¹ Gny fa niala teo amin'ereo izahay dra nitikisy sambo, dra nizosy lala-mahisy nagnagny amigny tanan'i Kosy, nagnagny amigny Tanan'i Rody gny andro magnaraky, vo avy ao dra nagna amigny tanan'i Patara. ² Gny fa nahita sambo nisaky Foinika zahay, dra nilisy tao zahay dra nitikisy sambo. ³ GNy fa boaky nahita an'i Kyprosy, dra nagnenga anizay tegny apitanigny sambo, nitikisy sambo ho agny Syria zahay vo nitikisy sambo ta Tyro ao, toera ze namohanireo tasambo gny eta tao agnaty sambo ao. ⁴ Raha vo nahita anireo pianasy zahay, dra nizano tagny nandrisy gny fito andro. Tamigny alalanigny Fagnahy dra nandresy lahasy an'i Paoly hatragny ereo ba sy handeha ho a Jerosalema agny. ⁵ Gny fa tapisy gny andronay tegny, dra niala tao zahay dra nandeha tamigny lalanay, vo ereo aby, niaraky tamireo valy ama-nanaky, nagnaraky niboaky tao amigny tana. Dra nandohaliky tegny amorondranomasy dra nivavaky ⁶ dra nifanao veloma. Dra nilisy tao asambo zahay, dra ereo nihery tagny atragnony. ⁷ Gny fa vitanay gny lia tagny Tyro, dra avy a Ptolemaisy agny zahay. Tagny dra nihao tamireo rahalahy vo nizano andro raiky niaraky tamin'ereo. ⁸ Gny maraindray dra niala tao zahay dra nandeha tagny Sezarea. Nilisy gny tragnon'i Filipo isika, evazelista, raiky tamireo fito, dra nizano niaraky taminazy zahay. ⁹ Amizao io lelahy io dra nanagnanaky apela virziny efasy ze naminany. ¹⁰ Gny fa nizano tao nadrisy gny andro maromaro tao zahay, dra nisy paminany raiky nizoso boak'agny Jodia natao i Agabo zay. ¹¹ Nagnato anay dra nangalaky fehitrokin'i Paoly izy. Taminigny gny namotorany gny tombony vo gny tagnany dra nizaka ho: "Hoy gny Fagnahy Masy,' dra hanahaky anizao gny hamosoran'ireo Jiosy agny Jerosalema gny lelahy ze topon'ity fehitroky tihoky, dra hanolosy anazy eo agnatrehan'ireo Jentilisa." ¹² Gny fa nahare anizay raha zay zahay, dra zahay vo reo olo mony tao amin'io toera io dra niangavy tamin'i Paoly sy niakasy ho agny Jesosalema. ¹³ Dra namaly i Paoly nanao ho: "Ino gny ataondrareo, mitomagny vo mandrasy gny foko? Izaho fa vonona, sy ho fahe fosiny avo, fa ho maty agny Jerosalema avo koa amigny agnaran'i Topo Jesosy." ¹⁴ Akory sy nagniry gny horesen-dahasy i Paoly, dra nizano nagnandra zahay dra nizaka ho: "Aoky ho tateraky gny sitraponigny Topo." ¹⁵ Tao afaran'ireo andro reo, dra ninday gny kitaponay zahay dra niakasy nagnagny Jerosalema. ¹⁶ Dra nisy reo pianasy ilany avo koa boaky agny Sezarea nagnoriky anay. Ninday lelahy raiky niaraky tamin'ereo natao ho i Menasona, lelahy boaky a Sipra agny, pianasy mety molaly, ze tokony hindresanay mitoby. ¹⁷ Gny fa avy boaky a Jerosalema agny zahay,dra nitakasy kanay apifalia reo rahalahy reo. ¹⁸ Gny maraindray dra nagnaraky anay i Paoly ho agny amin'i Jakoba, dra teo aby reo loholon'aby. ¹⁹ Gny fa boaky niarahaba anereo izy, dra nitatisy siraidraiky reo raha reo aby ze fa nataon'Agnahary tamireo Jentilisa tamigny alalanigny asa fanopoanay. ²⁰ Gny fa nahare anizay ereo, dra nidera an'Agnahary, dra nizaka taminazy ho" Hitanao, ry rahalahy, agnarivony firy gny nino tamireo Jiosy. Tapa-kevisy izy aby hitandry gny lalana. ²¹ Fa nizakan'ereo gny momba anao, fa hanao dra mapianasy reo Jiosy aby ze mitoby eo