¹ Fa nisy lelahy raiky natao i Ananisy, niaraky tamin'i Safira valiny, namarosy azara tany, ² dra nitanany gny ilany tamireo vola viliny (gny valiny nahay anizay avo koa), dra ninday gny apahany hafa tamizay vo nametraky anazy teo atombokireo apostoly. ³ Fa Petera nizaka ho: "Ananiasy, nagnino gny nifenon'i Satana vandy gny avo havandy amigny Fagnahy Masy, vo hita gny apahany tamigny vili-tany? ⁴ Gny bo sy lafo zay, sy nizano ho fanagnanao manoka ra zay, dra gny fa lafo zay, sy teo amigny fahefanao ra zay? Nagnino gny nieriseretanao anizay raha zay teo amigny fonao? Sy navandy tamigny olo hanao, fa tamin'Agnahary." ⁵ Gny fa nahare reo zaka reo, dra lavo tamigny tany Ananiasy dra afaky gny ainy, dra tahosy lahibe gny nahazo anize teo rahare anizay. ⁶ Dra reo tovolahy dra nisoro dra namogno lamba anazy, dra nandesin'ereo niboaky izy dra nalevy. ⁷ Tafaranigny ora telo teo ho eo, dra nilisy gny valiny, bo sy nahafatasy ze nitranga. ⁸ Petera nizaka taminazy ho: "Zakao anahy raha zay gny namarotandrareo gny tany." dra hoy izy: "Eh, noho izay." ⁹ Boak'eo i Petera nizaka anazy ho: "Nagnino handrareo gny nagneky hiara-hisapa gny Fagnahinigny Topo? Ingo, reo tombon'ireo olo ze nandevy gny valinao dra eo ambatranga, dra hamoaky anao ereo. ¹⁰ Dra lavo teo noho eo teo amigny tombony ze dra afaky gny ainy. Gny fa nilisy tao reo tovolahy, dra nahita anazy maty, dra ninday anazy niboaky vo nandevy gny fengona manotolo, vo reo ze nahare anizay raha zay aby. ¹² Famatara vo fahagaga maro gny niseho tamireo vahoaky tamigny alalanigny tagnan'ireo Apostoly. Niaraky teo amigny fialofan'i Salomona ereo. ¹³ Fa sy nisy olo hafa nana fahavania hiaraky amin'ereo; kanefa, gny vahoaky dra nanandrasy fakasitraha abo anereo. ¹⁴ Dra vo maiky nihamaro reo pino ze nagnapy isa gny Topo, andian'dehilahy vo apela, ¹⁵ dra nandesin'ereo tegny an-dala hatramigny marary dra napandren'ereo teo agnabony fandria, dra ba gny fa mandalo i Petera, dra mety ba hagnaloky gny ilany amin'ereo gny alokiny. ¹⁶ Teo avo koa dra maro gny vahoaky gny nindray avy boaky ao amireo tana magnodidy any Jerosalema, ninday gny marary vo reo ze napahorinigny fagnahy maloto, dra sitra ereo aby. ¹⁷ Fa nisanga gny pisorom-be, vo reo ze niaraky taminazy (ze sekta an'ireo Sadoseo); dra feno felogna ereo ¹⁸ dra nanambosy an-keriny reo Apostoly, dra napilisy anereo tagny an-tragno mezy. ¹⁹ Dra nandrisy gny hariva dra nisy azelinigny Topo nanokaky gny vatrangaranigny foza dra namoaky anereo tao, vo nizaka ho: ²⁰ "Mandehana, misangana amigny ao amigny tepoly vo mizaka amigny olo reo zaka amity fiegna tihoky." ²¹ Gny fa nahare anizay ereo, dra nilisy tao amigny tepoly ereo raha vo maray gny andro dra napianasy. Fa avy gny pisorom-be, vo reo ze niaraky taminazy, dra nitoka gny fila-kevisy aby, reo loholonigny Israely aby, dra nalefa tagny apoza ba hamoaky reo apostoly. ²² Fa nony