¹ Hoy Yaveh taminahy tamizay fotoa zay ho: 'Mamboara vato pisaky ro manahaky gny voalohany, dra mekary aminahy atiky atendrombohisy, dra manova fiara vita amigny hazo. ² Hosoratiko ao agnatin'ireo vato pisaky reo gny zaka ze tao agnatin'ireo vato pisaky volohany ze nipotehinao, dra hapetrako ao agnatinigny fiara reo.' ³ Ko namboasy fiara tamigny hazo akasia zaho, dra namboasy vato pisaky ro manahaky gny volohany zaho, dra niakasy tegny atendrombohisy zaho, niakasy tamireo vato pisaky ro tegny atagnako. ⁴ Nisoratiny tamireo vato pisaky gny asa sorasy voalohany, gny folo ze nizakan'i Yaveh tamindrareo tagny atendrombohisy teo agnevonigny afo tamigny andronigny fivoria; dra name'i Yaveh anahy reo. ⁵ Dra nihodidy zaho dra nizoso gny tendrombohisy, dra nametraky reo vato pisaky tao agnatinigny fiara ze namboariko; dra tao ereo, araky gny nandidian'i Yaveh anahy.'' ⁶ (Nienga niala tao Berota Bene-Jakana ho agny Mosera gny vahoakin'Israely. Maty tao i Arona, dra tao izy gny nalevy; Eleazara, zanadahiny, gny lasa pisoro nandimby gny toerany. ⁷ Nizosy nagnagny Godgoda ereo gny fa niala tao, dra boak'ao Godgoda nagnagny Jotbata, tany raiky be ony. ⁸ Tamizay fotoa zay Yaveh nisafidy gny fokon'i Levy ba hinday gny fiaranigny fagneken'i Yaveh, hizoro eo anoloan'i Yaveh ba hanopo Anazy, vo hiso-drano gny olo amigny agnarany, manahaky gny amizao. ⁹ Noho zay gny sy hanagnan'i Levy azara gny lova amigny tany miaraky amireo rahalahiny; fa Yaveh gny lovany, araky ze nizakan'i Yaveh Zagnaharinao taminazy.) ¹⁰ Nitoby tao atendrombohisy manahaky gny tamigny voalohany zaho, efapolo andro efapolo hariva. Niteno anahy avo koa Yaveh tamizay fotoa zay; sy nagniry gny handringan'anao Yaveh. ¹¹ Hoy Yaveh taminahy ho: 'Miarena, mandehana eo alohanigny vahoaky hitariky anereo amigny liany. Dra hilisy ereo dra hangalaky gny tany ze fa nianianako tamireo razambeny fa hame anereo.' ¹² Ko amizao, ry Israely, ino moa gny angatahin'i Yaveh zagnaharinao aminao, afa-sy gny fatahora an'i Yaveh zagnaharinao, gny handehana amigny lalany aby, gny hitianan'anazy, dra gny hanopoan'an'i Yaveh zagnaharinao amigny fonao manotolo, ¹³ gny fitandrema reo didin'i Yaveh, vo reo lalany, ze handidiako anao amizao ba ho soa honao manoka? ¹⁴ Ingo, Yaveh zagnaharinao gny toponigny lagnisy vo gny lagnisy gny lagnisy, gny tany, vo ze ao amireo aby. ¹⁵ Yaveh raiky avo gny nakasitraky reo razanao nohonigny fitiavany anereo, dra nifily andrareo Izy, hanao taranany, tafaran'ereo, mihoasy noho reo olo hafa, manahaky gny ataony mandrak'amizao. ¹⁶ Ko forao gny fondrareo, dra meteza sy ho maty hatoka sasy. ¹⁷ Fa Yaveh zagnaharinao, gny zagnahan'ireo zagnahary vo toponireo topo, gny zagnahary lahibe, gny mahery vo mapatahosy, ze sy magnety tarehon'olo dra sy mitakasy kolikoly. ¹⁸ Magnome rariny gny kamboty vo gny magnanovata Izy, dra maneho fitiava vo vahiny amigny alalanigny fagnomeza hany vo akazo honazy Izy. ¹⁹ Tiavo gny vahiny noho zay; akory handrareo dra fa vahiny tagny amigny tany Egypta. ²⁰ Yaveh zagnaharinao gny hatahoranao; Izy gny ho toponao. Aminazy hanao gny sy maisy hifikisy; dra amigny agnarany gny hianiananao. ²¹ Izy gny fideranao, dra Izy gny Zagnaharinao, ze fa nanao reo zava-dehibe vo reo raha mapatahosy honao, ze fa hitanigny masonao. ²² Fitopolo olo reo razanao gny nizoso tagny Egypta; fa amizao fa nataon'i Yaveh Zagnaharinao ho maro isa manahaky gny kitan'egny amigny lagnisy hanao.