amireo Jentilisa hahafo an'i Mosesy, dra hanao mizaka anereo sy hanapaky gny zanany, dra sy hagnaraky gny fomba taloha. ²² Ino gny tokony hataosika? Ho ren'ereo tokoa fa avy hanao. ²³ Ko atovy ze zakany aminao. Mana lelahy efasy ze nanao voady zahay. ²⁴ Andeso reo lelahy reo dra liovy miaraky amin'ereo gny vatandrareo, dra aloavo gny fandanian'ereo, ba hagnarasy gny lohany ereo,. Dra ho fatasy gny olon'aby fa reo raha ze nizaka momba andrareo dra diso. Ho fatas'ereo fa hanao dra magnaraky lalana avo koa. ²⁵ Fa mikasiky reo Jentilisa ze nino, zahay dra nanorasy vo nagnome torolala fa tokony hitandry gny vatany amigny raha vita soro ho anigny sapy ereo, boaky amigny lio, avy amizay nikenda, vo avy amigny fizangazanga. ²⁶ Boak'eo dra nalan'i Paoly reo lelahy, dra gny maraindray, izy nagnalio gny vatany niaraky tamin'ereo, nivily tao atepoly, nizaka gny vanipotoanigny andronigny fagnaliova, mandra-pagnatisy gny fagnatisy ho anigny olo sirairay tamin'ereo. ²⁷ Gny fa ho tapisy gny andro fito, reo Jiosy ilailany boakyb a Asia, nahita an'i Paoly tao atepoly, napikorota reo vahoaky manotolo, dra nanambosy anazy. ²⁸ Nitabataba ereo ho: "Ry olon'Israely, apio zahay". Io gny lelahy igny ze napianasy gny olon'aby hatreza reo raha ze manohisy gny olo, gny lalana, vo ty toera tihoky. Fagnapin'izay ninday Grika tao atepoly avo koa izy dra nandoto aty toera masy tihoky. ²⁹ "Fa ereo teo aloha nahita an'i Trofima ze Efezianina niaraky taminazy tao atana dra nieriserisy ereo fa i Paoly gny ninday anazy tao atepoly. ³⁰ Nifagnaritaky gny tana aby, dra niaraky nihazakazaky vo nanambosy an'i Paoly gny olo. Nanito anazy hiboaky ao amigny tepoly ereo. ³¹ Raha teo apamonoa anereo izy, dra nisy vaovao avy tagny amigny kapiteninigny piamby fa mikorota avokoa Jerosalema raiky manotolo. ³² Avy hadragny dra nangalaky maramila vo kapiteny izy dra nihazakazaky nizoso nagnagny amireo vahoaky. Gny fa nahita gny kapiteny vo reo maramila gny vahoaky, dra nizano nizera an'i Paoly ereo. ³³ Dra nagnato gny kapiteny dra nanambosy an'i Paoly, dra nasany nifahe tamigny rozo vy ro izy. Dra nagnotany izy ho iza izy ino gny nataony. ³⁴ Gny ilany tamireo vahoaky nitabataba raha raiky vo raha hafa. Akory sy afaky nizaka na ino na ino gny kapiteny, dra nasany nandesy ho agny amigny rova i Paoly. ³⁵ Gny fa avy teo amigny tohasy izy, dra nandesinireo maramila izy noho gny herisetranigny vahoaky. ³⁶ Fa nagnaraky tao afara gny vahoaky be dra nanohy nihorakoraky ho: "Vonoy Izy" ³⁷ Gny fa ho nandesy tao androva igny i Paoly, dra hoy izy tamigny Kapiteny: "Afaky mizaka raha aminao ra zaho?" Hoy gny kapiteny ho: "Mizaka Grika ra hanao? ³⁸ Sy hanao ra gny Egyptiana, ze nitariky fikomia taloha agny vo nitariky reo efasy arivo lahy anigny pamono olo niboaky boaky agny agnefisy?" ³⁹ I Paoly dra nizaka ho: "Izaho dra Jiosy, boaky amigny tanan'i Tarsosy agny Kiliaka. Izaho dra olo-pirenenigny tana manan-daza. Mangataky aminao zaho, angao zaho hizaka amigny olo." ⁴⁰ Gny fa nagnenga anazy hizaka gny kapiteny, dra nisanga teo amigny tahosy i Paoly dra nanao fihesiky tamigny tanany tamigny vahoaky. Gny fa nisy fahangina, dra nizaka tamin'ereo tamigny fizaka hebreo izy. Hoy izy: