¹ Dra gny bo tagny Korinty i Apolosy, dra nandalo tamigny firenena ambony 'i Paoly dra avy amigny tananigny Afesosy, dra nahita pianasy ilany tao. ² Hoy Paoly tamin'ereo ho: "Nahazo gny Fagnahy Masy ra handrareo gny fa nino?" Hoy ereo ho taminazy ho: "Oho, bo sy nahare momba gny Fagnahy Masy ndraiky zahay." ³ Paoly nizaka ho: "Tao amigny ino jmoa zay gny nanova batisa andrareo?" Namaly ereo ho: "Tao amigny batisan'i Jaona." ⁴ Dra namaly Paoly ho: "Jaona manao batisa amigny batisanigny fibebaha. Nizaka tamigny vahoaky izy dra tokony hino gny raiky ze ho avy afara ereo, zay dra ao amin'i Jesosy. ⁵ Gny fa nahare anizay gny olo, dra natao batisa tamigny agnaranigny Topo Jesosy ereo. ⁶ Boek'eo gny fa nametraky gny tagnany tamin'ereo i Paoly, dra nilasaky tamin'ereo gny fagnahy masy vo nizaka tamigny fizaka hafa vo naminany ereo. ⁷ Teo amigny ro ambiny folo teo ho eo izy aby. ⁸ Nilisy tao amigny sinagoga i Paoly dra nizaka apahavania nandrisy gny telo vola, nandresy lahasy vo napagneky anereo gny momba gny fazakan'Agnahary. ⁹ Fa gny fa fatra-po vo sy nakato reo Jiosy ilany, dra nanomboky nizaka rasy gny lala teo anoloanigny vahoaky ereo. Dra nangan'i Paoly ereo dra nandesiny reo pianasy, nandresy lahasy anereo isan'andro tao amigny efitragno fapenaranigny Tiraniana. ¹⁰ Nitihy nandrisy gny ro tao zay, dra ze nipetraky tao Asia dra nahare gny zakanigny Topo, dra reo Jiosy vo reo Grika. ¹¹ Zagnahary nanao asa mahagaga tamigny alalanigny tagnan'i Paoly, ¹² na dre mosoara vo aron'akazo ze nikasiky anazy aza dra natao tamigny marary dra sitrany gny aretin'ereoreo Fagnahy rasy. ¹³ Fa nisy Jiosy pangala-pagnahy rasy nandeha tegny atoera. Nitoka gny agnaranigny Topo Jesosy ereo ba hanagnan'ereo hery hanohera gny fagnahy rasy aby nizaka ereo ho: "Amigny alalan'i Jesosy ze zinakan'i Paoly, mandidy anao zaho ba hiboaky gny agnarany ho Skeva vo nanagnanaky fito lahy gny nanao anizay. ¹⁵ Nisy fagnahy rasy namaly anereo ho: "Fataso Jesosy, dra fataso i Paoly; fa iza handrareo?" ¹⁶ Gny fagnahy rasy tao amigny lelahy igny dra nisapy tamireo pandroaky devoly dra nienga tao amigny tragno nifahasy vo narasy. ¹⁷ lasa fatasy gny olo aby zay, vo reo Jiosy vo gny Jentilisa, ze nipetraky tagny Efesiosy. Lasa natahosy fatrasy ereo, dra gny agnaranigny Topo Jesosy dra namem-boninahisy. ¹⁸ Dra maro tamigny pino gny nagnato vo nibebaky dra nagneky gny raha rasy ze vitan'ereo. ¹⁹ Maro reo nihira oly gny nindray ninday gny bokin'ereo vo nagnoro anizay teo amasonigny sirairay. Gny fa nagnisa gny tombom-bilinigny ereo, dra fatasy volafosy dimy aly zay. ²⁰ Dra niely fatrasy tamigny fomba matazaky gny zakanigny Topo. ²¹ Dra gny fa nahavita gny asa fanopoany tagny Efesiosy i Paoly, dra nanapa-kevisy tamigny fagnahy izy ba handalo an'i Makedonia vo i Akaia tegny andala magna Jerosalema agny, hoy izy: "Gny fa avy agny zaho, dra sy maisy magna Roma agny avo koa." ²² Paoly nandefa tamireo pagnapy anazy ho agny Makedonia, i Timoty vo Erasto, ze nanapaky