¹ Inona are ro ho rehafentika fa hita Abrahama, raentika taloha agne arake ty nofo? ² Fa laha nihamaregne tamity asa Abrahama, le nana antone hirehareha re, nefa tsy eo agnoloan'Agnahare. ³ Fa ino ro ambara ty Soratre Masy?" Abrahama le nino an'Agnahare, naho nidineke ho hamarea zay." ⁴ Naho hoahy ze miasa, ty karamane le tsy isahe ho hasoava, fa ho hoe ty trosa. ⁵ Fa hoahy ze tsy miasa kea nefa mino ty Raike ze magnamare ty mpandietre an'Agnahare, le isahe ho hamarea ty finoane. ⁶ Davida avao kea le manogno tso-drano amity ndaty ze isahen'Agnahare ho mare nefa tsy miasa. ⁷ Hoe re ty hoe:" Sambatre reo ze voa-vototre ty helone, naho kea reo ze voatako ty hadisoane . ⁸ Sambatre ze tsy isahe Tompo heloke." ⁹ Amiereo voasavatre avao vao ro hanognona ze tso-drano zay, sa amireo tsy voa-savatre kea? Fa hoe tika ty hoe:"Ty finoa le nisahe Abrahama ho hamarea." ¹⁰ Ka akore are ro nagnisaha zay? Tamy Abrahama te fa voasavatre, sa tamie tsy mboe voa-savatre? Tsy tamie le fa voa-savatre fa tamie mboe tsy voa-savatre. ¹¹ Abrahama le nandrae ty famantara ty fanavara. Zay le famantara ty hamarea ty finoa ze le fa nanagnane laha mboe tsy voa-savatre re. Ty vale ze famantara zay le lasa rae ze mino iaby re, ndra le mboe tsy voa-savatre aza iereo. Midika zay fa ty hamarea le ho isahe hoahy iereo. ¹² Nidika koa zay fa Abrahama le lasa rae ty voa-savatre tsy hoahy reo ze voa-savatre arere avao fa hoahy reo ze magnorike ty lia ty finoa Abrahama raentika avao kea taloha ty tsy mboe naha-voasavatre aze. ¹³ Fa ty fampagnategna tamy Abrahama vaho reo fokone fa ho mpandova zao iaby zao re le tsy bakamity alala ty lily fa bakamity alala ty hamarea ty finoa. ¹⁴ Fa laha reo ze mivelo amity lily ro mpandova, le ho foa ty finoa, naho tsinontsino ty fampagnategna. ¹⁵ Satria ty lily le manday amity heloke, fa agne amize tsy misy lily, le tsy misy fandikan-dily. ¹⁶ Laha ze antone zay le miseho amity finoa zay, mba hitoboha ty fampagnategna amity hasoava naho ho azo antoke amireo foko Abrahama iaby_tsy hoahy reo ze ambane ty lily avao, fa hoahy reo ze mizara ty finoa Abrahama avao kea. Raentika iaby re, ¹⁷ arake ty voasoratre ty hoe:" Nataoko ho rae ty firene maro riha." Teo amity fiatreha ty nitokia Abrahama, le, Zagnahare zay, te nagnomea havelo reo mate naho mikaike reo zaka tsy mboe misy mba hisy. ¹⁸ Ndra le tea aza reo zaka-miseho ambalike, le natoky vatane an'Agnahare ty Abrahama amity hoavy. Ka lasa rae ty firene maro re, arake ze le fa voatalily ty hoe:Hanahake zay ty fokonao." ¹⁹ Tsy narefo tamity finoa re. Hay Abrahama fa tsy afake ty hanagnanake re (satria le fa teo amity zato tao teo re). Niharine avao kea re fa ty troke Saraha le tsy afake ty handay trokebey sase. ²⁰ Nefa naho ty fampagnategnan'Agnahare, le tsy nisalasala tamity tsy finoa ty Abrahama. Fa kea, niha-mafe tamity finoa re naho niantsa an'Agnahare. ²¹ Rese lahatre vatane re fa ze nampagnategnan'Agnahare, le afake ataone avao kea. ²² Laha zao le nidineke hoaze ho hamarea zay. ²³ Naho le tsy sinoratre hoahy ty tombotsoane arere avao zay, fa nisahe hoaze zay. ²⁴ Sinoratre hoantika avao kea zay, hoahy ze hagnisaha zay, tika ze mino Aze ze nananga Jesosy Tompontika tamity mate. ²⁵ Re ty raike natolotre naho reo hadisoantika naho natsanga mba hagnamare antika.