¹ Gny fa tapisy gny tabataba, namory reo pianasy i Paoly dra napahery anereo boak'eo, nana veloma anazy dra lasa ba handeha ho agny Mekedonia. ² Gny fa nandeha tegny amireo farisy reo izy vo nanao zaka fakahereza maro anereo, dra avy tagny Gresia izy. ³ Gny fa nizano telo vola tao izy, nisy teti-drasy niforogninireo Jiosy hagnoregna anazy raha izy handeha hitikisy sambo ho agny Syria igny, dra nanapa-kevisy gny hihery ho agny Mekedonia izy. ⁴ Nagnaraky anazy hatragny asia lavisy agny i Sopatera zanadahin'i Pyro voak'agny Beria; Aristarko vo Sekondo, samby boaky Derbe agny; Tymoty, vo i Tykiko vo i Trofimo boak'agny Asia. ⁵ Fa reo lelahy reo fa nialoha anay dra nandigny anay tagny Troasy. ⁶ Niondra asambo niala tao Filipy zahay tafaranigny andro fihinana mofo sy masy, dra tao agnatinigny dimy andro dra avy tagny amin'ereo tagny Troasy zahay. Dra nitoby tao zahay nandrisy gny fito andro. ⁷ Tamigny andro volohanigny herignandro, gny fa niango niaraky ba hanapaky gny mofo zahay, dra nizaka tamireo pino i Paoly. Izy dra nikasa handeha hatramigny sasakaly izy. ⁸ Nisy ziro maro tao amigny efisy ambony ze nahavianay niaraky. ⁹ Teo amigny vatrangarakely gny nipetraky ty tovolahy tao agnaty torimaso laliky. Raha nizaka naharisy i Paoly, io tovolahy io, dra bo nandry, tafalasaky boak'egny amigny riha fahatelo dra nony nareny izy dra hita fa maty. ¹⁰ Fa i Paoly nizoso, dra namehy gny vatany teo aminazy, dra namehy anazy. Boak'eo izy nizaka ho: "Ka malahelo sasy, fa velo izy." ¹¹ Dra niakasy ndraiky izy boak'eo dra nanapaky gny mofo vo nihina. Gny fa boaky nizaka eia tamin'ereo hatramigny mangiran-drasy izy, dra nandeha. ¹² Ninday gny tovolahy fa velo nihery ereo dra tena faly dra faly. ¹³ Isika mihisy gny nandeha nialohan'i Paoly tamigny sambo dra nitikisy sambo ho agny Aso, fa agny gny kasanay handresa an'i Paoly. Zay gny fagniria izy vatany hatao, akory nagniry handeha androanga izy. ¹⁴ Gny fa nihao taminay ta Aso agny izy, dra nandesiny tamigny sambo izy dra nangagny Mitylena. ¹⁵ Boak'eo nitikisy sambo boak'eo zahay dra avy tao amigny tandrifinigny nosin'i Kio gny maraindray. Gny andro magnaraky dra nitokavako tao amigny nosinigny Samo zahay, dra gny marainigny dra avy tao amigny tanan'i Mileto. ¹⁶ Fa Paoly nanapa-kevisy gny hitikisy sambo handalo an'i Efesosy, ba sy handany fotoa ela agny Asia izy; akory izy dra mieky gny ho agny Jerosalema gny andronigny Pentekosta, raha azony atao gny manao ankikzay. ¹⁷ Boak'agny Mileto gny nandefasako lelahy ho agny Efesiosy dra napitoka gny loholonigny fengona hagneo aminazy. ¹⁸ Gny fa avy aminazy ao ereo, dra nizaka tamin'ereo izy ho: "Handrareo vatandrareo gny mahafatasy, hatramigny andro volohany nagnisahako an'o Asia, hanahaky gny akory gny nandaniako gny fotoako niaraky tamindrareo. ¹⁹ Izaho dra nanopo hatramigny Topo tamigny fanetre-tegna vo ranomasom, dra tao agnaty fijalia gny nitranga taminahy izay nohonigny teti-drafis'asa ny Jiosy. ²⁰ Handrareo dra mahafatasy fa sy nita fahangina tamigny fagnambara tamindrareo reo aby ze nalany zaho, vo gny fomba napenarako andrareo teo amason'olo dra tamigny isan-tragno, ²¹ nizoroako vavolombelo teo amireo Jiosy vo reo Jentilisa momba gny fibebaha amin'Agnahary vo gny finoa ao amin'i Jesosy Toposika. ²² Ingo amizao, ho agny Jerosalema zaho, niterenigny Fagnahy Masy dra sy mahay anize hahazo anahy agny, ²³ fa sy ze hapitandremanigny Fagnahy Masy zaho isaky gny tana-dehibe amireo famahea vo fizalia ze mandigny anahy. ²⁴ Fa izaho dra sy mihevisy gny fiegnako ho sarobidy amigny hazakako vo gny asa fanopoako ze hazakazakako vo gny asa fanopoa ze nitakariko baoky amin'i Jesosy Topo zaho, hizaka gny filazasaranigny fahasoan'Agnahary. ²⁵ Dra ingo amizao, fatasao fa handrareo aby, ze nizakako gny fazaka, gny sy hahita gny tarehiko sasy. ²⁶ Noho izay zakako amindrareo amity andro tihoky, fa izaho dra sy mana-signy amigny lionigny olo. ²⁷ Fa sy navoniko tamindrareo gny fagnambara gny sitrapon'Agnahary aby. ²⁸ Noho izay tandremo gny mombanigny vatandrareo, vo gny momban'ireo agnondry aby ze napandreketinigny fagnahy masy andrareo. Mitandrema amigny piamby agnondrinigny Fengonan'Agnahary, ze niviliny tamigny liony manoka. (Fagnamariha: raha toaky ka "tamigny liomanoka" gny amigny atota taratasy faela dra mivaky ho: " Tamigny lionigny zanadahiko manoka.) ²⁹ Fataso fa afaranigny fandehanako, dra ho avy eo amindrareo gny amboamola masiaky dra sy hiatra anireo agnondry. ³⁰ Fataso fa nka dre avy amindrareo aza dra hisy olo ho avy dra hagnova gny mary ba hitariky reo pianasy hagnaraky anereo. ³¹ Ko membena. Sarovy fa nandrisy gny telo tao zaho gny sy nizano napianasy gny sirairay boaky amindrareo andro aman'aly tamigny ranomaso. ³² Amizao akiniko amin'Agnahary vo amigny zakanigny fahasoavany handrareo, ze afaky mananga vo magnome andrareo gny lova eo amireo aby ze nihamasigny. ³³ Sy nisiririsy volafosy, volamena, na lamban'olo zaho. ³⁴ Handrareo vatandrareo gny mahafatasy ze nitaliaviko vo reo nitaliavin'ereo ze niaraky taminahy. ³⁵ Tamigny raha-haby gny nagnomezako ohasy andrareo gny fomba tokony hagnapiandrareo reo malemy amigny alalanigny asa, dra gny fomba hitaliabvandrareo gny zakan'i Topo Jesosy, zaka ze zinakany izy vatany ho: "Mahasambasy kokoa gny magnome noho gny mitakasy." ³⁶ Gny fa nizaka manahaky anizay izy, dra nandohaliky vo nivavaky niaraky tamin'ereo aby. ³⁷ Nisy fitomagniam-be teo vo namihy an'i Paoly vo nanoraky anazy ereo. ³⁸ Nalahelo gny maro tamizan'ereo noho ze natenany, ho: ereo dra sy hahita gny tarehiny sasy. Boak'''eo nagnatisy anazy tegny amigny sambo ereo.