anazy. Fa izy vatany nizano fotoa fohy tagny Asia. ²³ Tamizao fotoa zay ta Efesiosy agny dra nisy fanelingelegna lahibe mahakasiky gny lalana. ²⁴ Fa nisy panefy volafosy raiky atao i Demetrio, nanao gny sary sikosy volafosin'i Diana, napilisy vola be ho anireo panao asa-tagna. ²⁵ Dra nangoniny niaraky reo lelahy miandrekisy an'io asa io dra nizaka ho: "Topoko, fatasao fa amity raharaha tihoky dra mahazo vola be zahay. ²⁶ Hitanao vo renao zay, sy ta Efesiosy agny, fa hony manera an'i Asia raiky manotolo, io Paoly io dra nandresy lahasy vo nahatoa olo maro. Mizaka izy fa sy misy zagnahary vita tamigny tagna. ²⁷ Fa gny loza dra sy ho gny varosika avo gny sy ho ilailany sasy, fa gny tepolinigny andriamanim-bavy lahibe Diana avo koa azo havery ho sy misy dikany. Dra mety ho levom-boninahisy izy boak'eo, izy ze toponigny Asia aby vo izao totolo zao." ²⁸ Gny fa nahare anizay ereo, dra feno hasiaha ereo dra nihiaky fatrasy, nanao ho: "Lahibe i Diana an'i Efesiosy." ²⁹ Feno fifazevogna tao amigny tana raiky manotolo, dra niara-nifagnareseka ho ao amigny tragno fanova fapisehoa asehasy gny vahoaky. Voasambos'ereo reo piara-dia tamin'i Paoly, Gaio vo Aristarko, boaky a Makedonia agny. ³⁰ Te hilisy tao amireo vahoaky maro i Paoly, fa nisakanan'ireo pianasy izy. ³¹ Gny ilany tamireo mana-pahefa tao amigny faris'i Asia zenamany dra nandefa hafasy nangataky anazy fatrasy sy hilisy ao amigny tragno fanova fapisehoa asehasy. ³² Olo ilailany gny nihiaky raha raiky, dra gny anigny ilany hafa, tao agnaty fifazavogna gny vahoaky. Gny akamaroan'ereo aza sy mahafatasy akory ho nagnino ereo gny nindray avy. ³³ Gny ilany tamireo vahoaky gny napahafatasy an'i Aleksandra, ze narozin'ireo vahoaky ho egny aloha, dra nanao fihesiky tamigny tagnany i Aleksandra, te hagnome fagnazava ho anireo ze nivory. ³⁴ Fa gny fa nahafatasy ereo fa Jiosy izy, dra nihiaky fatrasy tamigny feo raiky izy aby teo ho eo amigny ora ro, nanao ho; "Lahibe gny Artemasinigny Efesiana." ³⁵ Gny fa naparevoky gny vavaky gny lahebenigny tana, dra nizaka izy dra: "Hanao olonigny Efesiosy, olo iza gny teo dra sy nahafatasy fa gny tananigny Efesiana dra piamby gny tepolinigny Diana lahibe vo gny sary ze nilasaky boak'agny an-dagnisy? ³⁶ Dra hita boak'eo fa sy azo lavy reo raha reo, dra tokony hizano handrareo dra sy hanao na ino na ino sy apihevera. ³⁷ Fa nandesindrareo ety amigny fisara reo lelahy reo sady sy pandroba tepoly gny sy pizaka rasy gny Zagnaharim-bavisika. ³⁸ Noho izay, gny mana fiapanga manohisy gny sirairay i Demetrio vo reo panao asatagna ze miaraky aminazy, dra misokaky reo fisara dra misy solotegna ao. Angao ereo hifapy apanga. ³⁹ Fa raha mitalia raha momba gny olo hafa handrareo, dra tokony hasanga amigny fivoria ara-dalana zay. ⁴⁰ Fa indrindra isika dra tandindognyn-doza ho voapanga makasiky an'io andronigny tabataba io. Sy misy atony zay fikorotagna zay, dra sy ho afaky hagnazava anizay sika." ⁴¹ Gny fa nizaka anizay izy dra, niravany gny fivoria.