¹ Satria nihamaregne tamity finoa tika, le mana fiadagna miarake amin'Agnahare amity alala ty Tompontika Jesosy kirisity. ² Amity alalane avao kea ro anagnantika lala amity finoa mbaeo amize hasoava ze itsanganantika zay. Mifalefale amity fatokisa amean'Agnahare anay amity hoavy zahy, fatokisa ze ho zaraentika ao amity hasin'Agnahare. ³ Tsy amizay avao, fa tika avao kea le mifale ao amity jalentika. Haintika fa ty fijalea le mamokatre fahareta. ⁴ Ty fahareta miterake fagnenkea, naho ty fagnenkea miterake fatokia ho amity hoavy. ⁵ Ze toky zay le tsy mandiso fagnategna, satria ty hatean'Agnahare le fa napoke tao agnarofontika tamity alala ty Fagnahy Masy, ze namea antika. ⁶ Fa laha mboe naleme tika, le mate ara-potoa hoahy ty raty fagnahy Kirisity. ⁷ Fa sarotre hoahy ty ndaty raike ty ho mate hoahy ty ndaty mare. Fa , asa mete misy ndaty raike mahasaky ho mate hoahy ty ndaty soa. ⁸ Fa Zagnahare manoro ty hateane arere ho antika, satria laha mboe mpanota tika, le mate ho antika kirisity. ⁹ Mihoatre naho zay aza, henanezao. Laha fa nihamaregne tamity lio tika, le ho voavonje zay amity helon'Agnahare. ¹⁰ Fa laha, mboe fahavalo tika, le nilongo tamin'Agnahare tamity alala ty fate ty Anane, naho mihoatre naho zay, laha fa baka nampilongoe, le ho voavonje amity alala ty aine tika. ¹¹ Naho zay avao, fa tika avao kea le mifale ao amin'Agnahare amity alala Tompontika Jesosy kirisity, ty nahazoantika ze filongoa zay amizao. ¹² Laha zao are, hoe ty nilira ty hadisoa tamity ndaty raike tamizao iaby zao, le hoe zay kea ro nilira ty fate tamity alala ty hadisoa. Naho ty fate le niele tamity ndaty iaby, satria sambe nanota iaby iaby. ¹³ Mandram-pisia ty lily, le teto amizao iaby zao ty hadisoa, fa tsy misy fagnisahan-keloke tsy misy lily. ¹⁴ Nefa ndra zay aza, ty fate le nanjaka nanomboke tamy Adama ka zisikamy Mosesy, ndra le teo amireo ze tsy nanota manahake ty tsy hatea Adama aza, ty jilove ty hoavy. ¹⁵ Nefa ndra zay aza, ty fagnomea le tsy manahake ty hadisoa. Fa laha tamity alala ty hadisoa ty raike ro nahafate ty maro, le mihoatre lavitre ro natao ty hasoan'Agnahare vaho ty fagnomea bakamity hasoa ty ndaty raike, Jesosy kirisity, namea bey hoahy maro. ¹⁶ Fa ty fagnomea le tsy manahake ty vokatre bakamity raike ze nanota. Fa amity lafine raike, avy ty fitsara ho fagnameloha naho ty hadisoa ty ndaty raike. Fa amity lafine raike hafa, ty fagnomea miafara amity fagnamarea le niavy tafara ty hadisoa maro. ¹⁷ Fa laha, tamity alala ty hadisoa ty raike, ro hanjaka ty fate amity raike, le mihoatre lavitre naho zay ty hanjaka reo ze mandrae ty habey ty hasoava vaho ty fagnomea ty hamarea amity alala ty fifanta ty raike, le Jesosy kirisity. ¹⁸ Laha zao are, satria tamity alala ty hadisoa ty raike ro nahavy ty ndaty ho amity fagnameloha, le amity alala ty asa ty hamarea ty raike avao kea ro hahavia ty fagnamarea ty havelo hoahy ty ndaty iaby. ¹⁹ Fa satria bakamity tsy fagnenkea ty ndaty raike ro nahavy ty maro ho mpanota, le amity alala ty fagnenkea ty raike avao kea ro hahavy ty maro ho mare. ²⁰ Fa niavy tamizay ty lily, mba ho bey ty hadisoa. Nefa laha nihabey ty hadisoa, le vaho maike nihabey ty hasoava. ²¹ Niseho zay mba, manahake ty nanjaka ty hadisoa tamity fate, le hoe zay kea ro hanjaka ty hasoava amity alala ty hamarea ho amity havelo zisikagne amity alala Jesosy kirisity Tompontika.