gny nofon'izay. ²⁸ Tandremo dra tenoy gny zaka gny fa ze handidiako anao, ba ho lavorary gny aminao vo gny taranaky mandimby anao mandrakizay, gny fa manao rasy vo maryn'eo amason'i Yaveh zagnaharindrareo handrereo. ²⁹ Gny fa mandringa reo firenena sy ho eo anoloanao i Yaveh zagnaharinao, gny fa mandeha ba hangalaky anizay amin'ereo hanao, dra azonao zay, dra monin'ao amigny tanin'ereo hanao, ³⁰ dra tandremo gny vatanao ba sy ho voafandriky hagnaraky anereo, gny fa voaringa hiala eo agnatrehanao ereo__ho voafandriky hagnety gny zagnaharin'ereo, hagnotany ho: 'Nagnino gny fanopoan'ireo firenena reo gny zagnahariny? Ba hanao manahaky anizay koa zaho.' ³¹ Aoky hanao sy hanopo an'i Yaveh zagnaharinao manahaky anizay, fa fahavetaveta eo amin'i Yaveh zay, dra raha halany__nanao anizay tamireo zagnahariny ereo; dra nagnoro gny zanak'ereo lahy vo vavy tamigny afo ho anigny zagnaharin'ereo mihisy aza. ³² Na ino na ino handidiako anao, dra tandremo zay. Ka magnapy na mangalaky amizay.