avy gny piamby raharaha dra sy nahita anereo tao apoza, dra nihery ereo vo nitatisy ho: ²³ "Nahita gny tragno mezy nihily soa zahay vo gny piamby dra nizoro niamby teo am-batrangara, fa gny fa nisokafinay zay, sy nahita olo tao agnatiny ao zahay." ²⁴ Dra gny fa nahare gny lahibenigny piamby gny tepoly vo reo pisorom-be dra very hevisy tateraky ereo nahakasiky gny raha mety hitranga. ²⁵ Fa nisy olo avy dra nizaka tamin'ereo nanao anizahoky ho: "Reo lelahy ze nataondrareo tao atragno mezy dra nisanga ao amigny tepoly dra napianasy gny vahoaky." ²⁶ Dra lasa lahibenigny piamby niaraky tamireo piamby raharaha, dra ninday anereo nihery, fa sy tamigny herisetra, akory natahosy gny vahoaky ereo fa dra ho torahy vato. ²⁷ Gny fa ninday anereo ereo, dra nandefa anereo teo agnatrehanigny fila-kevisy. Nagnadihady anereo gny pisorom-be, ²⁸ nizaka ho: "Niraranay fatrasy handrareo ba sy hapianasy amin'io agnara io, kanefa, nifenondrareo gny fapenarandrareo i Jerosalema, dra tiandrareo ho topon'andrekisy amigny lion'io lelahy io zahay." ²⁹ Fa i Petera vo reo apostoly namaly ho: "Zahay dra tokony hagneky an'Agkknakhary nohonigny olo. ³⁰ Gny Zagnaharnigny razanay nananga an'i Jesosy, ze nivonondrareo tamigny fagnatonga anazy teo amigny hazo. ³¹ Zagnahary nanandrasy ba ho Topo vo ho pamozy, ba hagnome fibebaha ho an'Israely, vo ho famela gny heloky. ³² Zahay dra vavolombelo gny amizay raha zay, vo eo avo koa gny Fagnahy Masy, ze namen'Agnahary ho an'ireo magneky anazy. ³³ Raha nahare anizay reo tao amigny fila-kevisy, dra ory ereo vo teho namono reo apostoly. ³⁴ Fa nisy Fariseo raiky atao i Gamaliela, papiana-dalana, ze nihazanigny olon'aby, nisanga dra nandidy reo apostoly ba hala. ³⁵ Dra izy nizaka tamin'ereo ho: "Lelahy Israely, tandremo soa gny amigny raha ze hataondrareo miaraky amireo olo reo. ³⁶ Fa taloha agny, Teodasy nizaka gny vatany hanagnay, dra vondron'olo, tokkny ho efa-zato, nagnoriky anazy. Nivono izy, dra reo ze nagneky anazy aby dra nipetraky vo lasa sinosino. ³⁷ Boak'eo io lelahy io, Jodasy boaky a Galilia agny dra nisanga tamigny andronigny fagnisa vo nitao olo maromaro hagnaraky anazy. Izy avo koa dra nivono, dra reo ze nagneky anazy aby dra niparitaky. ³⁸ Amizao dra zakako amindrareo, magnalavisy anireo lelahy reo dra angao raiky ereo, fa raha aboaky amigny olo io asa io, dra ho foa zay. ³⁹ Fa raha avy amin'Agnahary koa, dra sy ho azondrareo foagna reo; mety ho hitandrareo aza fa mialy amin'Agnahary handrareo." Dra resy lahasy ereo. ⁴⁰ Dra nitoka anireo apostoly hilisy ereo dra nazera vo nandidy anereo sy hizaka amigny agnaran'i Jesosy, dra namela anereo handeha. ⁴¹ Ereo dra nagnenga gny fila-kevisy tapifalia akory mendriky gny hinday fahafaham-baraka ho anigny Agnara. ⁴² Tao afaran'izay isan'andro, sy nisahasy napianasy vo nitory an'i Jesosy ho Kristy ereo, teo akiazanigny tepoly vo tamigny tragno maro.